ഇരിങ്ങാലക്കുട: സ്വകാര്യ ബസിനെ മറികടക്കാൻ ശ്രമിക്കുന്നതിനിടെ സ്കൂട്ടറിൽ നിന്ന് ബസിനടിയിലേക്ക് മറിഞ്ഞുവീണ് യുവതി മരിച്ചു. ഇരിങ്ങാലക്കുട കൊട്ടിലിങ്ങപ്പാടം ആസാദ് റോഡിൽ കരിപ്പുര വീട്ടിൽ അഷറഫിന്റെ മകൾ ആഫിദ (28) ആണ് മരിച്ചത്. കൊടകര-വെള്ളിക്കുളങ്ങര റോഡിൽ നെല്ലിപ്പറമ്പിൽ തിങ്കളാഴ്ച വൈകീട്ട് എട്ടുമണിയോടെയായിരുന്നു അപകടം. പത്തുകുളങ്ങരയിലുള്ള ബന്ധുവീട്ടിൽ പോയി മടങ്ങുകയായിരുന്നു ആഫിദയും സംഘവും. ആഫിദ ഓടിച്ചിരുന്ന സ്കൂട്ടറിൽ ഒരു കുട്ടിയും ബന്ധുവായ മറ്റൊരു സ്ത്രീയുമുണ്ടായിരുന്നു.
നെല്ലിപ്പറമ്പിൽ വെച്ച് മുന്നിലുണ്ടായിരുന്ന സ്വകാര്യ ബസിനെ മറികടക്കാൻ ശ്രമിക്കുന്നതിനിടെ എതിർദിശയിൽ നിന്നു വന്ന ബൈക്കിൽ സ്കൂട്ടർ തട്ടുകയായിരുന്നു. ഈ സമയം പിന്നാലെ വന്ന മറ്റൊരു ബൈക്കും സ്കൂട്ടറിൽ ഇടിച്ചതോടെ ആഫിദ റോഡിലേക്ക് മറിഞ്ഞുവീണു. നിയന്ത്രണം വിട്ട സ്കൂട്ടറിൽ നിന്ന് ആഫിദ ബസിനടിയിലേക്കാണ് വീണത്. ഉടൻ തന്നെ ബസ് ശരീരത്തിലൂടെ കയറിയിറങ്ങുകയായിരുന്നു. സ്കൂട്ടറിലുണ്ടായിരുന്ന മറ്റു രണ്ടുപേരും എതിർവശത്തേക്ക് വീണതിനാൽ ചെറിയ പരിക്കുകളോടെ അത്ഭുതകരമായി രക്ഷപ്പെട്ടു. മൃതദേഹം കൊടകരയിലെ സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്. പരേതനായ മുഹമ്മദ് മെഹഫൂഫ് (ലല്ലു) ഏക മകനാണ്.
