പെരുമണ്ണ: കേരളത്തിന്റെ തനിമയും ഓണത്തിന്റെ സന്തോഷവും വിളിച്ചോതി പെരുമണ്ണ എ.എം.എൽ.പി സ്കൂളിൽ ഈ വർഷത്തെ ഓണാഘോഷ പരിപാടികൾ “ആരവം” എന്ന പേരിൽ വളരെ വിപുലമായും ആവേശകരമായും സംഘടിപ്പിച്ചു. ആഘോഷത്തിന്റെ ഭാഗമായി സ്കൂൾ അങ്കണത്തിൽ ഒരുക്കിയ മനോഹരമായ പൂക്കളം ഏവരുടെയും ശ്രദ്ധ പിടിച്ചുപറ്റി. തുടർന്ന് കുട്ടികൾക്കായി വിഭവസമൃദ്ധമായ ഓണസദ്യയും ഒരുക്കിയിരുന്നു. വിദ്യാർത്ഥികൾക്കായി വിവിധ വിനോദ മത്സരങ്ങളും സംഘടിപ്പിച്ചു. കസേരകളി, കുപ്പിയിൽ വെള്ളം നിറയ്ക്കൽ, ലെമൺ സ്പൂൺ റേസ്, വടംവലി തുടങ്ങിയ മത്സരങ്ങളിൽ കുട്ടികളും അധ്യാപകരും ഒരുപോലെ ആവേശത്തോടെ പങ്കെടുത്തു. ഓണത്തിന്റെ കലാസാംസ്കാരിക പാരമ്പര്യം വിളിച്ചോതുന്ന ഓണപ്പാട്ടുകളും തിരുവാതിരയും ആഘോഷത്തിന് കൂടുതൽ മിഴിവേകി.ആഘോഷത്തിന്റെ ഓർമ്മകൾ മനോഹരമായി സൂക്ഷിക്കുന്നതിനായി പ്രത്യേകമായി ഒരുക്കിയ ഫോട്ടോ ഫ്രെയിമിൽ വിദ്യാർത്ഥികളും അധ്യാപകരും ചിത്രങ്ങൾ പകർത്തി. കൂട്ടായ്മയുടെയും സൗഹൃദത്തിന്റെയും സന്തോഷത്തിന്റെയും മനോഹരമായ ഓർമ്മകൾ സമ്മാനിച്ചുകൊണ്ട് ഈ വർഷത്തെ ഓണാഘോഷം സമാപിച്ചു.