താനൂർ: മുതിർന്ന കോൺഗ്രസ് നേതാവായിരുന്ന യു.കെ. ഭാസിയുടെ നാമധേയത്തിൽ ഏർപ്പെടുത്തിയ ഈ വർഷത്തെ ‘ലീഡർ പുരസ്കാരത്തിന്’ രമേശ് ചെന്നിത്തല അർഹനായി. ഇന്ത്യൻ നാഷണൽ കോൺഗ്രസിന് ഇക്കാലമത്രയും അദ്ദേഹം നൽകിയ നേതൃപരമായ പങ്കും, സംസ്ഥാന-ദേശീയ തലങ്ങളിൽ നടത്തിയ നിസ്തുലമായ സേവനങ്ങളും പരിഗണിച്ചാണ് പുരസ്കാരമെന്ന് യു.കെ. ഭാസി ഫൗണ്ടേഷൻ ഭാരവാഹികൾ അറിയിച്ചു.
ദീർഘകാലമായി പൊതുരംഗത്ത് സജീവമായ രമേശ് ചെന്നിത്തല, കെ.പി.സി.സി പ്രസിഡന്റ്, ആഭ്യന്തര മന്ത്രി, പ്രതിപക്ഷ നേതാവ് തുടങ്ങി നിരവധി സുപ്രധാന പദവികൾ വഹിച്ചിട്ടുണ്ട്. യു.കെ. ഭാസിയുടെ സ്മരണാർത്ഥം നൽകി വരുന്ന ഈ അവാർഡ് വരും ദിവസങ്ങളിൽ താനൂരിൽ വെച്ച് നടക്കുന്ന ചടങ്ങിൽ സമ്മാനിക്കുമെന്ന് ഫൗണ്ടേഷൻ അറിയിച്ചു. യുവജന പ്രസ്ഥാനങ്ങളിലൂടെ കടന്നുവന്ന് ദേശീയ തലത്തിൽ വരെ കോൺഗ്രസിന്റെ കരുത്തുറ്റ ശബ്ദമായി മാറിയ ചെന്നിത്തലയ്ക്കുള്ള അംഗീകാരമായാണ് ഈ പുരസ്കാരം വിലയിരുത്തപ്പെടുന്നത്.
യു.കെ. ഭാസി അനുസ്മരണവും അവാർഡ് ദാനവും 30-ന്; താനൂരിൽ വിപുലമായ സ്വാഗതസംഘം രൂപീകരിച്ചു
താനൂർ: പ്രമുഖ കോൺഗ്രസ് നേതാവായിരുന്ന യു.കെ. ഭാസിയുടെ ആറാം ചരമവാർഷിക അനുസ്മരണവും അവാർഡ് ദാന ചടങ്ങും ഈ മാസം 30-ന് താനൂരിൽ വെച്ച് നടക്കും. പരിപാടിയുടെ വിജയകരമായ നടത്തിപ്പിനായി വട്ടത്താണി സഹകരണ ബാങ്ക് ഓഡിറ്റോറിയത്തിൽ ചേർന്ന യോഗത്തിൽ വിപുലമായ സ്വാഗതസംഘം രൂപീകരിച്ചു. സ്വാഗതസംഘം രൂപീകരണ യോഗം കെ.പി.സി.സി ജനറൽ സെക്രട്ടറി പി.ടി. അജയ് മോഹനൻ ഉദ്ഘാടനം ചെയ്തു. പി. രത്നാകരൻ ചടങ്ങിൽ അധ്യക്ഷത വഹിച്ചു. ഡി.സി.സി വൈസ് പ്രസിഡന്റ് ഷാജി പാച്ചേരി, കെ. ഹൈദ്രോസ് മാസ്റ്റർ, പി. വാസുദേവൻ, എൻ.പി. ഹംസ കോയ, യാസർ പൊട്ടച്ചോല, സഹകരണ ബാങ്ക് പ്രസിഡന്റ് അഷ്റഫ് പുളിക്കൽ, പ്രവാസി കോൺഗ്രസ് ജില്ലാ പ്രസിഡന്റ് കുഞ്ഞു ഹാജി, വി.ഡി. രാധാകൃഷ്ണൻ തുടങ്ങിയവർ സംസാരിച്ചു. യോഗത്തിൽ ഒ. രാജൻ സ്വാഗതവും വൈ.പി. ലത്തീഫ് നന്ദിയും പറഞ്ഞു. പരിപാടിയുടെ സുഗമമായ നടത്തിപ്പിനായി താഴെ പറയുന്നവരെ ഭാരവാഹികളായി തെരഞ്ഞെടുത്തു:
- ചെയർമാൻ: പി.ടി. അജയ് മോഹനൻ
- ജനറൽ കൺവീനർ: ഡോ. യു.കെ. അഭിലാഷ്
- ട്രഷറർ: പന്ത്രോളി മുഹമ്മദലി
മുതിർന്ന കോൺഗ്രസ് നേതാവ് രമേശ് ചെന്നിത്തലയ്ക്കാണ് ഈ വർഷത്തെ യു.കെ. ഭാസി സ്മാരക ലീഡർ പുരസ്കാരം നൽകുന്നത്. 30-ന് നടക്കുന്ന ചടങ്ങിൽ വെച്ച് അവാർഡ് സമ്മാനിക്കും.
