Sunday, November 30News That Matters
Shadow

വേങ്ങരയിൽ പഴയകാല നാടക പ്രവർത്തകർ ഓർമ്മകൾ പങ്കുവെച്ച് ‘നാടക വര്‍ത്തമാനം’ സംഘടിപ്പിച്ചു

വേങ്ങര സാംസ്‌കാരിക വേദിയുടെ ആഭിമുഖ്യത്തില്‍ എല്ലാ വെള്ളിയാഴ്ചയും നടത്തിവരാറുള്ള സാംസ്‌കാരിക സദസ്സ് ഇത്തവണ നാടക ഓര്‍മ്മകളുടെ സംഗമവേദിയായി. ‘നാടക വര്‍ത്തമാനം’ എന്ന പേരില്‍ സംഘടിപ്പിച്ച പരിപാടിയില്‍ പഴയകാല നാടക പ്രവര്‍ത്തകരെ ഒരുമിച്ചുകൂട്ടി നടത്തിയ നാടക ചര്‍ച്ച ശ്രദ്ധേയമായി. വേങ്ങരയുടെ നാടക പാരമ്പര്യത്തിന് വെളിച്ചം വീശുന്ന അനുഭവങ്ങള്‍ സദസ്സിന് നവ്യാനുഭവമായി. പ്രശസ്തരായ പഴയകാല നാടക സംവിധായകരും രചയിതാക്കളുമായ ഗോപന്‍ തൊട്ടശ്ശേരിയറ, കെ.കെ രാമകൃഷ്ണന്‍, എം.എസ് സുബ്രഹ്‌മണ്യന്‍, മോഹനന്‍ മാസ്റ്റര്‍ എന്നിവര്‍ തങ്ങളുടെ നാടക ജീവിതത്തിലെ അനുഭവങ്ങള്‍ പങ്കുവെച്ചത് സദസ്സിനെ ഏറെ ആകര്‍ഷിച്ചു. പരിമിതമായ സൗകര്യങ്ങള്‍ക്കുള്ളില്‍ നിന്നു കൊണ്ട് നാടകങ്ങള്‍ ഒരുക്കിയതിന്റെ വെല്ലുവിളികളും അക്കാലത്തെ സാമൂഹിക പശ്ചാത്തലവും അണിയറയിലെ രസകരമായ ഓര്‍മ്മകളും അവര്‍ വിവരിച്ചു.

വേങ്ങരയിലെ നാടക പ്രസ്ഥാനത്തിന് കരുത്തുപകര്‍ന്ന പഴയകാല പ്രവര്‍ത്തകരായ നാസര്‍ കൊളക്കാട്ടില്‍, മുരളി വേങ്ങര, അസീസ് ഹാജി പക്കിയന്‍, ബാബു ചിറയില്‍, ഹംസ കൊളക്കാട്ടില്‍, മീരാന്‍ വേങ്ങര, മുജീബ് റഹ്‌മാന്‍ തുപ്പിലിക്കാട്ട്, കമറുദ്ദീന്‍ പുല്ലാമ്പലവന്‍, ഹബീബ് പൈക്കാടന്‍ എന്നിവരും തങ്ങളുടെ ഓര്‍മ്മകള്‍ പങ്കുവെച്ചു. പഴയ തലമുറയുടെ അനുഭവങ്ങള്‍ക്കൊപ്പം, പുതിയ കാലത്തെ ദൃശ്യമാധ്യമ രംഗത്തെ പ്രതിനിധീകരിച്ച് ടെലിഫിലിം പ്രവര്‍ത്തകനായ ചുഴലിയും സംസാരിച്ചു. നാടകകലയുടെ സുവര്‍ണ്ണ കാലഘട്ടത്തെക്കുറിച്ചുള്ള ഓര്‍മ്മപ്പെടുത്തലും പുതിയ തലമുറയ്ക്ക് പ്രചോദനവുമാകുന്നതായിരുന്നു ‘നാടക വര്‍ത്തമാനം’ എന്ന ഈ ഒത്തുചേരല്‍. കാര്‍ട്ടൂണ്‍ സംവിധായകനും നടനുമായ നിസാര്‍ വേങ്ങരയാണ് ചര്‍ച്ചകള്‍ നിയന്ത്രിച്ചത്. പഴയകാല കലാകാരന്മാരെ അനുസ്മരിക്കുന്നതിനും അവരുടെ സംഭാവനകളെ അംഗീകരിക്കുന്നതിനും പരിപാടി വേദിയൊരുക്കി. സമീപ ഭാവിയില്‍ ഒരുമാസം നീണ്ടുനില്‍ക്കുന്ന നാടകോത്സവം നടത്തുന്നതിനെ കുറിച്ചുള്ള ചര്‍ച്ചകളിലേക്ക് ശ്രദ്ധക്ഷണിച്ചു.

നിങ്ങൾ വാർത്തകൾ അറിയാന്‍ WHATSAPP ഗ്രൂപ്പിൽ ജോയിൻ ചെയ്യുക ഇവിടെ click ചെയ്യുക

E MAIL : mtnlivenews@gmail.com
WEB SITE 🖱️ www.mtnnewschannel.com

Leave a Reply

Your email address will not be published. Required fields are marked *

MTN NEWS CHANNEL