കോഴിക്കോട്: ലക്ഷങ്ങൾ വിലവരുന്ന സ്വർണാഭരണം വഴിയരികിൽ കളഞ്ഞുകിട്ടിയപ്പോൾ, അത് ഉടമയെ ഏൽപിച്ച് സത്യസന്ധതയുടെ മാതൃകയായിരിക്കുകയാണ് പ്ലസ് ടു വിദ്യാർത്ഥിനി. ദിവസങ്ങൾ നീണ്ട ആശങ്കയ്ക്ക് വിരാമമിട്ട് ആഭരണം തിരികെ ലഭിച്ച വയോധികയുടെ ആശ്വാസത്തിന് സാക്ഷ്യം വഹിച്ചു പയ്യോളി ടൗൺ. പയ്യോളി ഹൈസ്‌കൂളിലെ പ്ലസ് ടു വിദ്യാർത്ഥിനിയായ അമയയുടെ (17) സത്യസന്ധതയാണ് പെരുമാൾപുരം ചെറുകുറ്റി സ്വദേശിനി ഫൗസിയ (81) എന്ന വയോധികയുടെ ദുരിതത്തിന് അറുതി വരുത്തിയത്. കഴിഞ്ഞ വ്യാഴാഴ്ചയാണ് ഫൗസിയയുടെ അഞ്ച് പവൻ തൂക്കമുള്ള സ്വർണാഭരണങ്ങൾ അടങ്ങിയ പഴ്‌സ് പേരാമ്പ്ര റോഡിലെ കേരള ബാങ്കിന് സമീപത്തുവെച്ച് നഷ്ടമായത്. വീട്ടിലെത്തിയ ശേഷമാണ് ബാഗിൽ പഴ്‌സില്ലെന്ന് ഫൗസിയയ്ക്ക് മനസ്സിലായത്. പിറ്റേന്ന് രാവിലെ തന്നെ അവർ ബസ് ജീവനക്കാരോടും വഴിയരികിലും അന്വേഷണം നടത്തിയെങ്കിലും ഫലമുണ്ടായില്ല. ഒടുവിൽ പയ്യോളി പോലീസ് സ്റ്റേഷനിലെത്തി വിവരം ധരിപ്പിച്ചു. സ്റ്റേഷനിലുണ്ടായിരുന്ന വനിതാ എസ്‌ഐയാണ് സ്വർണാഭരണം കളഞ്ഞുകിട്ടിയതായി സമൂഹ മാധ്യമങ്ങളിൽ പ്രചരിക്കുന്നുണ്ടെന്ന വിവരം ഫൗസിയയെ അറിയിച്ചത്. തുടർന്ന് നടത്തിയ പരിശോധനയിൽ പയ്യോളി-പേരാമ്പ്ര റോഡിലെ സൂപ്പർ മെഡിക്കൽസ് ഉടമ എം. ഫൈസലാണ് ഇത് സംബന്ധിച്ച വിവരങ്ങൾ പങ്കുവെച്ചതെന്ന് ബോധ്യമായി. പോലീസ് നിർദ്ദേശിച്ചതനുസരിച്ച് ഫൈസലിനെ ബന്ധപ്പെട്ട ശേഷം, അമയയുടെ സാന്നിധ്യത്തിൽ വെച്ച് പോലീസ് സ്റ്റേഷനിൽ വെച്ച് ആഭരണം ഫൗസിയയ്ക്ക് കൈമാറി. ലക്ഷങ്ങൾ വിലയുള്ള ആഭരണം തിരികെ ലഭിച്ച നിമിഷം, സന്തോഷം അടക്കാനാകാതെ അമയയെ വാരിപ്പുണർന്നാണ് ഫൗസിയ നന്ദി അറിയിച്ചത്. വിദ്യാർത്ഥിനിയുടെ സത്യസന്ധതയെ പോലീസ് ഉൾപ്പെടെ അഭിനന്ദിച്ചു.
