അച്ഛനമ്പലം: അക്കാദമിക ബിരുദങ്ങളുടെ ഔദ്യോഗിക തിളക്കമില്ലെങ്കിലും, കാരുണ്യവും കരുതലും കൊണ്ട് അച്ഛനമ്പലത്തുകാരുടെ മനസ്സിൽ ‘ഡോക്ടർ’ എന്ന പേര് ആഴത്തിൽ പതിപ്പിച്ച മുഹമ്മദ് കുട്ടി സാർ 45 വർഷത്തെ നീണ്ട ആതുരസേവന രംഗത്തുനിന്ന് വിരമിക്കുന്നു. നാലര പതിറ്റാണ്ടുകാലം നാട്ടിലെ സാധാരണക്കാരായ മനുഷ്യരുടെ ഏകാശ്രയമായിരുന്ന അദ്ദേഹത്തിന്റെ ക്ലിനിക്കും സൗമ്യമായ പെരുമാറ്റവും പ്രദേശവാസികൾക്ക് എന്നും വലിയൊരു ആശ്വാസമായിരുന്നു.ചെറിയ ഫീസിൽ കൃത്യമായ പരിചരണവും സാന്ത്വനവും നൽകിയിരുന്ന അദ്ദേഹം, നാടിന്റെ ആഘോഷങ്ങളിലും സന്തോഷങ്ങളിലും ദുഃഖങ്ങളിലുമെല്ലാം എപ്പോഴും ഒരു നാട്ടുകാരനായി മുൻനിരയിലുണ്ടായിരുന്നു. അച്ഛനമ്പലം അങ്ങാടിയുടെ സജീവ സാന്നിധ്യമായിരുന്ന അദ്ദേഹം ഔദ്യോഗിക തിരക്കുകളിൽ നിന്ന് മാറി ഇനി വിശ്രമജീവിതത്തിലേക്ക് കടക്കുകയാണ്.ആരോഗ്യമേഖലയിലെ നിസ്തുലവും മാതൃകാപരവുമായ സേവനത്തെ മാനിച്ച് സി.പി.ഐ.എം അച്ഛനമ്പലം ബ്രാഞ്ച് കമ്മിറ്റിയുടെ നേതൃത്വത്തിൽ മുഹമ്മദ് കുട്ടി സാറിനെ വീട്ടിലെത്തി ആദരിച്ചു. ചടങ്ങിൽ സി.പി.ഐ.എം ബ്രാഞ്ച് കമ്മിറ്റി അംഗങ്ങളായ ഷാജി പി., മുസ്തഫ ചെങ്ങപ്ര, സുൽഫിക്കർ മേക്കരുമ്പിൽ, അഭിജിത്ത് തുടങ്ങിയവർ പങ്കെടുത്തു.