വേങ്ങര: ഓണം-നബിദിന ആഘോഷങ്ങളുടെ ഭാഗമായി വേങ്ങര സാംസ്കാരിക വേദി സബാഹ് സ്ക്വയറിൽ സംഘടിപ്പിച്ച ചിത്രകലാമത്സരം കുരുന്നുകളുടെ സർഗ്ഗവസന്തത്തിന് വേദിയായി. നൂറുകണക്കിന് വിദ്യാർത്ഥികളുടെ ആവേശകരമായ പങ്കാളിത്തം കൊണ്ട് മത്സരം അക്ഷരാർത്ഥത്തിൽ ഒരു വർണ്ണോത്സവമായി മാറി. ഭാവനയുടെ ചിറകിലേറി കുഞ്ഞിക്കൈകളിൽ വിരിഞ്ഞ വർണ്ണവിസ്മയങ്ങൾ കാണികളിലും സംഘാടകരിലും ഒരുപോലെ കൗതുകവും ആഹ്ലാദവും നിറച്ചു. മതസൗഹാർദ്ദത്തിന്റെ സന്ദേശം ഉദ്ഘോഷിക്കുന്ന ഓണം-നബിദിന സംയുക്ത ആഘോഷത്തിന്റെ ഭാഗമായാണ് മത്സരം സംഘടിപ്പിച്ചത്. കിഡ്സ്, സബ്ജൂനിയർ, ജൂനിയർ എന്നിങ്ങനെ മൂന്ന് വിഭാഗങ്ങളിലായി നടന്ന മത്സരത്തിൽ ഓരോ വിഭാഗത്തിലെയും കുട്ടിപ്രതിഭകൾ ഇഞ്ചോടിഞ്ച് പോരാടി. പ്രായത്തെ വെല്ലുന്ന ഭാവനയും നിരീക്ഷണപാടവവും നിറക്കൂട്ടുകളോടുള്ള അഭിരുചിയും ഓരോ ചിത്രത്തിലും പ്രകടമായിരുന്നു. വിജയികളുടെ തിളക്കമാർന്ന പ്രകടനങ്ങൾ വിധികർത്താക്കൾക്ക് പോലും തിരഞ്ഞെടുപ്പ് പ്രയാസകരമാക്കി. വിശദമായ വിലയിരുത്തലുകൾക്ക് ശേഷം വിജയികളെ പ്രഖ്യാപിച്ചു:
കിഡ്സ് വിഭാഗം: റിംഷാദ് പി.വി (ഒന്നാം സ്ഥാനം), ശ്രീപർവന (രണ്ടാം സ്ഥാനം), ആയിഷ സൈൻ (മൂന്നാം സ്ഥാനം)
സബ്ജൂനിയർ വിഭാഗം: ഫാത്തിമ ശാദില (ഒന്നാം സ്ഥാനം), ഫാത്തിമ ഹൈഫ (രണ്ടാം സ്ഥാനം), ദേവ നന്ദ (മൂന്നാം സ്ഥാനം).
ജൂനിയർ വിഭാഗം: റിംഷ അക്ബർ (ഒന്നാം സ്ഥാനം), ഹനിയ്യ കെ.പി (രണ്ടാം സ്ഥാനം), ലിയാ മെഹ്റിൻ (മൂന്നാം സ്ഥാനം).
ചിത്രകലാരംഗത്തെ പ്രഗത്ഭരായ മാനുക്കുട്ടി മാഷ്, പൂഴിത്തറ ബാവ, യൂസുഫ് കുറ്റാളൂർ, നൗഷാദ് ആട്ടക്കുളയൻ, ബ്രാഷ്മാൻ , വിശ്വംഭരൻ ഇരിങ്ങല്ലൂർ എന്നിവർ മത്സരത്തിന്റെ വിധിനിർണ്ണയം നടത്തി.വിജയികൾക്കുള്ള പുരസ്കാരങ്ങൾ അടുത്ത ആഴ്ച നടക്കുന്ന വേങ്ങര സാംസ്കാരിക വേദിയുടെ ബൃഹത്തായ ഓണം-നബിദിന ആഘോഷ പരിപാടിയായ ‘ഇശൽ പൂക്കളം’ വേദിയിൽ വെച്ച് വിതരണം ചെയ്യും .
