മലപ്പുറം: നിലമ്പൂര്‍ എംഎല്‍എ പി വി അന്‍വര്‍ തനിക്കെതിരെ നടത്തിയ ആരോപണങ്ങള്‍ക്ക് മറുപടിയുമായി സിപിഐഎം മലപ്പുറം ജില്ലാ സെക്രട്ടറി ഇ എന്‍ മോഹന്‍ദാസ്. താന്‍ ആര്‍എസ്എസാണെന്ന് അന്‍വറല്ലാതെ പ്രതിപക്ഷം പോലും പറയില്ലെന്ന് മോഹന്‍ദാസ് പറഞ്ഞു. 1970 മുതല്‍ പാര്‍ട്ടിയില്‍ പ്രവര്‍ത്തിക്കുന്ന വ്യക്തിയാണ് താനെന്നും സംഘപരിവാറിനെതിരെ ശക്തമായ ആശയ സമരം നടത്തുന്ന വ്യക്തിയാണെന്നും അദ്ദേഹം വാര്‍ത്താ സമ്മേളനത്തില്‍ പറഞ്ഞു. മുസ്ലിങ്ങളെ പ്രീണിക്കുന്നു എന്നതായിരുന്നു നേരത്തെയുണ്ടായ ആക്ഷേപമെന്നും ആര്‍എസ്എസ് ആക്കുന്നതിനു പിന്നില്‍ വലതുപക്ഷത്തില്‍ തടവറയിലായതിന്റെ ഉദാഹരണമാണെന്നും അദ്ദേഹം വ്യക്തമാക്കി. അന്‍വറിന്റെ പ്രസ്താവനയെ പുച്ഛത്തോടെ തള്ളുന്നു. പാര്‍ട്ടിക്ക് എതിരായ കടന്നാക്രമണമാണ് നടത്തുന്നത്. അന്‍വറിന്റെ പുതിയ രാഷ്ട്രീയ നിലപാടാണിത്. മുസ്ലിങ്ങളെ പ്രീണിപ്പിക്കുന്നു എന്നതായിരുന്നു മുന്‍പത്തെ ആക്ഷേപം. ആര്‍എസ്എസ് ആക്കുന്നതിനു പിന്നില്‍ വലതുപക്ഷത്തില്‍ തടവറയിലായതിന്റെ ഉദാഹരണമാണ്. അന്‍വര്‍ തീവ്ര വര്‍ഗീയത പറയുന്നു. ഞാന്‍ ആര്‍എസ്എസാണ്, വര്‍ഗീയവാദിയാണ്, മുസ്‌ലിം വിരുദ്ധനാണ് തുടങ്ങിയ ആക്ഷേപങ്ങളാണ് അദ്ദേഹം ഉന്നയിച്ചത്. അദ്ദേഹമല്ലാതെ മറ്റാരെങ്കിലും ഇത് പറയുമോ. മുസ്‌ലിം ലീഗിന്റെ നേതാവോ പ്രവര്‍ത്തകനോ ഞാന്‍ മുസ്‌ലിം വിരുദ്ധനാണ്, ആര്‍എസ്എസാണെന്ന് ആക്ഷേപിക്കുമോ, ഇല്ലെന്നാണ് ഞാന്‍ കരുതുന്നത്. എന്താണ് അയാള്‍ നിങ്ങളെ പറ്റി വിളിച്ചുപറയുന്നതെന്ന് ലീഗിന്റെയും കോണ്‍ഗ്രസിന്റെയും അടക്കം നാട്ടിലെ പ്രവര്‍ത്തകര്‍ എന്നെ വിളിച്ചു ചോദിക്കുകയാണ്,’ മോഹന്‍ദാസ് പറഞ്ഞു.
അന്‍വറിന് വിരോധം ഉണ്ടെങ്കില്‍ ഇത്രത്തോളം തരം താഴരുതെന്നും അദ്ദേഹം കൂട്ടിച്ചേര്‍ത്തു. അന്‍വര്‍ പാര്‍ട്ടി ഓഫീസിലേക്ക് വരവ് കുറവാണെന്നും സുജിത് ദാസിനെതിരെ ഒരു പരാതിയും തന്നോട് പറഞ്ഞിട്ടില്ലെന്നും മോഹന്‍ദാസ് പറയുന്നു. അന്‍വര്‍ പച്ച നുണയാണ് പറയുന്നത്. തെളിവുകള്‍ ഉണ്ടെങ്കില്‍ അന്‍വര്‍ പുറത്തു വിടട്ടെയെന്നും താന്‍ ആരുടെയും നിസ്‌കാരം മുടക്കിയിട്ടില്ലെന്നും മോഹന്‍ദാസ് പറഞ്ഞു. ഹജ്ജ് ചെയ്യുന്ന, നിസ്‌കരിക്കുന്ന പ്രവര്‍ത്തകരുണ്ട് ഈ പാര്‍ട്ടിയില്‍. ഇത്രത്തോളം നുണ പറയുമ്പോള്‍ അന്‍വര്‍ ആത്മപരിശോധന നടത്തണം. വിശ്വാസിയാണെന്നാണ് അന്‍വര്‍ അവകാശപ്പെടുന്നത്. പൊലീസ് അസോസിയേഷന്റെ സമ്മേളനത്തില്‍ പങ്കെടുക്കണം എന്ന് ആവശ്യപ്പെട്ടാണ് അന്‍വറിനെ അവസാനമായി വിളിച്ചത്. അന്‍വര്‍ പറയുന്നതില്‍ സത്യത്തിന്റെ അംശമുള്ള ഒന്നുമില്ല. എന്റെ രാഷ്ട്രീയം കച്ചവടമല്ല, ബഹുജന സേവനമാണ്. സെക്രട്ടറി സ്ഥാനം എന്നെ പാര്‍ട്ടി ഏല്‍പ്പിച്ചതാണ്,’ അദ്ദേഹം പറഞ്ഞു. പാര്‍ട്ടിയെ അന്‍വര്‍ വെല്ലുവിളിക്കുമ്പോള്‍ പാര്‍ട്ടീ ജില്ലാ സെക്രട്ടറിയെന്ന നിലയില്‍ പ്രതിരോധിക്കേണ്ട ബാധ്യതയുണ്ടെന്നും ആ പ്രതികരണം അദ്ദേഹത്തെ നന്നായി അലോസരപ്പെടുത്തിയെന്നും മോഹന്‍ദാസ് ചൂണ്ടിക്കാട്ടുന്നു. അന്‍വറിന് കോണ്‍ഗ്രസ്സിലെ പരിചയമാണുള്ളതെന്നും ആ അനുഭവത്തിലാണ് തനിക്ക് നേരെ ആക്രമണം ഉണ്ടായെന്ന് പറയുന്നതെന്നും മോഹന്‍ദാസ് കൂട്ടിച്ചേര്‍ത്തു. നിലമ്പൂരിലെ വികസനം നടക്കാത്തതിന്റെ പൂര്‍ണ ഉത്തരവാദിത്തം അന്‍വറിനാണെന്നും അദ്ദേഹം പറഞ്ഞു.
കഴിഞ്ഞ അഞ്ച് വര്‍ഷത്തെ പ്രവര്‍ത്തനങ്ങളിലെ പരിമിതികള്‍ പരിഹരിച്ച് കൂടുതല്‍ ചടുലമായി ഇടപെടുമെന്ന പ്രതീക്ഷയിലാണ് രണ്ടാം തവണയും സീറ്റ് നല്‍കിയതെന്നും മോഹന്‍ദാസ് പറഞ്ഞു. ‘നാമനിര്‍ദേശ പ്രക്രിയ ആരംഭിച്ചതിന് ശേഷമാണ് അദ്ദേഹം നാട്ടിലെത്തിയത്. അതുവരെ ദക്ഷിണാഫ്രിക്കയിലായിരുന്നു. അദ്ദേഹത്തിന്റെ ബിസിനസുമായി ബന്ധപ്പെട്ട് നാട്ടിലുണ്ടായിരുന്നില്ല. അത് അദ്ദേഹത്തിന്റെ മണ്ഡലത്തിലെ വികസന പ്രവര്‍ത്തനങ്ങള്‍ പ്രതികൂലമായി ബാധിച്ചു. എത്ര ദിവസമാണ് അദ്ദേഹം മണ്ഡലത്തിലുണ്ടായതെന്ന് നാടിനറിയാമല്ലോ, നിലമ്പൂരില്‍ വികസന പ്രവര്‍ത്തനങ്ങള്‍ നടക്കാതെ പോയിട്ടുണ്ടെങ്കില്‍ അതിന്റെ പ്രധാന ഉത്തരവാദി അദ്ദേഹം തന്നയാണ്. നാട്ടിലുണ്ടാകണമെന്ന് നിരന്തരം പറഞ്ഞിരുന്നു, നാട്ടിലുണ്ടാകുമെന്ന പ്രതീക്ഷയിലാണ് വീണ്ടും സീറ്റ് നല്‍കിയത്. കഴിഞ്ഞ അഞ്ച് വര്‍ഷത്തെ പ്രവര്‍ത്തനങ്ങളിലെ പരിമിതികള്‍ പരിഹരിച്ച് കൂടുതല്‍ ചടുലമായി ഇടപെടുമെന്ന പ്രതീക്ഷയില്‍ സീറ്റ് നല്‍കി,’ അദ്ദേഹം പറഞ്ഞു. തന്റെയും അദ്ദേഹത്തിന്റെയും രാഷ്ട്രീയ പ്രവര്‍ത്തനം അറിയാവുന്നവരാണ് മലപ്പുറം ജില്ലയിലുള്ളവരെന്നും മോഹന്‍ദാസ് കൂട്ടിച്ചേര്‍ത്തു.
നിങ്ങൾ വാർത്തകൾ അറിയാന്‍ WHATSAPP ഗ്രൂപ്പിൽ ജോയിൻ ചെയ്യുക
നിങ്ങൾക്കും വാർത്തകളും അറിയിപ്പുകളും അറിയിക്കാം…
E MAIL : mtnlivenews@gmail.com