ജില്ലയിലെ വാർത്തകളും അറിയിപ്പുകളും ജോലി ഒഴിവുകളും

05-12-2025

തദ്ദേശ തിരഞ്ഞെടുപ്പ്: വോട്ടിങ് യന്ത്രങ്ങൾ വരണാധികാരികൾക്ക് കൈമാറി തുടങ്ങി

മലപ്പുറം: തദ്ദേശ സ്വയംഭരണ തിരഞ്ഞെടുപ്പിനായി ആദ്യഘട്ട പരിശോധന കഴിഞ്ഞ് പ്രവര്‍ത്തന സജ്ജമായ വോട്ടിങ് യന്ത്രങ്ങൾ (ഇ.വി.എം) ജില്ലയിലെ 15 ബ്ലോക്ക് വരണാധികാരികൾക്കും 12 നഗരസഭ വരണാധികാരികൾക്കും കൈമാറി തുടങ്ങി. കളക്ടറേറ്റിലെ ഇ.വി.എം ഡിപ്പോയിൽ നിന്നാണ് വിതരണം നടക്കുന്നത്. വെള്ളിയാഴ്ചയോടെ യന്ത്രങ്ങളുടെ കൈമാറ്റം പൂര്‍ത്തിയാകും. ബുധനാഴ്ച ഏഴ് ബ്ലോക്ക് വരണാധികാരികൾക്കും വ്യാഴം കൊണ്ടോട്ടി, വണ്ടൂര്‍, കാളികാവ്, മലപ്പുറം, പെരിന്തല്‍മണ്ണ, കുറ്റിപ്പുറം, താനൂര്‍ എന്നീ ഏഴ് ബ്ലോക്ക് വരണാധികാരികൾക്കുമാണ് വിതരണം ചെയ്തത്. തിരൂര്‍ ബ്ലോക്കിലേക്കും ജില്ലയിലെ 12 നഗരസഭകളിലേക്കുമുള്ള വോട്ടിങ് യന്ത്രങ്ങള്‍ നല്‍കുന്നതോടെ വിതരണ നടപടികൾ അവസാനിക്കും. ആകെ 5600 കണ്‍ട്രോള്‍ യൂണിറ്റും 15,260 ബാലറ്റ് യൂണിറ്റുമാണ് വിതരണം ചെയ്യുന്നത്. വരണാധികാരികൾക്ക് കൈമാറുന്ന ഇ.വി.എമ്മുകൾ ജില്ലയിലെ 27 വിതരണ കേന്ദ്രങ്ങളിലെ സ്ട്രോങ് റൂമുകളിൽ അതീവ സുരക്ഷയോടെ സൂക്ഷിക്കും. വോട്ടെടുപ്പിന്റെ തലേ ദിവസമായ ഡിസംബർ 10 ന് രാവിലെ മുതൽ പോളിങ് ഉദ്യോഗസ്ഥർക്ക് ഇവിടെ നിന്ന് യന്ത്രങ്ങൾ വിതരണം ചെയ്യും.

ജല മോഷണം: ആന്റി തെഫ്റ്റ് സ്‌ക്വാഡ് രൂപീകരിച്ചു

കേരള വാട്ടര്‍ അതോറിറ്റി ജല മോഷണം തടയുന്നതിന് എടപ്പാള്‍ ഡിവിഷന് കീഴില്‍ ആന്റി തെഫ്റ്റ് സ്‌ക്വാഡ് രൂപീകരിച്ചു. ഡിവിഷനു കീഴിലുള്ള പൊന്നാനി, തിരൂര്‍, തിരൂരങ്ങാടി എന്നീ താലൂക്കുകളിലെ സ്ഥലങ്ങളില്‍ അനധികൃത ജലമോഷണം, മീറ്റര്‍ ഘടിപ്പിക്കാതെ ലൈനില്‍ നിന്ന് വെള്ളം ഉപയോഗിക്കുക, മീറ്ററിന് മുന്‍പായി പൈപ്പ് ലൈന്‍ ഘടിപ്പിച്ച് വെള്ളം ഉപയോഗിക്കുക, മീറ്ററില്‍ കൃത്രിമം കാണിക്കുക, വിച്ഛേദനം നടത്തിയിട്ടുള്ള കണക്ഷനില്‍ നിന്ന് അനധികൃതമായി വെള്ളം ഉപയോഗിക്കുക, മീറ്റര്‍ അനുമതിയില്ലാതെ മാറ്റി സ്ഥാപിക്കുകയോ തിരിച്ചു സ്ഥാപിക്കുകയോ ചെയ്യുക, മോട്ടോറോ, ഹോസോ ഉപയോഗിച്ച് ലൈനില്‍ നിന്ന് വെള്ളം നേരിട്ട് ഉപയോഗിക്കുക. ഒരു വീട്ടില്‍ നിന്ന് മറ്റ് സ്ഥലങ്ങളിലേക്ക് വെള്ളം ഉപയോഗിക്കുക, പൊതുടാപ്പില്‍ നിന്ന് വെള്ളം ദുരുപയോഗം ചെയ്യുക എന്നീ കുറ്റകൃത്യങ്ങള്‍ തടയുന്നതിന് വേണ്ടിയാണ് ആന്റി തെഫ്റ്റ് സ്‌ക്വാഡ് രൂപീകരിച്ചത്. ഇത്തരം കുറ്റകൃത്യങ്ങള്‍ പിടിക്കപ്പെട്ടാല്‍ പിഴയുള്‍പ്പടെയുള്ള ശിക്ഷാ നടപടികള്‍ സ്വീകരിക്കും. ഇത്തരം കുറ്റകൃത്യങ്ങള്‍ ശ്രദ്ധയില്‍പെട്ടാല്‍ വിവരം 0495-2371135 എന്ന ഫോണ്‍ നമ്പറിലോ അല്ലെങ്കില്‍ 1916 എന്ന കേരള വാട്ടര്‍ അതോറിറ്റി ടോള്‍ ഫ്രീ നമ്പറിലോ പൊതു ജനങ്ങള്‍ക്ക് നേരിട്ട് പരാതി അറിയിക്കാം. ഇത്തരത്തില്‍ അറിയിപ്പുകള്‍ നല്‍കുന്ന വ്യക്തികളുടെ വിവരങ്ങള്‍ രഹസ്യമായി സൂക്ഷിക്കും.

മത്സ്യക്കുഞ്ഞുങ്ങളെ നിക്ഷേപിച്ചു

ഫിഷറീസ് വകുപ്പ് നിലമ്പൂര്‍ മത്സ്യഭവന്‍ പരിധിയില്‍ വരുന്ന ഇരുപതോളം തദ്ദേശ സ്വയംഭരണ സ്ഥാപനങ്ങളിലുള്ള മത്സ്യ കര്‍ഷകര്‍ക്ക് കരിപ്പിടി, കൈതക്കോര എന്നീ മത്സ്യങ്ങളെ നല്‍കി. കുളങ്ങളിലെ അര്‍ധ ഊര്‍ജ്ജിത മത്സ്യകൃഷി, പടുതാകുളങ്ങളിലെ ഊര്‍ജിത മത്സ്യകൃഷി, റീസര്‍ക്കുലേറ്ററി അക്വാകള്‍ച്ചര്‍ സിസ്റ്റം എന്നീ യൂണിറ്റുകളില്‍ മത്സ്യകുഞ്ഞുങ്ങളെ നിക്ഷേപിച്ചു. മത്സ്യഭവന്‍ ഓഫീസര്‍ ശിഹാബുദ്ദീന്‍ മച്ചിങ്ങല്‍, പ്രമോട്ടര്‍മാരായ അഹമ്മദ് ബന്ന, ഗ്രീഷ്മ, ഷംസീര്‍, ശഫീര്‍, സസുബിയ്യ,നവാസ്,ഇക്ബാല്‍,വിനീത,ഉനൈസ,ജീനി എന്നിവര്‍ പങ്കെടുത്തു.

അസാപില്‍ ബിം മോഡലര്‍ കോഴ്സ്: പ്രവേശനം ആരംഭിച്ചു

അസാപ് കേരളയുടെ പാണ്ടിക്കാട് കമ്മ്യൂണിറ്റി സ്‌കില്‍ പാര്‍ക്കില്‍ ഡിജിറ്റല്‍ ടെക്‌നോളജി ഇന്‍ കണ്‍സ്ട്രക്ഷന്‍ ബിം മോഡലര്‍ കോഴ്സിലേക്ക് പ്രവേശനം ആരംഭിച്ചു. മെക്കാനിക്കല്‍/ഇലക്ട്രിക്കല്‍ വിഭാഗത്തില്‍ ബിരുദവും/ബിരുദാനന്തര ബിരുദവുമുള്ളവര്‍ക്ക് അപേക്ഷിക്കാം. ആറ് മാസത്തെ കാലാവധിയുള്ള ബിം-മോഡലര്‍ കോഴ്സില്‍ മൂന്നുമാസം പരിശീലനവും മൂന്ന് മാസം ഇന്റേണ്‍ഷിപ്പും ലഭിക്കും. ഇതോടൊപ്പം ബിംലാബ്‌സിന്റെ സര്‍ട്ടിഫിക്കേഷനും നിരവധി സ്‌കില്‍ ലോണ്‍ സൗകര്യങ്ങളും ലഭ്യമാണ്. ഫോണ്‍-9495999704.

പാരമ്പര്യേതര ട്രസ്റ്റി നിയമനം

മലബാര്‍ ദേവസ്വം ബോര്‍ഡിന് കീഴിലുള്ള തൃശ്ശൂര്‍ ജില്ലയിലെ ശ്രീ മമ്മിയൂര്‍ ദേവസ്വത്തില്‍ പാരമ്പര്യേതര ട്രസ്റ്റിമാരായി നിയമിക്കുന്നതിന് ഹിന്ദുമതം ആചരിക്കുന്ന ആളുകളില്‍ നിന്ന് അപേക്ഷ ക്ഷണിച്ചു. അപേക്ഷ ഫോം മലബാര്‍ ദേവസ്വം ബോര്‍ഡ് മലപ്പുറം അസിസ്റ്റന്റ് കമ്മീഷണര്‍ ഓഫീസില്‍ ലഭിക്കും. 25നും 67നും ഇടയില്‍ പ്രായമുള്ളവര്‍ക്ക് അപേക്ഷിക്കാം. അപേക്ഷകള്‍ മലബാര്‍ ദേവസ്വം ബോര്‍ഡ് കമ്മീഷണറുടെ കോഴിക്കോടുള്ള ഓഫീസില്‍ 2026 ജനുവരി ഒന്നിനുള്ളില്‍ ലഭിക്കണം. ഫോണ്‍- 0495 2367735.

ജീവകാരുണ്യ പ്രവര്‍ത്തകന് പുരസ്‌ക്കാരം നല്‍കി

മലപ്പുറം: മലപ്പുറം കേന്ദ്രമായി പ്രവര്‍ത്തിയ്ക്കുന്ന മിഥുനം പബ്ലിക്കേഷന്‍സ് ഇത്തിരി നേരത്തിന്റെ ജീവകാരുണ്യ പ്രവര്‍ത്തകനുള്ള പുരസ്‌ക്കാരം ബോബി ചെമ്മണ്ണൂരിന് കഥാകൃത്തും സംവിധായകനുമായ പ്രമോദ് മണ്ണില്‍തൊടി സമ്മാനിച്ചു .തിരൂരില്‍ ചെമ്മണ്ണൂരിന്റെ നവീകരിച്ച ഷോറൂമിലായിരുന്നു ചടങ്ങ്. നടന്‍ ശ്രീരാമന്‍ ,അനഘ ,രവി ,ഡാര്‍വിന്‍ ,നടി നവ്യാ നായര്‍ എന്നിവര്‍ പ്രസംഗിച്ചു .അരുണ്‍ സ്വാഗതവും ജോസ് നന്ദിയും പറഞ്ഞു

04-12-2025

കേരളം ഭരിക്കുന്നത് വികസന മുരടിപ്പിന് നേതൃത്വം നല്‍കിയ സര്‍ക്കാര്‍ – പി കെ കുഞ്ഞാലിക്കുട്ടി

മലപ്പുറം: കേരളം ഭരിക്കുന്നത് വികസന മുരടിപ്പിന് നേതൃത്വം നല്‍കുന്ന സര്‍ക്കാറാണെന്ന് മുസ്ലീം ലീഗ് ദേശീയ ജനറല്‍ സെക്രട്ടറി പി. കെ. കുഞ്ഞാലിക്കുട്ടി എം എല്‍ എ. കാലങ്ങളായി ഐക്യ ജനാധിപത്യമുന്നണി കേരളത്തില്‍ ഉണ്ടാക്കിയെടുത്ത വികസന പ്രവര്‍ത്തനങ്ങളെ നശിപ്പിക്കാനാണ് സര്‍ക്കാര്‍ ശ്രമിക്കുന്നത്. അധികാര വികേന്ദ്രീകരണം പൂര്‍ണ്ണാര്‍ത്ഥത്തില്‍ നടപ്പിലാക്കാന്‍ കേരളത്തില്‍ യുഡിഎഫ് നേതൃത്വം നല്‍കിയപ്പോള്‍ ഈ അധികാരത്തെ ദുര്‍ബലപ്പെടുത്താനാണ് ഇടതുപക്ഷ സര്‍ക്കാര്‍ പരിശ്രമിക്കുന്നത്. ആരോഗ്യ വിദ്യാഭ്യാസ മേഖലയില്‍ ഈ സര്‍ക്കാറിന്റെ കാലത്ത് ഒരു മേന്മയും ഉണ്ടാക്കാന്‍ കഴിഞ്ഞില്ല. ക്ഷേമ പദ്ധതികള്‍ ഒന്നോന്നായി നിര്‍ത്തിയ ഈ സര്‍ക്കാര്‍ മറു ഭാഗത്ത് ധൂര്‍ത്തു കൊള്ളയുമായി കേരളത്തെ പിറകോട്ട് വലിക്കുകയാണെന്നും അദ്ദേഹം പറഞ്ഞു. ഇതിലുള്ള പ്രതിഷേധം തദ്ദേശ സ്വയംഭരണ തെരഞ്ഞെടുപ്പില്‍ പ്രതിഫലിക്കുമെന്നും അദ്ദേഹം തുടര്‍ന്നു പറഞ്ഞു. മുസ്ലീം ലീഗ് ജില്ലാ സെക്രട്ടറി നൗഷാദ് മണ്ണിശ്ശേരി സമാപന സമ്മേളനം ഉദ്ഘാടനം ചെയ്തു.
മലപ്പുറം ജില്ലാ പഞ്ചായത്ത് ഒതുക്കുങ്ങല്‍ ഡിവിഷന്‍ യു ഡി എഫ് സ്ഥാനാര്‍ത്ഥി കെ വി മുഹമ്മദലിയുടെ തെരഞ്ഞെടുപ്പ് പര്യടനം ഒതുക്കുങ്ങല്‍ പഞ്ചായത്തില്‍ ഉദ്ഘാടനം ചെയ്യുകയായിരുന്നു അദ്ദേഹം. ചടങ്ങില്‍ യു ഡി എഫ് ചെയര്‍മാന്‍ വി യു ഖാദര്‍ അധ്യക്ഷത വഹിച്ചു. മുസ്ലീം ലീഗ് പഞ്ചായത്ത് ജനറല്‍ സെക്രട്ടറി വി എഫ് ശിഹാബ് മാസ്റ്റര്‍ സ്വാഗതം പറഞ്ഞു. ആലിപ്പ പരവക്കല്‍, ഇബ്രാഹിം കരിമ്പില്‍, ഹാരിസ് മാനു, കടമ്പോട്ട് മൂസ്സ ഹാജി, ഇ കെ മുഹമ്മദലി, പ്രമോദ് കെ നായര്‍, എ വി സിദ്ധീഖ്, റാഫി കെ പി, പൂക്കാട്ടില്‍ ഷെരീഫ്, സല്‍മാന്‍ കടമ്പോട്ട്, അഖില്‍ ആനക്കയം, ഷെരീഫ് ആറ്റുപുറത്ത്, ഉമ്മര്‍ പറവത്ത്, കെഎന്‍ ഷാനവാസ് പ്രസംഗിച്ചു.

ലോകഭിന്നശേഷി ദിനാചരണം ജില്ലാതല ഉദ്ഘാടനം നടന്നു

ലോക ഭിന്നശേഷി ദിനാചരണം മലപ്പുറം ജില്ലാതല ഉദ്ഘാടനം വെട്ടം വി.ആർ.സി ആശുപത്രിയിൽ അഡിഷണൽ ജില്ല സെഷൻസ് ജഡ്ജ് എസ്. ശ്രീജിത്ത്‌ ഉദ്ഘാടനം ചെയ്തു. മുൻ ജില്ലാ ജഡ്ജിയും വി. ആർ. സി ഹോസ്പിറ്റൽ രക്ഷാധികാരിയുമായ രമേശ് ഭായ് അധ്യക്ഷത വഹിച്ച ചടങ്ങിൽ ജില്ലാ മെഡിക്കൽ ഓഫീസർ ഡോ. ടി. കെ. ജയന്തി മുഖ്യപ്രഭാഷണം നടത്തി. ജില്ലാ എജ്യൂക്കേഷൻ മീഡിയ ഓഫീസർ കെ. പി. സാദിഖ് അലി, ഡെപ്യൂട്ടി മീഡിയ ഓഫീസർ ഡി. എസ്. വിജയകുമാർ, പാരാലീഗൽ വോളണ്ടിയർ വിമല, സീനിയർ സൈക്കാട്രിസ്റ്റ് ഡോ. കെ. എൻ. നിപുൺ, ഡോ. ഷാലിമ ഷംസുദ്ധീൻ, വി.ആർ.സി. ഹോസ്പിറ്റൽ മാനേജിങ് ഡയറക്ടർ സി.എം. മുഹമ്മദ്‌ എന്നിവർ സംസാരിച്ചു. ജില്ലാ മെഡിക്കൽ ഓഫീസ്, ജില്ലാ ലീഗൽ സർവീസസ് അതോറിറ്റി, തിരൂർ താലൂക്ക് ലീഗൽ സർവീസസ് കമ്മിറ്റി എന്നിവർ സംയുക്തമായി നടത്തിയ പരിപാടിയിൽ വിവിധ കർമ മേഖലകളിൽ പ്രാവീണ്യം തെളിയിച്ച ഭിന്നശേഷി വ്യക്തികൾക്കായി ദിവ്യംഗശ്രേഷ്ഠ പുരസ്കാരവും ഭിന്നശേഷി വ്യക്തികളുടെ പരിചരണ മികവ് മുൻനിർത്തി ദിവ്യംഗമിത്ര പുരസ്‌കാരവും നൽകി. വെട്ടം ആലിശേരി ഉപ്പൂട്ടുങ്ങൽ ജലീൽ, വെട്ടം മൂലശേരി വീട്ടിൽ സിന്ധു എന്നിവർക്കാണ് ദിവ്യംഗശ്രേഷ്ഠപുരസ്‌കാരം. തെന്നല ചെമ്പയിൽ മൊയ്തീൻകുട്ടി ദിവ്യംഗമിത്ര പുരസ്കാരത്തിന് അർഹനായി. വി.ആർ.സി. ഹോസ്പിറ്റൽ സീനിയർ ക്ലിനിക്കൽ സൈക്കോളജിസ്റ്റ് .കെ. ആർ. ബിനു, സീനിയർ സൈക്കാട്രിക് സോഷ്യൽ വർക്കർ വി. എസ്. അനിൽ എന്നിവർ വിവിധ വിഷയങ്ങളിൽ ക്ലാസ് നയിച്ചു. ഭിന്നശേഷി വിഭാഗത്തിലുള്ളവരും കുടുംബാംഗങ്ങളും ഈ മേഖലയിൽ നിന്നുള്ള വിദഗ്ധരും വിദ്യാർഥികളും സാമൂഹികപ്രവർത്തകരും പങ്കെടുത്തു.

അടക്കാക്കുണ്ടിൽ പന്നിക്കൂട്ടത്തിന്റെ വിളയാട്ടം; വിളവെടുക്കാറായ ആയിരത്തിലധികം കപ്പകൾ നശിപ്പിച്ചു

കാളികാവ്: കാട്ടുപന്നി ശല്യം രൂക്ഷമായതോടെ കർഷകർ ദുരിതത്തിൽ. കാളികാവ് അടക്കാക്കുണ്ടിൽ പന്നിക്കൂട്ടം വ്യാപകമായി കൃഷി നശിപ്പിച്ചു. അടക്കാക്കുണ്ട് പരതയിൽ സൈദിന്റെ കൃഷിയിടത്തിലാണ് പന്നിക്കൂട്ടം നാശം വിതച്ചത്. വിളവെടുപ്പിന് പാകമായ ആയിരത്തിലധികം കപ്പകളാണ് ഒറ്റരാത്രി കൊണ്ട് നശിപ്പിച്ചത്. മേഖലയിൽ വളരെക്കാലമായി കാട്ടുപന്നികളുടെ ആക്രമണം രൂക്ഷമാണ്. വൈദ്യുത വേലിയും പന്നി നിയന്ത്രിത സംവിധാനങ്ങളും സ്ഥാപിച്ചിട്ടുണ്ടെങ്കിലും ഇവയൊന്നും ഫലപ്രദമാകുന്നില്ലെന്നും പന്നിശല്യത്തിന് ശമനമില്ലെന്നും കർഷകർ പറയുന്നു. പന്നിശല്യം കാരണം യാതൊരുവിധ കൃഷിയും ചെയ്യാൻ കഴിയാത്ത സാഹചര്യമാണ് നിലവിലുള്ളത്. ഉപജീവനത്തിനായി കൃഷി ചെയ്യുന്ന പാവപ്പെട്ട കർഷകർക്ക് വൻ സാമ്പത്തിക നഷ്ടമാണ് ഇതിലൂടെ ഉണ്ടാകുന്നത്. ലക്ഷങ്ങളുടെ കൃഷിനാശം സംഭവിക്കുന്നുണ്ടെങ്കിലും കർഷകർക്ക് ഒരു രൂപ പോലും നഷ്ടപരിഹാരം ലഭിക്കാറില്ല. അധികൃതർ അടിയന്തരമായി ഇടപെട്ട് കർഷകർക്ക് മാന്യമായ നഷ്ടപരിഹാരം നൽകണമെന്ന ആവശ്യം ശക്തമായിട്ടുണ്ട്.

VIDEO LINK
https://www.facebook.com/share/v/17c63sc9bJ/

അതിഥി അധ്യാപക നിയമനം

മങ്കട ഗവ. കോളേജില്‍ ബി.ബി.എ വിഭാഗത്തിലേക്ക് അതിഥി അധ്യാപകരെ നിയമിക്കുന്നു. ബന്ധപ്പെട്ട വിഷയത്തില്‍ യുജിസി നിഷ്‌കര്‍ഷിക്കുന്ന യോഗ്യതയുള്ള (നെറ്റ്,പി.എച്ച്.ഡി), കോഴിക്കോട് കോളേജ് വിദ്യാഭ്യാസ ഉപഡയറക്ടറേറ്റില്‍ പേര് രജിസ്റ്റര്‍ ചെയ്തിട്ടുള്ള ഉദ്യോഗാര്‍ഥികള്‍ അസ്സല്‍ പ്രമാണങ്ങളുമായി ഡിസംബര്‍ എട്ടിന് രാവിലെ പത്തിന് കോളേജില്‍ നേരിട്ട് അഭിമുഖത്തിന് ഹാജരാകണം. ഫോണ്‍ – 9188900202, 8129991078.

അധ്യാപക ഒഴിവ്

ചീരങ്കടപ്പുറം ജി.എം.യു.പി. സ്‌കൂളില്‍ ഇംഗ്ലീഷ് എന്റിച്ച്‌മെന്റ് പ്രോഗ്രാമില്‍ ഒഴിവുള്ള റിസോഴ്‌സ് അധ്യാപക/അധ്യാപിക ഒഴിവിലേയ്ക്കുള്ള അഭിമുഖം ഡിസംബര്‍ ഒന്‍പതിന് രാവിലെ 10.30ന് മലപ്പുറം വിദ്യാഭ്യാസ ഉപഡയറക്ടറുടെ കാര്യാലത്തില്‍ നടക്കും. ഇംഗ്ലീഷ് ഭാഷയില്‍ ബിരുദവും, ടി.ടി.സി/ഡി.എഡ്/ഡി.എല്‍.എഡ്/ ബി.എഡ് യോഗ്യതയുള്ളവര്‍ക്ക് കൂടിക്കാഴ്ചയില്‍ പങ്കെടുക്കാം. കമ്മ്യൂണിക്കേറ്റീവ് ഇംഗ്ലീഷ് ട്രെയിനങ് കോഴ്‌സ് പാസായവര്‍ക്കും അസാപ് സ്‌കില്‍ പരിശീലനം ലഭിച്ച ഉദ്യോഗാര്‍ത്ഥികള്‍ക്കും മുന്‍ഗണനയുണ്ട്. ഫോണ്‍: 0483-2734888.

അങ്കത്തട്ടിൽ അധ്യാപക ദമ്പതികൾ; കോട്ടക്കലിൽ വോട്ട് തേടി പ്രവീൺ മാഷും സനില ടീച്ചറും

കോട്ടക്കൽ: തദ്ദേശ തിരഞ്ഞെടുപ്പിൽ ഒരു വീട്ടിൽ നിന്ന് രണ്ട് പേർ ജനവിധി തേടുന്ന അപൂർവ്വ കാഴ്ചയ്ക്കാണ് കോട്ടക്കൽ സാക്ഷ്യം വഹിക്കുന്നത്. അധ്യാപക ദമ്പതികളായ കെ. പ്രവീണും സനിലയുമാണ് ഇത്തവണ മത്സരരംഗത്തുള്ളത്. നിലവിലെ ഇടതു കൗണ്‍സിലറായ സനില ജനറല്‍ വാര്‍ഡായ കുര്‍ബ്ബാനിയില്‍ നിന്ന് തുടർച്ചയായ രണ്ടാം തവണയും ജനവിധി തേടുന്നു. കുടയാണ് ചിഹ്നം. മുസ്ലിം ലീഗിലെ വി.എം. നൗഫലാണ് ഇവിടെ യു.ഡി.എഫ് സ്ഥാനാർഥി. സി.പി.എം നേതാവും എൽ.സി. കമ്മിറ്റിയംഗവുമായ കെ. പ്രവീണ്‍ മാഷ് തൊട്ടടുത്ത തോക്കാമ്പാറ വാർഡിൽ എൽ.ഡി.എഫ് സ്ഥാനാർഥിയായി കന്നിയങ്കത്തിനിറങ്ങുന്നു. ചുറ്റിക അരിവാൾ നക്ഷത്രമാണ് ചിഹ്നം. മുസ്ലിം ലീഗ് യുവനേതാവ് കെ.എം. ഖലീലാണ് ഇവിടെ യു.ഡി.എഫ് സ്ഥാനാർഥി. മൈത്രി നഗർ വാർഡ് കൗൺസിലറായ ജയപ്രിയനാണ് ബി.ജെ.പിക്കായി രംഗത്തുള്ളത്. ഇരുവരും അധ്യാപകരാണെന്നതാണ് മറ്റൊരു പ്രത്യേകത. പ്രവീണ്‍ തോക്കാമ്പാറ എ.എൽ.പി സ്കൂളിലും സനില തൂമ്പത്ത്പ്പറമ്പ് എ.എം.എൽ.പി സ്കൂളിലുമാണ് ജോലി ചെയ്യുന്നത്. സ്കൂളിൽ നിന്ന് അവധിയെടുത്താണ് ഇരുവരും പ്രചാരണത്തിനിറങ്ങുന്നത്. രാവിലെ തന്നെ വോട്ടർമാരെ കാണാനിറങ്ങുന്ന ഇവർ പലപ്പോഴും പ്രചാരണത്തിരക്കിനിടയിൽ പുറത്തുനിന്നാണ് ഭക്ഷണം കഴിക്കുന്നത്. ഡിഗ്രി വിദ്യാർഥികളായ ഗൗരി, അനന്തു എന്നിവരാണ് മക്കൾ.

‘പൊൻമുണ്ടത്ത് കോൺഗ്രസിനെ നയിക്കുന്നത് ജമാഅത്തെ ഇസ്ലാമി’; ലീഗ് നിലപാട് വ്യക്തമാക്കണമെന്ന് ബി.ജെ.പി

മലപ്പുറം: തദ്ദേശ തിരഞ്ഞെടുപ്പിൽ ജമാഅത്തെ ഇസ്ലാമിയുമായി യു.ഡി.എഫ് ഉണ്ടാക്കിയ സഖ്യത്തിൽ മുസ്ലിം ലീഗ് നിലപാട് വ്യക്തമാക്കണമെന്ന് ബി.ജെ.പി പാലക്കാട് മേഖല ജനറൽ സെക്രട്ടറി കെ.കെ. സുരേന്ദ്രൻ ആവശ്യപ്പെട്ടു. മലപ്പുറം പ്രസ് ക്ലബ്ബിൽ വാർത്താ ലേഖകരുമായി സംസാരിക്കുകയായിരുന്നു അദ്ദേഹം. പൊൻമുണ്ടം പഞ്ചായത്തിൽ കോൺഗ്രസ് സ്വീകരിക്കുന്നത് അടവുനയമാണ്. ഇവിടെ ജമാഅത്തെ ഇസ്ലാമിയാണ് കോൺഗ്രസിനെ നയിക്കുന്നതെന്നും അദ്ദേഹം ആരോപിച്ചു. ‘വികസിത മലപ്പുറം’ എന്ന മുദ്രാവാക്യമാണ് ബി.ജെ.പി ഈ തിരഞ്ഞെടുപ്പിൽ മുന്നോട്ട് വെക്കുന്നത്. ഇത്തവണ ജില്ലയിൽ 1600 പേരാണ് ബി.ജെ.പിക്ക് വേണ്ടി മത്സര രംഗത്തുള്ളത്. ഇതിൽ 1578 പേരും താമര ചിഹ്നത്തിലാണ് ജനവിധി തേടുന്നത്. തിരഞ്ഞെടുപ്പിൽ ബി.ജെ.പി ജില്ലയിൽ വൻ മുന്നേറ്റം നടത്തുമെന്നും അദ്ദേഹം അവകാശപ്പെട്ടു. വാർത്താ സമ്മേളനത്തിൽ ബി.ജെ.പി മലപ്പുറം സെൻട്രൽ ജില്ലാ പ്രസിഡൻ്റ് പി. സുബ്രമണ്യനും പങ്കെടുത്തു.

നിങ്ങൾ വാർത്തകൾ അറിയാന്‍ WHATSAPP ഗ്രൂപ്പിൽ ജോയിൻ ചെയ്യുക
നിങ്ങൾക്കും വാർത്തകളും അറിയിപ്പുകളും അറിയിക്കാം…
E MAIL : mtnlivenews@gmail.com

03-12-2025

ഇടത് ദുര്‍ഭരണം അവസാനിപ്പിക്കാന്‍ സമയമായി – ആബിദ് ഹുസൈന്‍ തങ്ങള്‍ എം എല്‍ എ

മലപ്പുറം: ഇടത് ദുര്‍ഭരണം അവസാനിപ്പിക്കാന്‍ സമയമായി എന്ന് പ്രൊഫ. ആബിദ് ഹുസൈന്‍ തങ്ങള്‍ എം എല്‍എ പറഞ്ഞു. സമസ്ത മേഖലയിലും പരാജയപ്പെട്ട സര്‍ക്കാറാണ് കേരളം ഭരിക്കുന്നത്. വിദ്യാഭ്യാസ- ആരോഗ്യ മേഖലയുടെ തകര്‍ച്ച കേരളത്തെ അപമാനപ്പെടുത്തുകയാണെന്നും അദ്ദേഹം പറഞ്ഞു. ഗ്രാമ , ബ്ലോക്ക് , ജില്ലാ പഞ്ചായത്തുകള്‍ കൊണ്ടുവരുന്ന നൂതന പദ്ധതികളെ ഇല്ലായ്മ ചെയ്യാനാണ് സര്‍ക്കാറിന്റെ ശ്രമമമെന്നും അദ്ദേഹം പറഞ്ഞു. വികസന പ്രവര്‍ത്തനങ്ങള്‍ക്ക് സര്‍ക്കാര്‍ ഫണ്ട് നല്‍കാത്തത് തദ്ദേശ സ്വയം ഭരണങ്ങളോട് ചെയ്യുന്ന അനീതിയാണെന്നും അദ്ദേഹം കൂട്ടിചേര്‍ത്തു.
മലപ്പുറം ജില്ലാ പഞ്ചായത്ത് ഒതുക്കുങ്ങല്‍ ഡിവിഷന്‍ യുഡിഎഫ് സ്ഥാനാര്‍ത്ഥി കെ വി മുഹമ്മദലിയുടെ തെരഞ്ഞെടുപ്പ് പര്യടനം പൊന്മള പഞ്ചായത്തില്‍ ഉദ്ഘാടനം ചെയ്യുകയായിരുന്നു അദ്ദേഹം. ചടങ്ങില്‍ യു ഡി എഫ് ചെയര്‍മാന്‍ സമദ് മാണൂര്‍ അധ്യക്ഷത വഹിച്ചു. മുസ്ലീം ലീഗ് പൊന്മള പഞ്ചായത്ത് ജനറല്‍ സെക്രട്ടറി സലീം ചാപ്പനങ്ങാടി സ്വാഗതം പറഞ്ഞു. കോട്ടക്കല്‍ മണ്ഡലം യു ഡി എഫ് ചെയര്‍മാന്‍ പി. മധുസൂദനന്‍, കോട്ടക്കല്‍ മണ്ഡലം മുസ്ലീം ലീഗ് ജനറല്‍ സെക്രട്ടറി സലാം വളാഞ്ചേരി, വി എ റഹ്്മാന്‍, എം ടി കുഞ്ഞിപ്പ, വി ഇബ്രാഹിം കുട്ടി, എ കെ സൈനുദ്ദീന്‍, വി സിദ്ധീഖ്, ബ്ലോക്ക് സ്ഥാനാര്‍ത്ഥികളായ നാസര്‍ കുഞ്ഞീതു, നുസ്രത്ത് റഹ്്മാന്‍, വിവധ വാര്‍ഡുകളില്‍ മത്സരിക്കുന്ന സ്ഥാനാര്‍ത്ഥികള്‍ പങ്കെടുത്തു

മോണ്ടിസ്സോറി, പ്രീ- പ്രൈമറി ടീച്ചര്‍ ട്രെയിനിങ് കോഴ്സ്: അപേക്ഷ ക്ഷണിച്ചു

കേന്ദ്ര സര്‍ക്കാര്‍ സംരംഭമായ ബിസില്‍ ട്രെയിനിങ് ഡിവിഷന്‍ ഡിസംബര്‍ മാസം ആരംഭിക്കുന്ന രണ്ടു വര്‍ഷം, ഒരു വര്‍ഷം, ആറു മാസം ദൈര്‍ഘ്യമുള്ള മോണ്ടിസ്സോറി, പ്രീ-പ്രൈമറി, നഴ്സറി ടീച്ചര്‍ ട്രെയിനിങ് കോഴ്സുകള്‍ക്ക് ഡിഗ്രി/പ്ലസ്ടു/ എസ്.എസ്.എല്‍.സി യോഗ്യതയുള്ള വനിതകളില്‍ നിന്നും അപേക്ഷ ക്ഷണിച്ചു. ഫോണ്‍-7994449314.

ആക്സസ് 100 പദ്ധതിയുടെ ലോഗോ പ്രകാശനം ചെയ്തു

ഭിന്നശേഷിക്കാരായവർക്ക് വർഷത്തിൽ 100 ഇലക്ട്രിക് വീൽചെയർ സൗജന്യമായി നൽകുന്ന ആക്സസ് 100 പദ്ധതിയുടെ ലോഗോ പ്രകാശനം ജില്ലാ കളക്ടർ വി.ആർ. വിനോദ് നിർവഹിച്ചു. ഭിന്നശേഷിക്കാരായവരുടെ സാമൂഹിക പങ്കാളിത്തം ഉറപ്പാക്കാനായുള്ള ഈ പദ്ധതി മലപ്പുറം സിവിൽ സ്റ്റേഷൻ കേന്ദ്രമായി പ്രവർത്തിക്കുന്ന ആക്സസ് മലപ്പുറം എന്ന ചാരിറ്റബിൾ സൊസൈറ്റിയാണ് നടപ്പിലാക്കുന്നത്.

ആക്സസ് മലപ്പുറം പ്രതിനിധികളായ ജസ്‌ഫർ കോട്ടക്കുന്ന്, അബ്ദുൾ നാസർ, ബഷീർ മമ്പുറം, തോരപ്പ മുസ്തഫ, മനാഫ് മേടത്തിൽ എന്നിവർ സംബന്ധിച്ചു.

അറിയിപ്പ്

തൃക്കലങ്ങോട് 32 ല്‍ പ്രവര്‍ത്തിച്ചിരുന്ന ഇലക്ട്രിക്കല്‍ സെക്ഷന്‍ ഓഫീസ് കുതിരാടം റോഡില്‍ പുതിയ കെട്ടിടത്തിലേക്ക് പ്രവര്‍ത്തനം മാറ്റിയിട്ടുണ്ട്. നിലവിലുള്ള എല്ലാ സേവനങ്ങളും ഈ ഓഫീസില്‍ ലഭ്യമാകും.

കര്‍ഷകര്‍ക്ക് ബോധവത്ക്കരണ സെമിനാര്‍ നടത്തി

ലൈവ് സ്റ്റോക്ക് ഹെല്‍ത്ത് ആന്റ് ഡിസീസ് കണ്‍ട്രോള്‍ പ്രോഗ്രാമിന്റെ ഭാഗമായി കര്‍ഷകര്‍ക്ക് ജില്ലാതല ബോധവത്ക്കരണ സെമിനാര്‍ നടത്തി. ആതവനാട് എല്‍.എം.ടി.സി യില്‍ നടന്ന സെമിനാര്‍ ജില്ലാ മൃഗസംരക്ഷണ ഓഫീസര്‍ ഡോ. സക്കറിയ സാദിഖ് മധുരക്കറിയന്‍ ഉദ്ഘാടനം ചെയ്തു. ഡെപ്യൂട്ടി ഡയറക്ടര്‍ ഇന്‍ ചാര്‍ജ് ഡോ. യു. സലില്‍ അധ്യക്ഷത വഹിച്ചു. അസിസ്റ്റന്റ് ഡയറക്ടര്‍ ഡോ. സി. മധു, വെറ്ററിനറി സര്‍ജന്‍ ഡോ. സിന്ധു സത്യന്‍ എന്നിവര്‍ ക്ലാസുകള്‍ നയിച്ചു. ഫീല്‍ഡ് ഓഫീസര്‍ പി. ഉണ്ണികൃഷ്ണന്‍ നന്ദി പറഞ്ഞു.

02-12-2025

തദ്ദേശ തെരഞ്ഞെടുപ്പ്: പ്രചാരണ വാഹനങ്ങള്‍ മോട്ടോര്‍ വാഹന നിയമം പാലിക്കണം

തെരഞ്ഞെടുപ്പ് പ്രചാരണത്തിനായി ഉപയോഗിക്കുന്ന വാഹനങ്ങള്‍ മോട്ടോര്‍ വാഹനചട്ടങ്ങള്‍ പാലിച്ചുള്ളവയായിരിക്കണമെന്നും വാഹനത്തിന് നിയമാനുസൃതമായി വേണ്ട രേഖകളെല്ലാം ഉണ്ടായിരിക്കണമെന്ന സംസ്ഥാന തെരഞ്ഞെടുപ്പ് കമ്മീഷണറുടെ നിര്‍ദേശം പാലിക്കണമെന്ന് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കളക്ടര്‍ വി.ആര്‍. വിനോദ് അറിയിച്ചു. തെരഞ്ഞെടുപ്പ് പ്രചാരണത്തിനായി സ്ഥാനാര്‍ഥിക്ക് ഇരുചക്ര വാഹനമുള്‍പ്പെടെ ഉപയോഗിക്കാം. എന്നാല്‍ വാഹനപ്രചാരണ ചെലവ് സ്ഥാനാര്‍ത്ഥിയുടെ തെരഞ്ഞെടുപ്പ് ചെലവ് കണക്കിന്റെ പരിധിയില്‍ വരുന്നതാണ്. പ്രചാരണ വാഹനത്തിന് വരണാധികാരിയുടെ മുന്‍കൂര്‍ അനുമതി വാങ്ങണം. സ്വകാര്യ ആവശ്യങ്ങള്‍ക്കുള്ള വാഹനങ്ങളില്‍ പ്രചാരണം പാടില്ല. വരണാധികാരിയാണ് പ്രചാരണ വാഹനത്തിനുള്ള പെര്‍മിറ്റ് നല്‍കുന്നത്. വാഹനത്തിന്റെ രജിസ്ട്രേഷന്‍ സര്‍ട്ടിഫിക്കറ്റ്, ടാക്സി/ടൂറിസ്റ്റ് പെര്‍മിറ്റ്, ഡ്രൈവറുടെ ലൈസന്‍സ്, ടാക്സ് അടച്ചതിന്റെ രേഖ, ഇന്‍ഷുറന്‍സ്, പുക പരിശോധനാ സര്‍ട്ടിഫിക്കറ്റ് എന്നിവയുടെ പകര്‍പ്പുകള്‍ സഹിതം പെര്‍മിറ്റിനായി ബന്ധപ്പെട്ട വരണാധികാരിക്ക് അപേക്ഷ നല്‍കണം. വരണാധികാരി നല്‍കുന്ന ഒറിജിനല്‍ പെര്‍മിറ്റ് വാഹനത്തിന്റെ മുന്‍വശത്ത് കാണത്തക്ക വിധം പ്രദര്‍ശിപ്പിക്കണം. പെര്‍മിറ്റില്‍ വാഹനത്തിന്റെ നമ്പര്‍, സ്ഥാനാര്‍ഥിയുടെ പേര് എന്നിവ ഉണ്ടാകും. തെരഞ്ഞെടുപ്പ് പ്രചരണ വാഹനത്തിന്റെ രൂപമാറ്റം, വാഹനത്തില്‍ തിരഞ്ഞെടുപ്പ് പരസ്യം, കൊടി എന്നിവയുടെ പ്രദര്‍ശനം, വീഡിയോ പ്രചരണ വാഹനം എന്നിവയെല്ലാം മോട്ടോര്‍ വാഹന നിയമത്തിലെ വ്യവസ്ഥകള്‍ക്ക് വിധേയമായിരിക്കണം. പ്രചാരണ വാഹനങ്ങളില്‍ ഉച്ചഭാഷിണി ഘടിപ്പിക്കുന്നതിന് പൊലീസ് അധികാരിയുടെ അനുമതി വാങ്ങണം. ഇതിനായി വരണാധികാരി നല്‍കിയ വാഹന പെര്‍മിറ്റ് ഉള്‍പ്പെടെയുള്ള രേഖകളുടെ പകര്‍പ്പ് സഹിതം ബന്ധപ്പെട്ട പോലീസ് സ്റ്റേഷനില്‍ അപേക്ഷിക്കണം. വരണാധികാരിയുടേയോ പോലീസ് അധികാരിയുടേയോ പെര്‍മിറ്റ് ഇല്ലാത്ത വാഹനം പ്രചരണത്തിന് ഉപയോഗിക്കാന്‍ പാടില്ല. അത്തരം വാഹനം അനധികൃത പ്രചാരണ വാഹനമായി കണക്കാക്കി നടപടി സ്വീകരിക്കും.

എച്ച്.ഐ.വി അണുബാധക്കെതിരെ പ്രതിരോധം: വിദ്യാര്‍ത്ഥി സമൂഹം മുന്നിട്ടിറങ്ങണം- സബ് കളക്ടര്‍

സാമൂഹിക പരിവര്‍ത്തനത്തിനുള്ള വിപ്ലകരമായ ഇടപെടല്‍ നടത്തിയിട്ടുള്ള വിദ്യാര്‍ഥികളില്‍ നിന്നുതന്നെ എച്ച്.ഐ.വി അണുബാധക്കെതിരെ ജനകീയ പ്രതിരോധത്തിനുള്ള മുന്നേറ്റം ഉണ്ടാകണമെന്ന് സബ് കളക്ടര്‍ ദിലീപ് കൈനിക്കര. ലോക എയ്ഡ്സ് ദിനത്തിന്റെ ജില്ലാതല ഉദ്ഘാടനം നിര്‍വ്വഹിച്ച് സംസാരിക്കുകയായിരുന്നു അദ്ദേഹം. കുറ്റിപ്പുറം എം.ഇ.എസ് എന്‍ജിനീയറിങ് കോളേജ് ഓഡിറ്റോറിയത്തില്‍ നടന്ന പരിപാടിയില്‍ ജില്ലാ മെഡിക്കല്‍ ഓഫീസര്‍ ഡോ. ടി.കെ ജയന്തി അധ്യക്ഷത വഹിച്ചു.
പ്രിന്‍സിപ്പല്‍ ഡോ. റഹ്‌മത്തുന്നീസ സന്ദേശം കൈമാറി. ജില്ലാ എയ്ഡ്സ് നിയന്ത്രണ ഓഫീസര്‍ ഡോ. കെ.എം. നൂന മര്‍ജ മുഖ്യപ്രഭാഷണം നടത്തി. ജില്ലാ പ്രോഗ്രാം മാനേജര്‍ ഡോ. ടി.എന്‍. അനൂപ് പ്രതിജ്ഞ ചൊല്ലികൊടുത്തു. ജില്ലാ എജ്യുക്കേഷന്‍ മീഡിയ ഓഫീസര്‍ കെ.പി. സാദിഖ് അലി, പഞ്ചായത്ത് സെക്രട്ടറി ടി. അബ്ദു സലീം, ഡെപ്യൂട്ടി ജില്ലാ എഡ്യുക്കേഷന്‍ മീഡിയ ഓഫീസര്‍ ഡി.എസ്. വിജയകുമാര്‍, എന്‍.എസ്.എസ് പ്രോഗ്രാം ഓഫീസര്‍ ഡോ പി.യു. സനീഷ്, കമ്മ്യൂണിറ്റി സര്‍വൈവര്‍ കോര്‍ഡിനേറ്റര്‍ വി.കെ. ഷെരീഫ്, റെഡ്ക്രോസ് ചെയര്‍മാന്‍ എം.വി. വാസുണ്ണി, എന്‍.സി ഷാഹില, കെ.എം അഭിജിത്ത്, പി.കെ. ജീജ, രാജേഷ് പ്രശാന്തിയില്‍ എന്നിവര്‍ പ്രസംഗിച്ചു. ദിനാചരണത്തോടനുബന്ധിച്ച് ബോധവല്‍ക്കരണ സന്ദേശ റാലിയില്‍ എന്‍.എസ്.എസ് വോളണ്ടിയര്‍മാര്‍, അധ്യാപകര്‍, വിദ്യാര്‍ഥികള്‍, റെഡ്ക്രോസ് സൊസൈറ്റി അംഗങ്ങള്‍, ആരോഗ്യപ്രവര്‍ത്തകര്‍ എന്നിവര്‍ പങ്കെടുത്തു. പൊതുസമ്മേളനം റെഡ് റിബ്ബണ്‍ ക്യാംപയിന്‍, ബലൂണ്‍ പറത്തല്‍, ബോധവത്ക്കരണ ക്ലാസ്സ്, കാന്റില്‍ ലൈറ്റ് ക്യാംപയിന്‍, കളര്‍ ഹാന്‍സ് ക്യാംപയിന്‍, പോസ്റ്റര്‍ രചനാമത്സരം, ബാന്റ് മേളം എന്നിവയും നടത്തി. പോസ്റ്റര്‍ രചനാ മത്സരവിജയികള്‍ക്ക് സബ് കളക്ടര്‍ ക്യാഷ് പ്രൈസ് വിതരണം ചെയ്തു. തുടര്‍ന്ന് എന്‍.എസ്.എസ് വോളണ്ടിയര്‍മാരുടെ ഫ്ളാഷ് മോബും കുറ്റിപ്പുറം ടൗണില്‍ അരങ്ങേറി.

എസ്.ഐ.ആര്‍ 2025: സമൂഹമാധ്യമങ്ങളില്‍ വ്യാജ സന്ദേശം

ബി.എല്‍.ഒമാര്‍ വോട്ടര്‍മാരുടെ എനുമറേഷന്‍ ഫോമുകള്‍ ഡാറ്റാ എന്‍ട്രി ചെയ്യുമ്പോള്‍ ഫോണ്‍ നമ്പര്‍ ചേര്‍ക്കാതിരുന്നാല്‍ വോട്ടര്‍ പട്ടികയില്‍ നിന്ന് ഒഴിവാക്കപ്പെടുമെന്ന് പൊതു ജനങ്ങളെ തെറ്റിദ്ധരിപ്പിക്കുന്ന രീതിയില്‍ ശബ്ദ സന്ദേശം പ്രചരിക്കുന്നതായി ശ്രദ്ധയില്‍ പെട്ടിട്ടുണ്ടെന്ന് ഏറനാട് തഹസില്‍ദാര്‍ അറിയിച്ചു.
ബി.എല്‍.ഒമാര്‍ക്ക് ലഭ്യമായിരിക്കുന്ന എനുമറേഷന്‍ ഫോമുകളില്‍ നിര്‍ബന്ധമായും ചെയ്യേണ്ട ഫീല്‍ഡുകള്‍ സ്റ്റാര്‍ മാര്‍ക്ക് ചെയ്തിട്ടുണ്ട്. എന്യൂമറേഷന്‍ ഫോം വോട്ടര്‍മാര്‍ ഒരു രേഖപ്പെടുത്തലുകളും നടത്താതെ ഒപ്പിട്ട് മാത്രം നല്‍കിയാല്‍ പോലും കരട് വോട്ടര്‍ പട്ടികയില്‍ നിര്‍ബന്ധമായും ഉള്‍പ്പെടുത്തും. വോട്ടര്‍ പട്ടികയിലെ വിവരങ്ങള്‍ മാറ്റം വരുത്തുന്നതിന് വ്യവസ്ഥാപിതമായ മാര്‍ഗങ്ങള്‍ ഉണ്ട്, അതിനു വേണ്ടി ഓണ്‍ലൈനായി ഫോറം 8 ലുള്ള അപേക്ഷ നല്‍കണം. ഫോണ്‍ നമ്പര്‍ ചേര്‍ക്കാനും ഫോറം 8 ആണ് ഉപയോഗിക്കേണ്ടത്. അത് ഇപ്പോഴും ഓണ്‍ലൈനില്‍ സ്വീകരിക്കുന്നുണ്ട്. ഒരു മിനിറ്റിനുള്ളില്‍ ഫോണ്‍ നമ്പര്‍ ബന്ധിപ്പിക്കാം. തെറ്റായ സന്ദേശങ്ങള്‍ക്കെതിരെ ആവശ്യമെങ്കില്‍ നിയമ നടപടി സ്വീകരിക്കും.

അസാപിലെ ഡ്രോണ്‍ പരിശീലന കോഴ്സ്

അസാപിന്റെ കാസര്‍കോട് വിദ്യാനഗറിലുള്ള കമ്മ്യൂണിറ്റി സ്‌കില്‍ പാര്‍ക്കില്‍ നടക്കുന്ന ഡ്രോണ്‍ പരിശീലന കോഴ്സ് ഫീസിളവോടെ പഠിക്കാം. ഡിസംബര്‍ മാസത്തിലെ ബാച്ചിന് മാത്രമാണ് ഫീസിളവോടെ 35,000/ രൂപയ്ക്ക് കോഴ്സ് ചെയ്യാനാ്‌വുന്നത്. അഞ്ച് ദിവസത്തെ പരിശീലനം വിജയകരമായി പൂര്‍ത്തിയാക്കുന്നവര്‍ക്ക് ഡയറക്ടര്‍ ജനറല്‍ ഓഫ് സിവില്‍ എവിയേഷന്‍ നല്‍കുന്ന 25 കിലോഗ്രാം വരെ ഭാരമുള്ള ഡ്രോണ്‍ ഉപയോഗിക്കാനുള്ള ലൈസന്‍സ് ലഭിക്കും. ഫോണ്‍-9447326319.

ഗതാഗതം നിരോധിച്ചു

ഉദിരംപൊയില്‍ -മാളിയേക്കല്‍ റോഡില്‍ നിര്‍മാണപ്രവൃത്തികള്‍ നടക്കുന്നതിനാല്‍ നാളെ (ഡിസംബര്‍ 2) മുതല്‍ പ്രവൃത്തി തീരുന്നത് വരെ ഈ റോഡിലൂടെയുള്ള വാഹനഗതാഗതം പൂര്‍ണമായും നിരോധിച്ചു. ഉദിരംപൊയില്‍ ഭാഗത്ത് നിന്നും വരുന്ന വാഹനങ്ങള്‍, അമ്പലക്കടവ്-പള്ളിശ്ശേരി വഴിയും പനംപൊയില്‍ ഭാഗത്ത് നിന്നുള്ളവ പരിയങ്ങാട് അഞ്ചച്ചവടി വഴിയും തിരിഞ്ഞു പോകണം.

കൂണ്‍ കൃഷിയില്‍ പരിശീലനം ഡിസംബര്‍ 3 ന്

മലപ്പുറം : വെറും പത്തു മിനിറ്റുകൊണ്ട് പെല്ലറ്റ് ഉപയോഗിച്ച് കൂണ്‍ ബെഡ് തയ്യാറാക്കുന്ന നൂതന കൂണ്‍ കൃഷി പരിശീലന ക്ലാസ് ഡിസംബര്‍ 3 ന് രാവിലെ 10 മുതല്‍ മലപ്പുറം സ്വാഗത് ഓഡിറ്റോറിയത്തില്‍ നടത്തുന്നു. മൊറാര്‍ജി കള്‍ച്ചറല്‍ ഫൗണ്ടേഷന്‍ നടത്തുന്ന കോഴ്‌സില്‍ പ്രായപരിധിയില്ലാതെ ആര്‍ക്കും പങ്കെടുക്കാം. താല്‍പ്പര്യമുള്ളവര്‍ 9809279473, 9400142751 എന്നീ ഫോണ്‍ നമ്പറുകളില്‍ വിളിച്ച് രജിസ്റ്റര്‍ ചെയ്യേണ്ടതാണ്

മോട്ടോര്‍ ഡ്രൈവിംഗ് സ്‌കൂള്‍ ഓപ്പറേറ്റേഴ്‌സ് അസോസിയേഷന്‍ (ഐഎന്‍ടിയുസി) യില്‍ ചേര്‍ന്നു

മലപ്പുറം : ആള്‍ കേരള മോട്ടോര്‍ ഡ്രൈവിംഗ് സ്‌കൂള്‍ ഇന്‍സ്ട്രക്ടേഴ്‌സ് ആന്റ് വര്‍ക്കേഴ്‌സ് അസോസിയേഷന്‍ (എകെഎംഡിഎസ്) ജില്ലാ ജനറല്‍ സെക്രട്ടറി ഹനീഫ ആലിസത്തിന്റെ നേതൃത്വത്തില്‍ സംഘടന വിട്ട് മലപ്പുറം, കൊണ്ടോട്ടി താലൂക്കിലെ 50 ഓളം ഡ്രൈവിംഗ് സ്‌കൂള്‍ ഓണര്‍മാര്‍ മോട്ടോര്‍ ഡ്രൈവിംഗ് സ്‌കൂള്‍ ഓപ്പറേറ്റേഴ്‌സ് അസോസിയേഷന്‍ (ഐഎന്‍ടിയുസി) യില്‍ ചേര്‍ന്ന് പ്രവര്‍ത്തിക്കാന്‍ തീരുമാനിച്ചു. ജില്ലാ പ്രസിഡന്റ് മൂസ്സ പരന്നേക്കാട് അധ്യക്ഷത വഹിച്ചു. ഷീബ, സ്വരാജ് എന്നിവര്‍ സംസാരിച്ചു.
മലപ്പുറം, കൊണ്ടോട്ടി യൂണിറ്റുകള്‍ രൂപീകരിക്കുകയും ചെയ്തു. മലപ്പുറം യൂണിറ്റ് ഭാരവാഹികളായി സെയ്തലവി മതാരി, ഉമ്മര്‍ ഇല്ലിക്കല്‍, ഫാരിസ് പി, തുഫൈല്‍ ബംഗാളത്ത്, നിസാര്‍ ബാവ, മിസ്ഹബ് ഹനീഫ, ജാസിര്‍, സമീര്‍ എന്നിവരെയും കൊണ്ടോട്ടി യൂണിറ്റ് ഭാരവാഹികളായി അബ്ദുല്‍ ലത്തീഫ് കെ ടി, എം മൊയ്തീന്‍കുട്ടി, ഷാജഹാന്‍ ബി, ഫാരിസ് ടി, അബ്ദുല്‍ റഷീദ് സി പി , സന്തോഷ് കുമാര്‍, ഇര്‍ഷാദലി സി കെ, ഇര്‍ഷാദ് കെ ടി, സക്കീര്‍ പി, അബ്ദുറഹീം സി കെ, സവാദ് ബി എന്നിവരെയും തെരഞ്ഞെടുത്തു.

പഞ്ചായത്തുകളുടെ അധികാരം കവര്‍ന്നെടുത്തത് ഇടതു സര്‍ക്കാര്‍ പാണക്കാട് സയ്യിദ് റഷീദലി ശിഹാബ് തങ്ങള്‍

മലപ്പുറം : പഞ്ചായത്തുകളുടെ അധികാരം കവര്‍ന്നെടുത്തത് ഇടത് സര്‍ക്കാറാണെന്ന് പാണക്കാട് സയ്യിദ് റഷീദലി ശിഹാബ് തങ്ങള്‍ പറഞ്ഞു. യുഡിഎഫ് സര്‍ക്കാറിന്റെ കാലത്ത് പഞ്ചായത്തുകള്‍ക്കുണ്ടായിരുന്ന അധികാരം മെല്ലെ മെല്ലെ എടുത്തു കളയാനാണ് സിപിഎം സര്‍ക്കാര്‍ ശ്രമിച്ചത്. ജനങ്ങളുടെ ക്ഷേമ പദ്ധതികള്‍ തടഞ്ഞു വെക്കുകയും വികസനത്തിനാവശ്യമായ ഫണ്ട് നല്‍കാതെ ഗ്രാമപഞ്ചായത്തുകളെ നോക്കുകുത്തിയാക്കാനാണ് പിണറായി സര്‍ക്കാര്‍ ശ്രമിച്ചത്. അധികാര ദുര്‍വിനിയോഗം നടത്തിയും അഴിമതിയും കൊള്ളയും നടത്തി കേരളത്തെ വികസന മുരടിപ്പിലേക്ക് നയിച്ചത് എല്‍ഡിഎഫ് സര്‍ക്കാറാണെന്നും അദ്ദേഹം പറഞ്ഞു. ഇതിനെതിരെ തദ്ദേശ സ്വയംഭരണ സ്ഥാപന തെരഞ്ഞെടുപ്പില്‍ വിധിയെഴുതാന്‍ ജനം കാത്തിരിക്കുകയാണെന്നും അദ്ദേഹം പറഞ്ഞു. മലപ്പുറം ജില്ലാ പഞ്ചായത്ത് ഒതുക്കുങ്ങല്‍ ഡിവിഷന്‍ യുഡിഎഫ് സ്ഥാനാര്‍ത്ഥി കെ വി മുഹമ്മദലിയുടെ തെരഞ്ഞെടുപ്പ് പര്യടനം കോഡൂര്‍ പഞ്ചായത്തില്‍ ഉദ്ഘാടനം ചെയ്യുകയായിരുന്നു അദ്ദേഹം. ചടങ്ങില്‍ യുഡിഎഫ് ചെയര്‍മാന്‍ ടി എ റഫീഖ് അധ്യക്ഷത വഹിച്ചു. പി. ഉബൈദുളള എം എല്‍ എ മുഖ്യ പ്രഭാഷണം നടത്തി.
മണ്ഡലം മുസ്ലീം ലീഗ് ജനറല്‍ സെക്രട്ടറി പി എ സലാം, ഭാരാവാഹികളായ എ എം അബു, വി മുഹമ്മദ് കുട്ടി, എം പി മുഹമ്മദ്, പി സി വേലായുധന്‍ കുട്ടി, ഹാരിസ് ആമിയന്‍, എം ടി ബഷീര്‍, എന്‍ കുഞ്ഞീതു, എം കെ മൊഹ്്‌സിന്‍, കെ പ്രഭാകരന്‍, റെജുല പെലത്തൊടി, ഉമ്മര്‍ പറവത്ത്, നാസര്‍ കൊളക്കാട്ടില്‍, നാസര്‍ കുന്നത്ത്, വി പി ഹനീഫ, തറയില്‍ യൂസഫ്, സക്കീന പുല്‍പ്പാടന്‍, കെ എന്‍ ഷാനവാസ് സംസാരിച്ചു. കെ ടി റബീബ്, മുജീബ് ടി, സബാഹ് മാസ്റ്റര്‍, അഡ്വ. ജസീല്‍ പറമ്പന്‍, അഡ്വ. സി എച്ച് ഫസല്‍ റഹ്്മാന്‍, കെ എന്‍ എ ഹമീദ് മാസ്റ്റര്‍, നൗഫല്‍ ബാബു, കെ പി നാസര്‍, അല്ലക്കാട്ട് അബ്ദു , കെ പി ശബ്്‌ന ഷാഫി പങ്കെടുത്തു.

ജില്ലാ പഞ്ചായത്ത് ഒതുക്കുങ്ങല്‍ ഡിവിഷന്‍ യു ഡി എഫ് സ്ഥാനാര്‍ത്ഥി കെ വി മുഹമ്മദലിയുടെ തെരഞ്ഞെടുപ്പ് പര്യടനം ഇന്ന് ആരംഭിക്കും

മലപ്പുറം : ജില്ലാ പഞ്ചായത്ത് ഒതുക്കുങ്ങല്‍ ഡിവിഷന്‍ യു ഡി എഫ് സ്ഥാനാര്‍ത്ഥി കെ വി മുഹമ്മദലിയുടെ തെരഞ്ഞെടുപ്പ് പര്യടനത്തിന് ഇന്ന് കോഡൂര്‍ പഞ്ചായത്തില്‍ തുടക്കം കുറിക്കും. രാവിലെ 9 ന് വടക്കേമണ്ണയില്‍ പാണക്കാട് സയ്യിദ് റഷീദലി ശിഹാബ് തങ്ങള്‍ ഉദ്ഘാടനം ചെയ്യും. പി. ഉബൈദുള്ള എം എല്‍ എ, മുജീബ് കാടേരി, പി സി വേലായുധന്‍ കുട്ടി, പി എ സലാം എന്നിവര്‍ സംസാരിക്കും. വിവിധ കേന്ദ്രങ്ങളില്‍ പര്യടനം നടത്തി രാത്രി 8. 30 ന് മങ്ങാട്ടുപുലത്ത് സമാപിക്കും. ജില്ലാ ലീഗ് സെക്രട്ടറി ഉസ്മാന്‍ താമരത്ത് സമാപന യോഗം ഉദ്ഘാടനം ചെയ്യും.