തിരൂരങ്ങാടി: സംസ്ഥാന ന്യൂനപക്ഷ ക്ഷേമ വകുപ്പിന് കീഴിൽ വേങ്ങര- കൊളപ്പുറം കേന്ദ്രമായി പ്രവർത്തിക്കുന്ന കോച്ചിംഗ് സെന്റർ ഫോർ മൈനോരിറ്റി യൂത്തിന്റെയും, തിരുരങ്ങാടി പി.എസ്.എം.ഒ കോളേജ് കൗൺസലിംഗ് സെല്ലിന്റെയും, ജീവനി മെന്റൽ വെൽബീയിംഗ് പ്രോഗ്രാമിന്റെയും സംയുക്താഭിമുഖ്യത്തിൽ സംഘടിപ്പിക്കുന്ന മൂന്ന് ദിവസത്തെ സൗജന്യ വിവാഹ പൂർവ കൗൺസിലിംഗ് ട്രെയിനിംഗ് പ്രോഗ്രാം ആരംഭിച്ചു. കോളേജ് മാനേജ്മെന്റ് കമ്മിറ്റി ചെയർമാൻ എം.കെ ബാവ സാഹിബ് ഉദ്ഘാടനം നിർവഹിച്ചു. കോളേജ് പ്രിൻസിപ്പാൾ ഡോ. കെ. നിസ്സാമുദ്ദീൻ അധ്യക്ഷത വഹിച്ചു. വിവാഹ ജീവിതത്തിന്റെ സാമൂഹിക പ്രാധാന്യം വിദ്യാർഥികളിൽ എത്തിക്കുകയും അതുവഴി കൃത്യമായ അവബോധം സൃഷ്ടിക്കുകയുമാണ് പ്രീമാരിറ്റൽ കൗൺസിലിംഗിന്റെ ലക്ഷ്യം. മൂന്ന് ദിവസങ്ങളിലായി ആറു സെഷനുകളായാണ് ട്രെയിനിംഗ് പ്രോഗ്രാം ക്രമീകരിച്ചിരിക്കുന്നത്. ദാമ്പത്യ ജീവിതത്തിന്റെ മുന്നൊരുക്കങ്ങൾ, സന്തുഷ്ട കുടുംബജീവിതം, വിവാഹത്തിലെ നിയമ-സദാചാര വശങ്ങൾ, കോൺഫ്ലിക്ട് മാനേജ്മെന്റ്, ബഡ്ജറ്റിങ്, പാരന്റിങ്, ലൈംഗികാരോഗ്യം എന്നീ വിഷയങ്ങളെ ആസ്പദമാക്കിയാണ് ക്ലാസുകൾ നടക്കുന്നത്. വൈവാഹിക കുടുംബ ജീവിതത്തെക്കുറിച്ച് വ്യക്തമായ കാഴ്ചപ്പാട് രൂപപ്പെടുത്താൻ ഈ പരിശീലനത്തിലൂടെ വിദ്യാർഥികൾക്ക് സാധിക്കും. ചടങ്ങിൽ സി.സി.എം.വൈ (CCMY) വേങ്ങര പ്രിൻസിപ്പാൾ മുനീറ, കോളേജ് കൗൺസിലിങ് സെൽ കോർഡിനേറ്റർ എം. സലീന എന്നിവർ ആശംസകൾ അർപ്പിച്ചു. കോളേജ് ജീവനി മെന്റൽ വെൽബീയിംഗ് സെൽ കോർഡിനേറ്റർ ഡോ. കെ. റംല സ്വാഗതവും ജീവനി കൗൺസിലർ പി. ശ്രുതി നന്ദിയും പറഞ്ഞു.
