വരിക്കോട്: ഒരുകാലത്ത് ദേശാന്തരങ്ങളിൽ ഗ്രാമത്തെ പ്രശസ്തമാക്കിയ കുമ്പളക്കൃഷിയിൽ പ്രതാപം വീണ്ടെടുക്കാനൊരുങ്ങുകയാണ് കോഡൂർ. പട്ടിണിയും അതിദാരിദ്ര്യവും നിറഞ്ഞ 1960-70 കാലത്ത് കോഡൂരിലെ കർഷകരുടെ ദുരിത ജീവിതത്തിന് അല്പമെങ്കിലും ആശ്വാസം നൽകിയിരുന്ന കാർഷികവിളയായിരുന്നു ‘കോഡൂർ കുമ്പളങ്ങ’. കടലുണ്ടിപ്പുഴയുടെ ഓരത്ത് ഹെക്ടർ കണക്കിന് വിസ്തൃതിയുള്ള കോഡൂരിലെ വയലുകളിൽ ആദ്യകാലങ്ങളിൽ ഒന്നോ, രണ്ടോ വിള നെൽക്കൃഷി കഴിഞ്ഞാൽപ്പിന്നെ മരച്ചീനിക്കൃഷിയാണ് നിറഞ്ഞു നിന്നിരുന്നത്. പിന്നീടത് പച്ചക്കറിയിലേക്ക് മാറിയതോടെ കുമ്പളങ്ങയും വെള്ളരിയും മത്തനുമെല്ലാം ഇട കലർന്ന കൃഷിയായിമാറി.
ജൈവ വളങ്ങൾ മാത്രം ഉപയോഗിച്ചുള്ള കൃഷിയിടത്തിൽ ചെറിയതോതിലെങ്കിലും നടത്തിയ രാസവള പ്രയോഗത്തോടെ കുമ്പളത്തിന്റെ ഗുണമോന്മയിലുണ്ടാക്കിയ ഇടിവും ഇടനിലക്കാരുടെ വരവും വർഷങ്ങൾ നീണ്ടുനിന്ന കയറ്റുമതിയെ നിശ്ചലമാക്കി. ഇതോടെ കർഷകരിൽ കുറച്ചു പേരെങ്കിലും പ്രവാസം സ്വീകരിക്കുകയും ചിലർ മറ്റു കൃഷികളിലേക്ക് തിരിയുകയും ചെയ്‌തതോടെ ‘കോഡൂർ കുമ്പളങ്ങ’വയലൊഴിഞ്ഞു. ഒരുകാലത്ത് ഉത്തരേന്ത്യക്കാർ ‘കോഡൂർ കുമ്പളങ്ങ’ കണ്ടറിഞ്ഞതോടെ കോഡൂരിലെ വയലുകളിൽ നെല്ലൊഴിഞ്ഞാൽ പിന്നെ കുമ്പളം മാത്രമായി മാറി. വിളവെടുപ്പ് കാലത്ത് കുമ്പളം കൊണ്ടുപോകാൻ ദിനേന പത്തിലധികം വലിയ ലോറികൾ നിരന്നു നിൽക്കുന്നത് പതിവുകാഴ്ചയുമായിരുന്നു. ഉത്തരേന്ത്യയിലെ വിഭവങ്ങളിലൊന്നായ ‘ആഗ്ര പേഡ’ നിർമിക്കുന്നതിനാണ് ‘കോഡൂർ കുമ്പളങ്ങ’ വണ്ടി കയറിയിരുന്നത്. ഒരുകുമ്പളത്തിന് ശരാശരി 15-20 കിലോ തൂക്കമുണ്ടായിരുന്നതും ജലാംശംകുറഞ്ഞ് ദൃഢതയേറിയതിനാൽ അധികനാൾ കേടുകൂടാതെ സൂക്ഷിക്കാമെന്നതും ‘കോഡൂർ കുമ്പളങ്ങ’ ആവശ്യക്കാർക്ക് പ്രിയപ്പെട്ടതായി. വർഷങ്ങൾക്ക് ശേഷം കഴിഞ്ഞ വർഷം ലഭിച്ച വിത്തുപയോഗിച്ച് കൃത്യമായ രീതിയിൽ വിളയ്ച്ചെടുത്ത ‘കോഡൂർ കുമ്പളങ്ങ’ വീണ്ടും വിത്താക്കിമാറ്റി, മുളപ്പിച്ചെടുത്ത തൈകളിലൂടെയാണ് ഒരേക്കറോളം സ്ഥലത്ത് കാർഷിക കൂട്ടായ്‌മയായ കോഡൂർ കാർഷിക കർമസേനയുടെ നേതൃത്വത്തിൽ ഇപ്പോൾ കൃഷി ചെയ്യുന്നത്.
നാടിന്റെ ഉത്സവമായി കഴിഞ്ഞ ദിവസം നടന്ന തൈ നടീൽ പഞ്ചായത്ത് പ്രസിഡൻ്റ് റാബിയ ചോലക്കൽ ഉദ്ഘാടനംചെയ്തു.
പഞ്ചായത്തംഗങ്ങളായ ഫാത്തിമ വട്ടോളി, ശിഹാബ് അരിക്കത്ത്, ജൂബി മണപ്പാട്ടിൽ, കൃഷി ഓഫീസർ അർഷദ് നാലകത്ത് ഉൾപ്പെടെയുള്ള ഉദ്യോഗസ്ഥരും കാർഷിക കൂട്ടായ്മ ഭാരവാഹികളും തൊളിലാളികളും പങ്കെടുത്തു. കോഡൂർ കുമ്പളങ്ങ’ വ്യാപകമാകുന്നതോടെ കാർഷികരംഗത്ത് പുത്തനുണർവേകുമെന്നതിനൊപ്പം ഭൗമ സൂചിക പദവിയുൾപ്പെടെ നേടിയെടുക്കുമെന്നാണ് പ്രതീക്ഷയെന്ന് കൃഷി ഓഫിസർ അർഷദ്
പറഞ്ഞു.
നിങ്ങൾ വാർത്തകൾ അറിയാന്‍ WHATSAPP ഗ്രൂപ്പിൽ ജോയിൻ ചെയ്യുക
നിങ്ങൾക്കും വാർത്തകളും അറിയിപ്പുകളും അറിയിക്കാം…
E MAIL : mtnlivenews@gmail.com