ഊരകം മലയിൽ ഡസൻ കണക്കായ യാതൊരുവിധ മാനദണ്ഡവും പാലിക്കാതെ നിയമവിരുദ്ധമായി പ്രവർത്തിച്ചുകൊണ്ടിരിക്കുന്ന അനധികൃത കരിങ്കൽ കോറികൾക്കെതിരെ കർശനമായ നിയമനടപടികൾ സ്വീകരിച്ച് പ്രദേശവാസികളുടെ ആശങ്കകൾ പരിഹരിക്കണമെന്ന് കേരള സ്റ്റേറ്റ് കൺസ്ട്രക്ഷൻ വർക്കേഴ്സ് കോൺഗ്രസ് ഐ എൻ ടി യു സി മലപ്പുറം ജില്ലാ കമ്മിറ്റി ആവശ്യപ്പെട്ടു. ഊരകം മലയിൽ ഈയിടെ ഉണ്ടായ ടാപ്പിംഗ് തൊഴിലാളിയുടെ ദുരൂഹ മരണത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ കർശന ശിക്ഷാനടപടികൾ കൈക്കൊള്ളണമെന്നും യോഗം ആവശ്യപ്പെട്ടു. ഭൂമി മാതാവിന്റെ ഹൃദയം പിളർത്തിയുള്ള ഖനനം ദൂരവ്യാപക പ്രത്യാഘാതങ്ങൾ സൃഷ്ടിക്കുമെന്നും പ്രകൃതിദുരന്തത്തിന്റെ വക്കോളം എത്തിനിൽക്കുന്ന ഊരകം മലയുടെ സംരക്ഷണം ഒരുക്കുന്നതിന് ബഹുജന പങ്കാളിത്തത്തോടെ സമരപരിപാടികൾക്ക് നേതൃത്വം നൽകുമെന്നും സാമ്പത്തിക ദുരാഗ്രഹികളുടെ ഇഛ ക്ക് കൂട്ടുനിൽക്കുന്ന രാഷ്ട്രീയ ഉദ്യോഗസ്ഥ ലോബികളുടെ പൊയ്മുഖം പൊതുജനമധ്യത്തിൽ തുറന്നു കാട്ടുമെന്നും യോഗം മുന്നറിയിപ്പ് നൽകി. ജില്ലാ പ്രസിഡണ്ട് അസൈനാർ ഊരകം അധ്യക്ഷത വഹിച്ചു ജില്ലാ നേതാക്കളായ അഷ്റഫ് മനരിക്കൽ, പി പി എ ബാവ , മുഹമ്മദ് ബാവ എ ആർ നഗർ , മണ്ണിൽ ബിന്ദു, ഉണ്ണി തൊട്ടിയിൽ, എം പി വേലായുധൻ മാസ്റ്റർ,മനോജ് പുനത്തിൽ, ചന്ദ്രമതി ചെമ്പട്ട തുടങ്ങിയവർ സംസാരിച്ചു ഷൗക്കത്തലി സി വി സ്വാഗതവും റഷീദ കണ്ണമംഗലം നന്ദിയും പറഞ്ഞു
