കോഴിക്കോട്: നാഷണൽ ഹൈവേ 66 ആറുവരിപ്പാതയിൽ ലൈൻ ട്രാഫിക് സിസ്റ്റം ഡ്രൈവർമാർ കൃത്യമായി പാലിക്കാതെ പോയാൽ വാഹനാപകടങ്ങളും അപകടമരണങ്ങളും അധികരിക്കുമെന്ന് റാഫ് സംസ്ഥാന പ്രസിഡണ്ട് ഡോ. കെ എം അബ്ദു അഭിപ്രായപ്പെട്ടു. വാഹനങ്ങൾ ഓടിക്കേണ്ടുന്ന ട്രാക്കുകളെ കുറിച്ചും സർവീസ് റോഡുകളിൽ നിന്നുള്ള എൻട്രികളും എക്സിറ്റുകളും കൃത്യമായി പാലിക്കപെടണം. സർവീസ് റോഡുകൾ വൺവേ സിസ്റ്റം അല്ലെന്നിരിക്കെ റോഡ് നിയമങ്ങൾ കർശനമായി പാലിക്കാതിരുന്നാൽ റോഡപകട സാധ്യതകൾ കൂടും. ഒരു പുതിയ റോഡ് സംസ്കാരം വളർത്തി കൊണ്ടു വരുന്നതിലേക്ക് ഡ്രൈവർമാരും റോഡ് ഉപയോഗിക്കുന്ന മറ്റുള്ളവരും എത്തിപ്പെടേണ്ടതുണ്ടെന്ന് അദ്ദേഹം പറഞ്ഞു. പോലീസ്, മോട്ടോർ വാഹന, വിദ്യാഭ്യാസ,എക്സൈസ്, പൊതുമരാമത്ത് തുടങ്ങിയ വിവിധ വകുപ്പ് അധികൃതരുടെ സഹകരണത്തോടെ വിപുലമായ ബോധവൽക്കരണ പരിപാടികൾക്ക് റാഫ് രൂപം നൽകി വരുന്നതായി അദ്ദേഹം അറിയിച്ചു.റോഡ് ആക്സിഡന്റ് ആക് ഷൻ ഫോറം കോഴിക്കോട് നോർത്ത്, സൗത്ത് നിയോജക മണ്ഡലങ്ങളിലെ പ്രവർത്തകർക്കായി മാങ്കാവ് ഗോവിന്ദം ഓഡിറ്റോറിയത്തിൽ സംഘടിപ്പിച്ച ജീവകാരുണ്യ പ്രവർത്തക കൺവെൻഷനും റോഡുസുരക്ഷ സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന സെക്രട്ടറി അനീഷ് മാലാപ്പറമ്പ്
അധ്യക്ഷനായിരുന്നു. കോർപ്പറേഷൻ കൗൺസിലർ ഓമന മധു റോഡു സുരക്ഷ ലഘുലേഖ പ്രകാശനം ചെയ്തു. കെ വി അഷറഫ്,കെ അരുൾ ദാസ്, ലൈജു റഹീം, കെ കെ കോയ, പ്രൊഫ. ബഷീർ മണലൊടി, ഏകെ അശറഫ്, ജയകൃഷ്ണൻ മങ്കാവ്,കെഎം തസ്നി, ഇവികെ സലീം,എ പ്രഭാകരൻ, സഹീർ അലി, സാബിറ ചേളാരി, പിവി അഷറഫ് തുടങ്ങിയവർ പ്രസംഗിച്ചു. വിജയൻ ആലപ്രത്ത് സ്വാഗതവും സഹീർ അലി നന്ദിയും പറഞ്ഞു.
