വേങ്ങര: നാടുകാണി-പരപ്പനങ്ങാടി റോഡിൽ ഊരകം കുറ്റാളൂർ മുതൽ കുന്നത്ത് വരെയുള്ള ഭാഗത്തെ അപകട വളവുകൾ നിവർത്തി റോഡ് നാലുവരിപ്പാതയാക്കണമെന്ന് ആവശ്യപ്പെട്ട് നിവേദനം നൽകി. ഊരകം പഞ്ചായത്ത് നാലാം വാർഡ് മെമ്പർ നെല്ലേങ്ങര ഇബ്രാഹിമാണ് വേങ്ങര നിയോജകമണ്ഡലം എം.എൽ.എ പി.കെ. കുഞ്ഞാലിക്കുട്ടിക്ക് നിവേദനം സമർപ്പിച്ചത്. ഈ ഭാഗത്ത് നിലവിലുള്ള അപകടകരമായ വളവുകൾ നിമിത്തം നിരന്തരം വാഹനാപകടങ്ങൾ സംഭവിക്കുന്ന പശ്ചാത്തലത്തിലാണ് റോഡ് വികസിപ്പിക്കണമെന്ന ആവശ്യം ഉന്നയിച്ചിരിക്കുന്നത്. നാലുവരിപ്പാത യാഥാർത്ഥ്യമാകുന്നതോടെ ഗതാഗതക്കുരുക്കിന് പരിഹാരമാകുമെന്നും യാത്ര സുഗമമാകുമെന്നും നിവേദനത്തിൽ ചൂണ്ടിക്കാട്ടുന്നു. ചടങ്ങിൽ ഊരകം പഞ്ചായത്ത് ഗ്ലോബൽ കെ.എം.സി.സി സെക്രട്ടറി സഹദ് വേങ്ങര, പി.പി. മുഹമ്മദാലി, പി.പി. ബഷീർ എന്നിവരും സംബന്ധിച്ചു. വിഷയം ഗൗരവമായി പരിഗണിക്കാമെന്നും ബന്ധപ്പെട്ട വകുപ്പുകളുമായി ചർച്ച നടത്തുമെന്നും എം.എൽ.എ അറിയിച്ചു.