കൊളത്തൂർ: ദിവ്യഗർഭം ധരിപ്പിക്കാമെന്ന് പറഞ്ഞ് തെറ്റിദ്ധരിപ്പിച്ച് യുവതിയെ ബലാത്സംഗം ചെയ്ത സംഭവത്തിൽ യൂട്യൂബറായ വ്യാജ സിദ്ധൻ അറസ്റ്റിൽ. കാളികാവ് ഉദിരംപൊയിൽ സ്വദേശി സജിൽ (36) ആണ് കൊളത്തൂർ പോലീസിന്റെ പിടിയിലായത്. താൻ ‘മഹ്‌ദി ഇമാം’ ആണെന്ന് അവകാശപ്പെട്ട് യൂട്യൂബ് ചാനൽ നടത്തിവരികയായിരുന്നു ഇയാൾ. കൊളത്തൂർ പോലീസ് സ്‌റ്റേഷൻ പരിധിയിൽ വാട‌കയ്‌ക്ക് താമസിക്കുന്ന യുവതിയെ പ്രതി യൂട്യൂബ് ചാനലിലൂടെയാണ് പരിചയപ്പെട്ടത്. ആഭിചാര ക്രിയകൾ ചെയ്യുന്ന ആളാണെന്ന് വിശ്വസിപ്പിച്ച് ബന്ധം സ്ഥാപിച്ച ശേഷം, യുവതിയുടെ താമസസ്ഥലത്ത് അതിക്രമിച്ചെത്തി ബലാത്സംഗം ചെയ്യുകയായിരുന്നു. ആത്മീയ കാര്യങ്ങളും അന്ധവിശ്വാസങ്ങളും പ്രചരിപ്പിക്കുന്ന ഇയാളുടെ യൂട്യൂബ് ചാനലിന് നിരവധി ഫോളോവേഴ്സ് ഉണ്ടെന്ന് പോലീസ് പറഞ്ഞു. ഒളിവിൽ പോയ പ്രതിയെ നെടുമങ്ങാട് നിന്നാണ് പോലീസ് പിടികൂടിയത്.