കരിപ്പൂർ: യാത്രാമധ്യേ വിമാനം ഹൈജാക്ക് ചെയ്യപ്പെട്ടാൽ നേരിടാനുള്ള സുരക്ഷാ സംവിധാനങ്ങളുടെ പ്രവർത്തനക്ഷമതയും ഏകോപനവും പരിശോധിക്കുന്നതിനായി കരിപ്പൂർ അന്താരാഷ്ട്ര വിമാനത്താവളത്തിൽ ആന്റി ഹൈജാക്ക് മോക്ക് എക്സർസൈസ് സംഘടിപ്പിച്ചു. ബംഗളൂരുവിൽ നിന്ന് 25 യാത്രക്കാരുമായി എത്തിയ വിമാനം തീവ്രവാദികൾ ഹൈജാക്ക് ചെയ്തതായാണ് കൃത്രിമ സാഹചര്യമൊരുക്കി പരിശീലനം നടത്തിയത്.**പരിശീലനം ഇങ്ങനെ:**ഉച്ചയ്ക്ക് 03.07-ന് കരിപ്പൂരിലെത്തിയ ‘എ.ബി.സി എയർലൈൻ’ വിമാനത്തിൽ യാത്രക്കാരുടെ വേഷത്തിൽ കയറിയ നാലു തീവ്രവാദികൾ വിമാനം ഹൈജാക്ക് ചെയ്യുന്നതായാണ് മോക്ക് ഡ്രില്ലിന്റെ തുടക്കം. പൈലറ്റ് വഴി വിവരം എ.ടി.സിയെയും തുടർന്ന് എയർപോർട്ട് അതോറിറ്റിയെയും അറിയിച്ചു. അടിയന്തരമായി രക്ഷാപ്രവർത്തനങ്ങൾ ആസൂത്രണം ചെയ്യുകയും, തീവ്രവാദികളുമായി വിലപേശൽ നടത്തിയ ശേഷം എൻ.എസ്.ജിയുടെ (NSG) നേതൃത്വത്തിൽ അവരെ കീഴടക്കി യാത്രക്കാരെ സുരക്ഷിതമായി മോചിപ്പിക്കുകയും ചെയ്യുന്നതിലൂടെയാണ് മോക്ക് ഡ്രിൽ പൂർത്തിയായത്.വിമാനം ഹൈജാക്ക് ചെയ്യപ്പെടുന്ന അടിയന്തര സാഹചര്യങ്ങളിൽ വിവിധ സുരക്ഷാ ഏജൻസികളുടെ പ്രതികരണ സമയം, ഏകോപനം, കമാൻഡ് ആൻഡ് കൺട്രോൾ സംവിധാനങ്ങളുടെ പ്രവർത്തനക്ഷമത എന്നിവ വിലയിരുത്തുകയായിരുന്നു ഈ പരിശീലനത്തിന്റെ പ്രധാന ലക്ഷ്യം.**അവലോകന യോഗം:**മോക്ക് എക്സർസൈസിന് ശേഷം എയർപോർട്ട് ഡയറക്ടറുടെ നേതൃത്വത്തിൽ എല്ലാ ഏജൻസികളുടെയും പങ്കാളിത്തത്തോടെ വിശദമായ അവലോകന യോഗം ചേർന്നു. പ്രവർത്തനങ്ങളിലെ മികച്ച രീതികളും, ഭാവിയിൽ മെച്ചപ്പെടുത്തേണ്ട മേഖലകളും യോഗത്തിൽ ചർച്ച ചെയ്തു.എയർപോർട്ട് അതോറിറ്റി, സി.ഐ.എസ്.എഫ് (CISF), പോലീസ്, എയർലൈനുകൾ, ദുരന്ത നിവാരണ സേന, ജില്ലാ ഭരണകൂടം, എയർപോർട്ട് ഹെൽത്ത് ഓർഗനൈസേഷൻ, ഐ.ബി, എമിഗ്രേഷൻ, മെഴ്സി ആൻഡ് റിലീഫ് ആശുപത്രികൾ തുടങ്ങി വിവിധ ഏജൻസികൾ മോക്ക് എക്സർസൈസിൽ പങ്കാളികളായി. എയർപോർട്ട് ഡയറക്ടർ മുകേഷ് യാദവ്, സബ് കളക്ടർ സാക്ഷി മോഹൻ, സി.ഐ.എസ്.എഫ് കമാൻഡന്റ് ജെ.എസ്. രാത്തോഡ്, ഡിവൈ.എസ്.പി സുഭാഷ് ബാബു തുടങ്ങിയവർ നേതൃത്വം നൽകി.