30-11-2025
തദ്ദേശ തെരഞ്ഞെടുപ്പ്- നഗരസഭകളിലെ വോട്ടര്‍മാര്‍ 6,27,559.
തദ്ദേശ തെരഞ്ഞെടുപ്പില്‍ ജില്ലയിലെ 12 നഗരസഭകളിലായി ആകെയുള്ളത് 6,27,559 വോട്ടര്‍മാര്‍. ഇതില്‍ പുരുഷന്‍മാര്‍ 30,14,32ഉം സ്ത്രീകള്‍ 326112ഉം ആണ്. ട്രാന്‍സ്ജെന്‍ഡര്‍ വോട്ടര്‍മാരായി 15 പേരുമുണ്ട്. ഏറ്റവും കൂടുതല്‍ വോട്ടര്‍മാരുള്ളത് മഞ്ചേരി നഗരസഭയിലാണ് ഇവിടെ 82,902 വോട്ടര്‍മാരാണുള്ളത്. ഇതില്‍ 40314 പുരുഷന്‍മാരും 42587 സ്ത്രീകളും ഒരു ട്രാന്‍സ് ജെന്‍ഡറും ഉള്‍പ്പെടെയാണിത്. ഏറ്റവും കുറവ് വോട്ടര്‍മാരുള്ളത് വളാഞ്ചേരി നഗരസഭയിലാണ് ഇവിടെ 34177 വോട്ടര്‍മാരാണുള്ളത്. ഇതില്‍ 16463 പേര്‍ പുരുഷന്‍മാരും 17713 സ്ത്രീകളുമാണ്. ഒരു ട്രാന്‍സ്ജെന്‍ഡര്‍ വോട്ടറുമുണ്ട്. വോട്ടര്‍മാരുടെ എണ്ണത്തില്‍ രണ്ടാമതുള്ള പൊന്നാനി നഗരസഭയില്‍ 70642 വോട്ടര്‍മാരും (32690 പുരുഷന്‍മാരും 37952 സ്ത്രീകളും) മൂന്നാമതുള്ള പരപ്പനങ്ങാടിയില്‍ 58709 (28665 പുരുഷന്‍മാരും, 30042 സ്ത്രീകള്‍, 2 ട്രാന്‍സ് ജെന്‍ഡര്‍) വോട്ടര്‍മാരുമുണ്ട്. 10 പേരുള്ള തിരൂര്‍ നഗരസഭയാണ് ഏറ്റവും കൂടുതല്‍ ട്രാന്‍സജെന്‍ഡര്‍ വോട്ടര്‍മാരുള്ള നഗരസഭ. പരപ്പനങ്ങാടി നഗരസഭയില്‍ 2 ട്രാന്‍സ് ജെന്‍ഡര്‍ വോട്ടര്‍മാരും പെരിന്തല്‍മണ്ണ, മഞ്ചേരി, വളാഞ്ചേരി നഗരസഭകളില്‍ ഓരോ ട്രാന്‍സ്ജെന്‍ഡര്‍ വോട്ടര്‍മാരുമുണ്ട്. പൊന്നാനി, മലപ്പുറം, കോട്ടക്കല്‍, നിലമ്പൂര്‍, താനൂര്‍, തിരൂരങ്ങാടി, കൊണ്ടോട്ടി എന്നീ നഗരസഭകളില്‍ ട്രാന്‍സ്ജെന്‍ഡര്‍ വോട്ടര്‍മാരില്ല. ജില്ലയിലെ മറ്റു നഗരസഭകളിലെ ആകെ വോട്ടര്‍മാരുടെ എണ്ണം തിരൂര്‍ നഗരസഭ-46643(പുരുഷന്‍മാര്‍ 21893, സ്ത്രീകള്‍ 24740, ട്രാന്‍സ്ജെന്‍ഡര്‍ 10), പെരിന്തല്‍മണ്ണ നഗരസഭ-46139 (പുരുഷന്‍മാര്‍ 21736, സ്ത്രീകള്‍ 24402, ട്രാന്‍സ് ജെന്‍ഡര്‍ 1), മലപ്പുറം നഗരസഭ-57728(പുരുഷന്‍മാര്‍ 27981, സ്ത്രീകള്‍ 29747), കോട്ടക്കല്‍ നഗരസഭ-40526 (പുരുഷന്‍മാര്‍ 19269, സ്ത്രീകള്‍ 21257), നിലമ്പൂര്‍ നഗരസഭ -38496(പുരുഷന്‍മാര്‍ 18147, സ്ത്രീകള്‍ 20349),താനൂര്‍ നഗരസഭ-52891(പുരുഷന്‍മാര്‍ 26047, സ്ത്രീകള്‍ 26844), തിരൂരങ്ങാടി നഗരസഭ- 46980(പുരുഷന്‍മാര്‍ 23086, സ്ത്രീകള്‍ 23894), കൊണ്ടോട്ടി നഗരസഭ-51726 (പുരുഷന്‍മാര്‍ 25141, സ്ത്രീകള്‍ 26585).
തദ്ദേശ തെരഞ്ഞെടുപ്പ്: അച്ചടിശാലാ ഉടമസ്ഥര്‍ മാര്‍ഗ്ഗനിര്‍ദ്ദേശങ്ങള്‍ പാലിക്കണം.
തെരഞ്ഞെടുപ്പ് പ്രകടനപത്രിക ഉള്‍പ്പെടെ ലഘുലേഖകളും പോസ്റ്ററുകളും അച്ചടിക്കുന്നതും പ്രസിദ്ധപ്പെടുത്തുന്നതും സംബന്ധിച്ച് തെരഞ്ഞെടുപ്പില്‍ മത്സരിക്കുന്ന രാഷ്ട്രീയ പാര്‍ട്ടികള്‍ക്കും സ്ഥാനാര്‍ഥികള്‍ക്കും അച്ചടിശാല ഉടമസ്ഥര്‍ക്കുമായി സംസ്ഥാന തെരഞ്ഞെടുപ്പ് കമ്മീഷന്‍ പുറത്തിറക്കിയ മാര്‍ഗ്ഗനിര്‍ദ്ദേശങ്ങള്‍ കര്‍ശനമായി പാലിക്കണമെന്ന് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കളക്ടര്‍ വി.ആര്‍. വിനോദ് നിര്‍ദേശിച്ചു. 1994ലെ കേരള പഞ്ചായത്ത് രാജ് ആക്ടിലെ 124 വകുപ്പിലെയും കേരള മുന്‍സിപ്പാലിറ്റി ആക്ട് 148 വകുപ്പിലെയും വ്യവസ്ഥകളാണ് പാലിക്കേണ്ടത്. ലഘുലേഖകളിലും പോസ്റ്ററുകളിലും അത് അച്ചടിക്കുന്ന ആളിന്റെയും പ്രസാധകന്റെയും പേരും മേല്‍വിലാസവും കോപ്പികളുടെ എണ്ണവും ഉണ്ടായിരിക്കണം. അച്ചടിക്കുന്നതിന് മുന്‍പായി പ്രസാധകനെ തിരിച്ചറിയുന്നതിന് രണ്ടാളുകള്‍ സാക്ഷ്യപ്പെടുത്തിയ നിശ്ചിത ഫോറത്തിലുള്ള പ്രഖ്യാപനം അച്ചടിക്കുന്ന ആളിന് നല്‍കുകയും,അച്ചടിച്ച ശേഷം പ്രഖ്യാപനത്തോടൊപ്പം രേഖയുടെ പകര്‍പ്പ് സഹിതം പ്രസുടമ നിശ്ചിത ഫോറത്തില്‍ ജില്ലാ തെരഞ്ഞെടുപ്പ് ഉദ്യോഗസ്ഥന് നല്‍കണം. ഈ നിയമം ലംഘിച്ചാല്‍ ആറുമാസത്തോളം തടവ് ശിക്ഷയോ 2000 രൂപ വരെ പിഴയോ അല്ലെങ്കില്‍ രണ്ടും കൂടിയോ നല്‍കി ശിക്ഷിക്കപ്പെടാവുന്ന കുറ്റമാണ്. കൂടാതെ തെരഞ്ഞെടുപ്പ് പരസ്യ ബോര്‍ഡുകള്‍, ബാനറുകള്‍ എന്നിവ സ്ഥാപിച്ചിട്ടുള്ളതും ഉയര്‍ത്തിയിട്ടുള്ളതും സംബന്ധിച്ച വിവരം ബന്ധപ്പെട്ടവര്‍ വരണാധികാരിയെ നിശ്ചിത ഫോറത്തില്‍ അറിയിക്കണം.
ആന്റിബയോട്ടിക് സാക്ഷരതാ ബോധവല്‍ക്കരണത്തിന് തുടക്കമായി.
ആന്റിബയോട്ടിക് മരുന്നുകളുടെ അശാസ്ത്രീമായ ഉപയോഗം ഇല്ലാതാക്കുന്നതിന് വേണ്ടി മരുന്നുഷോപ്പ് ജീവനക്കാര്‍ക്കും ഉപഭോക്താക്കള്‍ക്കും മെഡിക്കല്‍ ഷോപ്പുകള്‍ സന്ദര്‍ശിച്ചുള്ള ബോധവത്ക്കരണത്തിന് ആരോഗ്യവകുപ്പ് തുടക്കംകുറിച്ചു. സംസ്ഥാന ആരോഗ്യ-കുടുംബക്ഷേമ വകുപ്പിന്റെ ആഭിമുഖ്യത്തില്‍ കേരളത്തെ സമ്പൂര്‍ണ്ണ ആന്റിബയോട്ടിക് സാക്ഷര സംസ്ഥാനമാക്കുന്ന പരിപാടിയുടെ ഭാഗമായാണ് പരിപാടി സംഘടിപ്പിച്ചത്.
ആന്റിബയോട്ടിക്കുകളുടെ അമിതവും അശാസ്ത്രിയവുമായ ഉപയോഗം, രോഗകാരികളായ സൂക്ഷ്മാണുക്കള്‍ പ്രതിരോധശേഷി നേടുന്ന ആന്റി മൈക്രോബിയല്‍ റസിസ്റ്റന്‍സ് എന്ന അവസ്ഥയ്ക്ക് കാരണമാകും. അനാവശ്യമായി ആന്റിബയോട്ടിക്കുകള്‍ നിര്‍ദ്ദേശിക്കുക, ഇവയുടെ അമിതവും അനിയന്ത്രിതവുമായ ഉപയോഗം, ആന്റിബയോട്ടിക്കുകളുടെ കോഴ്സ് പൂര്‍ത്തിയാക്കാതിരിക്കുക, ഡോക്ടര്‍മാരുടെ കുറിപ്പടിയില്ലാതെ ആന്റിബയോട്ടിക്കുകളുടെ സ്വയം ഉപയോഗം, മൃഗങ്ങള്‍ക്കുള്ള ആന്റിബയോട്ടിക്കുകളുടെ അമിത ഉപയോഗം, ആന്റിബയോട്ടിക്കുകള്‍ അലക്ഷ്യമായി വലിച്ചെറിയുക തുടങ്ങിയവയെക്കുറിച്ച് ബോധവത്ക്കരണം നടത്തിയത്. ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ.എ.ഷിബുലാല്‍, ജൂനിയര്‍ അഡ്മിനിസ്ട്രേറ്റീവ് മെഡിക്കല്‍ ഓഫീസര്‍ ഡോ.മാത്യു ജെ.വാളംപറമ്പില്‍, ജില്ലാ എഡ്യുക്കേഷന്‍ മീഡിയ ഓഫീസര്‍ കെ.പി സാദിഖ് അലി, ഡെപ്യൂട്ടി ജില്ലാ എഡ്യുക്കേഷന്‍ മീഡിയ ഓഫീസര്‍ ഡി.എസ് വിജയകുമാര്‍ എന്നിവരടങ്ങുന്ന ജില്ലാ സംഘമാണ് പരിപാടിക്ക് നേതൃത്വം നല്‍കിയത്. മലപ്പുറം നഗരസഭാ പ്രദേശത്തെ മെഡിക്കല്‍ ഷോപ്പുകള്‍ കേന്ദ്രീകരിച്ചാണ് ബോധവത്ക്കരണം നടത്തിയത്. ആന്റിബയോട്ടിക്കുകളുടെ ഉപയോഗത്തില്‍ പൊതുജനം ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ ഡോ ടി.കെ. ജയന്തി നിര്‍ദ്ദേശിച്ചു.
അശ്വമേധം: ജില്ലാതല പരിശീലനം നടത്തി
കുഷ്ഠരോഗ നിര്‍മാര്‍ജന പരിപാടിയുടെ ഭാഗമായി ആരോഗ്യവകുപ്പ് നടപ്പിലാക്കുന്ന അശ്വമേധം-സമഗ്ര കുഷ്ഠരോഗ നിര്‍ണയ ക്യാംപയിനിന്റെ ജില്ലാതല പരിശീലനം നടത്തി. ജില്ലാ ആസൂത്രണ സമിതി കോണ്‍ഫ്രന്‍സ് ഹാളില്‍ ജില്ലാ മെഡിക്കല്‍ ഓഫീസര്‍ ഡോ.ടി.കെ. ജയന്തി പരിപാടി ഉദ്ഘാടനം ചെയ്തു. ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ. എ. ഷിബുലാല്‍ അധ്യക്ഷനായി.അസിസ്റ്റന്റ് ലെപ്രസി ഓഫീസര്‍ പി. രാജന്‍ ഡെപ്യൂട്ടി ജില്ലാ എജ്യൂക്കേഷന്‍ മീഡിയ ഓഫീസര്‍മാരായ വിന്‍സന്റ് സിറില്‍, ഡി.എസ്. വിജയകുമാര്‍, ജൂനിയര്‍ ഹെല്‍ത്ത് ഇന്സ്പെക്ടര് സെന്തില്‍ കുമാര്‍ എന്നിവര്‍ പരിശീലന പരിപാടിക്ക് നേതൃത്വം നല്‍കി. ഫീല്‍ഡു തല ആരോഗ്യ സൂപ്പര്‍വൈസര്‍മാരും ആരോഗ്യപ്രവര്‍ത്തകരും അടക്കം നൂറോളം പേര്‍ പരിശീലന പരിപാടിയില്‍ പങ്കെടുത്തു.
കൂണ്‍ കൃഷിയില്‍ പരിശീലനം ഡിസംബര്‍ 3 ന്.
മലപ്പുറം : വെറും പത്തു മിനിറ്റുകൊണ്ട് പെല്ലറ്റ് ഉപയോഗിച്ച് കൂണ്‍ ബെഡ് തയ്യാറാക്കുന്ന നൂതന കൂണ്‍ കൃഷി പരിശീലന ക്ലാസ് ഡിസംബര്‍ 3 ന് രാവിലെ 10 മുതല്‍ മലപ്പുറം സ്വാഗത് ഓഡിറ്റോറിയത്തില്‍ നടത്തുന്നു. മൊറാര്‍ജി കള്‍ച്ചറല്‍ ഫൗണ്ടേഷന്‍ നടത്തുന്ന കോഴ്‌സില്‍ പ്രായപരിധിയില്ലാതെ ആര്‍ക്കും പങ്കെടുക്കാം. താല്‍പ്പര്യമുള്ളവര്‍ 9809279473, 9400142751 എന്നീ ഫോണ്‍ നമ്പറുകളില്‍ വിളിച്ച് രജിസ്റ്റര്‍ ചെയ്യേണ്ടതാണ്.
യുക്തിവാദി സംഘം മലപ്പുറം ജില്ലാ പ്രതിനിധി സമ്മേളനം മലപ്പുറത്ത്.
മലപ്പുറം :കേരള യുക്തിവാദി സംഘം മലപ്പുറം ജില്ലാ പ്രതിനിധി സമ്മേളനം മലപ്പുറത്ത് യു.കലാനാഥന്‍ മാസ്റ്റര്‍ ഹാളില്‍ നടന്നു. ജില്ലാ ജോയിന്റ് സെക്രട്ടറി സദാശിവന്‍ സ്വാഗതം പറഞ്ഞു. ജില്ലാ പ്രസിഡന്റ് ഭാസ്‌ക്കരന്‍ അറവങ്കര അദ്ധ്യക്ഷത വഹിച്ചു. സംസ്ഥാന സെക്രട്ടറി ശബരി ഗിരീഷ് ഉദ്ഘാടനം ചെയ്തു. ജില്ലാസെക്രട്ടറി ഭഗവന്‍ ദാസ് വാര്‍ഷിക റിപ്പോര്‍ട്ട് അവതരിപ്പിച്ചു. ദീര്‍ഘമായ ചര്‍ച്ചക്ക് ശേഷം ഭാരവാഹികളായി പഴയ കമ്മറ്റിയെ നിലനിര്‍ത്താന്‍ തീരുമാനിച്ചു.
29-11-2025
സര്‍ട്ടിഫിക്കറ്റ് കോഴ്‌സിന് അപേക്ഷ ക്ഷണിച്ചു.
എസ്.ആര്‍.സി കമ്മ്യൂണിറ്റി കോളേജ് മാനേജ്‌മെന്റ് ഓഫ് സ്‌പെസിഫിക് ലേണിംഗ് ഡിസോഡേഴ്സ് വിഷയത്തില്‍ നടത്തുന്ന സര്‍ട്ടിഫിക്കറ്റ് കോഴ്‌സിന്റെ 2026 ജനുവരി ബാച്ചിലേക്ക് ഓണ്‍ലൈനായി അപേക്ഷ ക്ഷണിച്ചു. ആറുമാസം ദൈര്‍ഘ്യമുള്ള കോഴ്സ് വിദൂര വിദ്യാഭ്യാസ രീതിയിലാണ് നടത്തുന്നത്. പന്ത്രണ്ടാം ക്ലാസ് യോഗ്യതയുള്ളവര്‍ക്ക് https://app.srccc.in/register എന്ന ലിങ്ക് വഴി ഓണ്‍ലൈനായി അപേക്ഷിക്കാം. പ്രായപരിധിയില്ല. സ്‌കൂള്‍ അധ്യാപകര്‍, സ്‌പെഷ്യല്‍ എഡ്യുക്കേറ്റര്‍മാര്‍, സൈക്കോളജിസ്റ്റ്, എഡ്യുക്കേഷണല്‍ തെറാപ്പിസ്റ്റ് എന്നിവര്‍ക്ക് മുന്‍ഗണനയുണ്ട്. അപേക്ഷ ലഭിക്കേണ്ട അവസാന തിയതി ഡിസംബര്‍ 31. മലപ്പുറം ജില്ലയിലെ പഠനകേന്ദ്രം – ക്യാംപ് ഗൈഡന്‍സ് ആന്‍ഡ് കൗണ്‍സിലിങ് സെന്റര്‍, അപ് ഹില്‍, മഹിള സമാജം കെട്ടിടം, പെട്രോള്‍ പമ്പിന് സമീപം, മലപ്പുറം -676505. ഫോണ്‍ : 9447808822, 9946801429.
‘മുയല്‍ വളര്‍ത്തല്‍’ പരിശീലനം
ആതവനാട് മൃഗസംരക്ഷണ പരിശീലന കേന്ദ്രത്തില്‍ ഡിസംബര്‍ നാലിന് രാവിലെ 10 മുതല്‍ ‘മുയല്‍ വളര്‍ത്തല്‍’ എന്ന വിഷയത്തില്‍ ഏകദിന പരിശീലനം നടത്തുന്നു. താത്പര്യമുള്ളവര്‍ 0494 2962296 ല്‍ വിളിച്ച് രജിസ്ട്രേഷന്‍ നടത്തണം.
ഗതാഗത നിയന്ത്രണം.
മലപ്പുറം ജില്ലയിലെ തൂത വെട്ടത്തൂര്‍ റോഡില്‍ കരിങ്കല്ലത്താണി മുതല്‍ വെട്ടത്തൂര്‍ കുളപ്പറമ്പ് വരെ ടാറിങ് പ്രവൃത്തി നാളെ മുതല്‍ (നവംബര്‍ 29) ആരംഭിക്കുന്നതിനാല്‍ ഈ റോഡിലൂടെയുള്ള വാഹന ഗതാഗതം പ്രവൃത്തി പൂര്‍ത്തിയാകുന്നത് വരെ പൂര്‍ണമായും നിരോധിച്ചു. ആയതിനാല്‍ പെരിന്തല്‍മണ്ണ ഭാഗത്ത് നിന്ന് വെട്ടത്തൂര്‍, കുളപ്പറമ്പ് പോകുന്ന വാഹനങ്ങള്‍ പട്ടിക്കാട്/മേലാറ്റൂര്‍ വഴിയും, മണ്ണാര്‍ക്കാട് ഭാഗത്ത് നിന്ന് വെട്ടത്തൂര്‍, കുളപ്പറമ്പ് പോകുന്ന വാഹനങ്ങള്‍ ചുങ്കം അലനല്ലൂര്‍ വഴിയും തിരിഞ്ഞ് പോകണം.
തദ്ദേശ തെരഞ്ഞെടുപ്പ്: കൊണ്ടോട്ടി ബ്ലോക്കിലെ യോഗം (ശനി)
തദ്ദേശ തെരഞ്ഞെടുപ്പുമായി ബന്ധപ്പെട്ട് ജില്ലയില്‍ തെരഞ്ഞെടുപ്പ് ചെലവ് നിരീക്ഷകരുടെ സാന്നിധ്യത്തില്‍ കൊണ്ടോട്ടി ബ്ലോക്ക് പഞ്ചായത്തിലെയും അതിന് കീഴിലുള്ള ഗ്രാമപഞ്ചായത്തുകളിലെയും വരണാധികാരികള്‍, ഉപവരണാധികാരി, സ്ഥാനാര്‍ഥികള്‍ എന്നിവരുടെ സംയുക്ത യോഗം (ശനി) രാവിലെ 10.30 ന് പുളിക്കല്‍ പി.വി.സി ഓഡിറ്റോറിയത്തില്‍ നടക്കും.
പി.എസ്.സി അഭിമുഖം
ജില്ലയില്‍ തദ്ദേശ സ്വയംഭരണ വകുപ്പില്‍ പബ്ലിക് ഹെല്‍ത്ത് ഇന്സ്പെക്ടര് ഗ്രേഡ് II (കാറ്റഗറി നം. 611/2024) തസ്തികയിലേക്കുള്ള അഭിമുഖം ഡിസംബര്‍ 3, 4, 5 തീയതികളില്‍ മലപ്പുറം പബ്ലിക് സര്‍വ്വീസ് കമ്മീഷന്റ ജില്ലാ ഓഫീസിലും ഡിസംബര്‍ 17,18,19 തീയതികളില്‍ കോഴിക്കോട് ജില്ലാ ഓഫീസിലും നടക്കും. അര്‍ഹരായ ഉദ്യോഗാര്‍ഥികള്‍ക്ക് എസ്.എം.എസ്, പ്രൊഫൈല്‍ എന്നിവ വഴി അറിയിപ്പ് നല്‍കിയിട്ടുണ്ട്. ഉദ്യോഗാര്‍ഥികള്‍ തങ്ങളുടെ പ്രൊഫൈലില്‍ ലഭ്യമാക്കിയിട്ടുള്ള ഇന്റര്‍വ്യൂ മെമ്മൊ ഡൗണ്‍ലോഡ് ചെയ്ത് നിര്‍ദ്ദേശിച്ച പ്രകാരമുള്ള പ്രമാണങ്ങളുടെ അസ്സല്‍ സഹിതം നിശ്ചിത ദിവസം അഭിമുഖത്തിന് ഹാജരാകണം.
ഇടതുപക്ഷ സ്ഥാനാര്‍ത്ഥികളെ വിജയിപ്പിക്കണം -ആര്‍ എസ്പി (എല്‍)
മലപ്പുറം : ഇടതുപക്ഷ സ്ഥാനാര്‍ത്ഥികളെ വിജയിപ്പിക്കണമെന്ന് ആര്‍ എസ് പി (എല്‍) മലപ്പുറം ജില്ലാ കമ്മിറ്റി യോഗം ആവശ്യപ്പെട്ടു. ഇടതുപക്ഷ ജനാധിപത്യ മുന്നണി നടത്തിയ ക്ഷേമ പെന്‍ഷനും, വികസന പ്രവര്‍ത്തനങ്ങളും ജനങ്ങള്‍ക്കു മുന്നിലെത്തിക്കാന്‍ പ്രവര്‍ത്തകര്‍ ശ്രമം നടത്തണമെന്നും യോഗം ആവശ്യപ്പെട്ടു. നിരവധി വികസന പ്രവര്‍ത്തനങ്ങള്‍ നടത്തിയ ഇടതു സര്‍ക്കാറിന് അനുകൂലമായി തദ്ദേശ സ്വയംഭരണ തെരഞ്ഞെടുപ്പില്‍ ഇടതു സ്ഥാനാര്‍ത്ഥികളെ വിജയിപ്പിക്കാന്‍ ആവശ്യമായ പ്രവര്‍ത്തനങ്ങള്‍ക്ക് യോഗം രൂപം നല്‍കി. ജില്ലാ കമ്മിറ്റിയുടെ നേതൃത്വത്തില്‍ ജില്ലയില്‍ മുഴുവന്‍ പര്യടനം തെരഞ്ഞെടുപ്പ് പര്യടനം നടത്തുവാനും യോഗത്തില്‍ തീരുമാനമായി. ജില്ലാ സെക്രട്ടറി പി എച്ച് ഫൈസല്‍ അധ്യക്ഷത വഹിച്ചു.അബ്ദുറഹിമാന്‍ മുള്ളേങ്ങല്‍, സുധീഷ് ഗാന്ധിക്കുന്ന്, മുസ്തഫ തിരൂരങ്ങാടി, പി പ്രജേഷ് , പി. കെ. ബാവ , ഫത്താഹ് തങ്ങള്‍, റാഫി ചെങ്ങാനി, സിദ്ധീഖ് മൊല്ലപ്പടി എന്നിവര്‍ പ്രസംഗിച്ചു.
പി.എസ്.സി അഭിമുഖം
ജില്ലയിലെ തദ്ദേശ സ്വയംഭരണ വകുപ്പില്‍ ലൈബ്രേറിയന്‍ ഗ്രേഡ് IV & കള്‍ച്ചറല്‍ അസിസ്റ്റന്റ് (കാറ്റഗറി നമ്പര്‍ 742/2024) തസ്തികയിലേക്കുള്ള അഭിമുഖം ഡിസംബര്‍ 18, 19 തീയതികളില്‍ കേരള പബ്ലിക് സര്‍വ്വീസ് കമ്മീഷന്റ മലപ്പുറം ജില്ലാ ഓഫീസില്‍ നടക്കും. അര്‍ഹരായ ഉദ്യോഗാര്‍ഥികള്‍ക്ക് എസ്.എം.എസ്, പ്രൊഫൈല്‍ എന്നിവ വഴി അറിയിപ്പ് നല്‍കിയിട്ടുണ്ട്. ഉദ്യോഗാര്‍ത്ഥികള്‍ പ്രൊഫൈലില്‍ ലഭ്യമാക്കിയിട്ടുള്ള ഇന്റര്‍വ്യൂ മെമ്മോ ഡൗണ്‍ലോഡ് ചെയ്ത് നിര്‍ദ്ദേശിച്ച പ്രകാരമുള്ള പ്രമാണങ്ങളുടെ അസ്സല്‍ സഹിതം നിശ്ചിത ദിവസം അഭിമുഖത്തിന് ഹാജരാകണം.
ഹരിതവിദ്യാലയം 4.0′: വിദ്യാഭ്യാസ റിയാലിറ്റി ഷോയില്‍ തിളങ്ങി ജില്ലയിലെ 16 സ്‌കൂളുകള്‍
പൊതുവിദ്യാലയങ്ങള്‍ക്ക് വേണ്ടി കേരള ഇന്‍ഫ്രാസ്ട്രക്ചര്‍ ആന്റ് ടെക്നോളജി ഫോര്‍ എജ്യൂക്കേഷന്‍ (കൈറ്റ്) നടത്തിയ ‘ഹരിതവിദ്യാലയം’ വിദ്യാഭ്യാസ റിയാലിറ്റി ഷോയുടെ നാലാം എഡിഷന്റെ പ്രാഥമിക പട്ടികയില്‍ സംസ്ഥാന തലത്തില്‍ ജില്ലയിലെ 16 സ്‌കൂളുകള്‍ ഇടംപിടിച്ചു. പ്രാഥമിക പട്ടികയില്‍ ആകെ 85 വിദ്യാലയങ്ങളാണ് ഇടംപിടിച്ചത്. എച്ച്.എം.വൈ.എച്ച്.എസ് മഞ്ചേരി, എ.കെ.എം.എച്ച്.എസ്.എസ് കോട്ടൂര്‍, ജി.എച്ച്.എസ് അഞ്ചച്ചവടി, ഐ.ഒ.എച്ച്.എസ് എടവണ്ണ, ഇ.എം.ഇ.എ.എച്ച്.എസ് കൊണ്ടോട്ടി, ജി.എച്ച്.എസ് വാഴക്കാട്, ബഡ്‌സ് സ്‌കൂള്‍ ഫോര്‍ ഹിയറിംഗ് ഇംപയേര്‍ഡ്, ഒ.യു.പി.എസ് പടിഞ്ഞാറ്റുമ്മുറി, ജി.യു.പി.എസ് മൂര്‍ക്കനാട്, ജി.യു.പി.എസ് കൂട്ടിലങ്ങാടി, എ.എല്‍.പി.എസ് എലംപുലശ്ശേരി, എ.എം.എല്‍.പി.എസ് വില്ലൂര്‍, ജി.എം.എല്‍.പി.എസ് പാണ്ടിക്കാട്, ജി.എല്‍.പി.എസ് ക്ലാരി, എ.എം.എല്‍.പി.എസ് പടിഞ്ഞാറെക്കര, ജി.എല്‍.പി.എസ് കരുവാരക്കുണ്ട് എന്നീ വിദ്യാലയങ്ങളാണ് ജില്ലയില്‍ നിന്നും തെരഞ്ഞെടുക്കപ്പെട്ടത്. സ്‌കൂളുകള്‍ നടത്തുന്ന ക്രിയാത്മകവും മാതൃകാപരവുമായ പ്രവര്‍ത്തനങ്ങളെ അംഗീകരിക്കുകയും അത് മറ്റു വിദ്യാലയങ്ങള്‍ക്ക് കൂടി പങ്കുവെച്ച് പൊതുവിദ്യാഭ്യാസത്തിന്റെ നിലവാരം ഉയര്‍ത്തുകയുമാണ് വിദ്യാഭ്യാസ റിയാലിറ്റിഷോയുടെ പ്രധാന ലക്ഷ്യം. പരിപാടിയുടെ ഫ്‌ളോര്‍ ഷൂട്ട് തിരുവനന്തപുരത്തുള്ള കൈറ്റ് സ്റ്റുഡിയോയില്‍ ഡിസംബര്‍ 26 മുതല്‍ ആരംഭിക്കും. കൈറ്റ് വിക്ടേഴ്‌സില്‍ 2026 ജനുവരി ആദ്യം മുതല്‍ ഷോ സംപ്രേഷണം ചെയ്യും. അവസാന റൗണ്ടിലേക്ക് തിരഞ്ഞെടുക്കപ്പെടുന്ന പത്ത് സ്‌കൂളുകള്‍ക്കും വിജയികള്‍ക്കും ഫെബ്രുവരിയില്‍ നടക്കുന്ന ഗ്രാന്റ് ഫിനാലെയില്‍ പ്രത്യേക അവാര്‍ഡുകള്‍ സമ്മാനിക്കും. ഓണ്‍ലൈനായി സംഘടിപ്പിക്കപ്പെട്ട മീറ്റിങില്‍ തെരഞ്ഞെടുക്കപ്പെട്ട വിദ്യാലയങ്ങളുമായി കൈറ്റ് സി.ഇ.ഒ കെ. അന്‍വസാദത്ത് ആശയവിനിമയം നടത്തി. ഫ്‌ളോര്‍ ഷൂട്ടിന് മുമ്പായി വിദ്യാലയങ്ങള്‍ ചെയ്തു വരേണ്ട കാര്യങ്ങളെ സംബന്ധിച്ചും ‘ഹരിതവിദ്യാലയം’ വിദ്യാഭ്യാസ റിയാലിറ്റി ഷോയുടെ പ്രത്യേകതകള്‍ സംബന്ധിച്ചും വിശദീകരണം നല്‍കി. പരിപാടിയില്‍ കൈറ്റ് മലപ്പുറം ജില്ലാ കോ-ഓര്‍ഡിനേറ്റര്‍ കെ. മുഹമ്മദ് ഷെരീഫ് പങ്കെടുത്തു.
പൊതുവിദ്യാഭ്യാസ മേഖലയില്‍ വിദ്യാഭ്യാസ വകുപ്പ് നടപ്പാക്കിയ സമഗ്ര മുന്നേറ്റങ്ങള്‍ വിദ്യാഭ്യാസ റിയാലിറ്റി ഷോയില്‍ ചര്‍ച്ച ചെയ്യും. സുസജ്ജമായ ഭൗതിക സൗകര്യങ്ങളും മികച്ച അക്കാദമിക പിന്തുണയും എ.ഐ, റോബോട്ടിക്‌സ് ഉള്‍പ്പെടെയുള്ള സാങ്കേതിക പഠനവും ലഭ്യമാക്കുന്ന കേരളത്തിലെ സ്‌കൂളുകള്‍ക്ക് ഈ വേദി ഒരു അംഗീകാരമാകും. 2010, 2017, 2022 വര്‍ഷങ്ങളിലാണ് മുമ്പ് റിയാലിറ്റി ഷോ നടന്നത്.
‘ആട് വളര്‍ത്തല്‍’ സൗജന്യ പരിശീലനം.
മലമ്പുഴ ഗവ. മൃഗസംരക്ഷണ പരിശീലന കേന്ദ്രത്തില്‍ ‘ആട് വളര്‍ത്തലില്‍’ ഡിസംബര്‍ അഞ്ചിന് രാവിലെ 10 മുതല്‍ അഞ്ച് വരെ സൗജന്യ പരിശീലനം നടക്കും. പരിശീലനത്തില്‍ പങ്കെടുക്കുന്നവര്‍ 0491- 2815454 എന്ന നമ്പറില്‍ വിളിച്ച് മുന്‍കൂട്ടി രജിസ്റ്റര്‍ ചെയ്യണം. പരിശീലത്തില്‍ പങ്കെടുക്കുന്നവര്‍ ആധാര്‍ കാര്‍ഡിന്റെ പകര്‍പ്പ് കൊണ്ടുവരണം.
ക്വട്ടേഷന്‍ ക്ഷണിച്ചു.
അരീക്കോട് ബ്ലോക്ക് പഞ്ചായത്തിന്റെ എടവണ്ണ ബ്ലോക്ക് എഫ്.എച്ച്.എച്ച്.സിയിലേക്കുള്ള ക്വാളിറ്റി പ്രവര്‍ത്തനങ്ങള്‍ക്കുള്ള ഫണ്ട് ഉപയോഗിച്ച് ബിപി അപ്പാരറ്റസ്, ലിനന്‍ ബെഡ് ഷീറ്റ്, ബയോ മെഡിക്കല്‍ വേസ്റ്റ് കളക്ഷന്‍ ക്യാബിന്‍, ബയോ മെഡിക്കല്‍ വേസ്റ്റ് ട്രാന്‍സ്പോര്‍ട്ടേഷന്‍ ട്രോളി, ഐ.ഇ.സി ബോര്‍ഡ്സ് ഇന്‍സ്റ്റലേഷന്‍ എന്നിവ വാങ്ങുന്നതിന് ക്വട്ടേഷനുകള്‍ ക്ഷണിച്ചു. കവറിന് പുറത്ത് ‘ക്വാളിറ്റി പ്രവര്‍ത്തനങ്ങള്‍ക്കുള്ള ഉപകരണങ്ങള്‍ വാങ്ങുന്നതിനുള്ള ക്വട്ടേഷന്‍’ എന്ന് രേഖപ്പെടുത്തണം. താത്പര്യമുള്ളവര്‍ ഡിസംബര്‍ നാലിന് രാവിലെ 11 നകം എടവണ്ണ ബ്ലോക്ക് എഫ്.എച്ച്.എച്ച്.സിയില്‍ ക്വട്ടേഷന്‍ നല്‍കണം. ഫോണ്‍-0483 2701029.
മരങ്ങള്‍ ലേലം ചെയ്യുന്നതിന് ക്വട്ടേഷന്‍ ക്ഷണിച്ചു
എടവണ്ണ ബ്ലോക്ക് എഫ്.എച്ച്.എച്ച്.സിയുടെ പുതിയ കെട്ടിടം നിര്‍മ്മിക്കുന്ന സ്ഥലത്ത് അപകടാവസ്ഥയിലുള്ളതും പത്തപ്പിരിയം, പെരഗമണ്ണ എന്നീ സബ് സെന്ററുകളില്‍ വീണുകിടക്കുന്നതുമായ മരങ്ങള്‍ ലേലം ചെയ്യുന്നതിന് ക്വട്ടേഷന്‍ ക്ഷണിച്ചു. താത്പര്യമുള്ളവര്‍ ‘മരങ്ങള്‍ ലേലം ചെയ്യുന്നതിനുള്ള ക്വട്ടേഷന്‍’ എന്ന് രേഖപ്പെടുത്തി എടവണ്ണ ബ്ലോക്ക് എഫ്.എച്ച്.എച്ച്.സിയില്‍ നവംബര്‍ ആറിന് രാവിലെ 11നകം നല്‍കണം. ഫോണ്‍ 0483 2701029.
28-11-2025
തെരഞ്ഞെടുപ്പ് ഉദ്യോഗസ്ഥർക്കുള്ള പരിശീലനം: പങ്കെടുക്കാൻ സാധിക്കാത്തവർക്കുള്ള പരിശീലനം ഡിസംബർ രണ്ടിന്.
തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പിൽ പോളിങ് ഡ്യൂട്ടിക്ക് നിയോഗിച്ച ഉദ്യോഗസ്ഥർക്കുള്ള പരിശീലനത്തിൽ ഒഴിച്ചു കൂടാനാവാത്ത സാഹചര്യത്തിൽ പങ്കെടുക്കാൻ സാധിക്കാത്തവർക്കുള്ള പരിശീലനം ഡിസംബർ രണ്ടിന് രാവിലെ 10ന് പ്ലാനിങ് സെക്രട്ടേറിയറ്റ് കോണ്‍ഫ്രൻസ് ഹാളിൽ നടക്കുമെന്ന് ജില്ലാ തെരഞ്ഞെടുപ്പ് ഓഫീസർ അറിയിച്ചു. പ്രിസൈഡിംഗ് ഓഫീസര്‍, ഫസ്റ്റ് പോളിങ് ഓഫീസര്‍മാര്‍ എന്നിവർക്കായി നവംബർ 25 മുതൽ 28 വരെ മുൻ നിശ്ചയിച്ച പരിശീലന പരിപാടിയിൽ പങ്കെടുക്കാന്‍ സാധിക്കാത്ത മുഴുവൻ ഉദ്യോഗസ്ഥരും അന്നേ ദിവസത്തെ പരിശീലനത്തിൽ പങ്കെടുക്കണം.
അതിഥി തൊഴിലാളികള്‍ക്കായി രക്ത പരിശോധനാ ക്യാംപ് ആരംഭിച്ചു
മലപ്പുറം ജില്ലാ മെഡിക്കല്‍ ഓഫീസ്, തിരൂര്‍ ജില്ലാ ആശുപത്രി, ആരോഗ്യ കേരളം, ജില്ലാ ഡിവിസി യൂണിറ്റ്, സി.എച്ച്.സി വെട്ടം എന്നിവയുടെ സംയുക്താഭിമുഖ്യത്തില്‍ തിരൂര്‍ ഇല്ലത്തപ്പാടം ദാറുസ്സലാം ഓഡിറ്റോറിയത്തില്‍ അതിഥി തൊഴിലാളികള്‍ക്കായി നാളെ (നവംബര്‍ 28) ന് മെഗാ രക്ത പരിശോധനാ ക്യാംപ് നടത്തുന്നു. രാത്രി ഏഴു മണിയ്ക്കാരംഭിക്കുന്ന ക്യാംപില്‍ ആയിരത്തിലധികം പേര്‍ പങ്കെടുക്കുമെന്ന് ആരോഗ്യവകുപ്പധികൃതര്‍ അറിയിച്ചു. നവംബര്‍ 24 മുതല്‍ 29 വരെയുള്ള ദിവസങ്ങളില്‍ ജില്ലയിലെ എല്ലാ പഞ്ചായത്തുകളിലുമായി 600 ഓളം ക്യാംപുകള്‍ സംഘടിപ്പിച്ച് മുഴുവന്‍ അതിഥി തൊഴിലാളികളെയും രക്ത പരിശോധനയ്ക്ക് വിധേയരാക്കുന്ന തീവ്രയജ്ഞ പരിപാടിയുടെ ഭാഗമായാണ് തിരൂരിലും ക്യാംപ് സംഘടിപ്പിക്കുന്നത്.
അപേക്ഷ ക്ഷണിച്ചു
അസാപ് കേരളയുടെ പാണ്ടിക്കാട് കമ്മ്യൂണിറ്റി സ്‌കില്‍ പാര്‍ക്കില്‍ വിവിധ തസ്തികകളിലേക്ക് അപേക്ഷ ക്ഷണിച്ചു. ആപ്ലിക്കേഷന്‍ ഡെവലപ്പര്‍ വെബ് & മൊബൈല്‍, വെയര്‍ഹൗസ് എക്സിക്യൂട്ടീവ്, ഡ്രോണ്‍ സര്‍വീസ് ടെക്‌നിഷ്യന്‍, എ ഐ ആന്‍ഡ് എം എല്‍ ജൂനിയര്‍ ടെലികോം ഡാറ്റാ അനലിസ്റ്റ് എന്നീ തസ്തികകളിലാണ് ഒഴിവുകള്‍. ആപ്ലിക്കേഷന്‍ ഡെവലപ്പര്‍ വെബ് & മൊബൈല്‍ എന്നീ തസ്തികകളിലേക്ക് ഏതെങ്കിലും വിഷയത്തില്‍ ബിരുദം, അല്ലെങ്കില്‍ ഇലക്ട്രോണിക്‌സ്/ കംപ്യൂട്ടര്‍ സയന്‍സ്/ എന്‍ജിനീയറിങ്/ ഇന്‍ഫര്‍മേഷന്‍ ടെക്നോളജി/ സയന്‍സ് എന്നിവയില്‍ ബിരുദവും വെബ് &മൊബൈല്‍ രംഗത്ത് രണ്ടു വര്‍ഷത്തെ വ്യവസായ പരിചയവുമുള്ളവര്‍ക്ക് അപേക്ഷിക്കാം. എ ഐ ആന്‍ഡ് എം എല്‍ ജൂനിയര്‍ ടെലികോം ഡാറ്റാ അനലിസ്റ്റ് തസ്തികകളിലേക്ക് സയന്‍സ്/ഇലക്ട്രോണിക്‌സ്/ ടെലികോം/ ഐ.ടി./ അനുബന്ധ വിഷയങ്ങളില്‍ ബിരുദവും ആക്ടീവ് നെറ്റ്വര്‍ക്ക്/ഐ ഒ ടി ഡൊമെയ്ന്‍ മേഖലയില്‍ രണ്ട് വര്‍ഷത്തെ വ്യവസായ പരിചയമുള്ളവര്‍ക്ക് അപേക്ഷിക്കാം.
പ്ലസ് ടു പാസായ വെയര്‍ഹൗസിങ് മേഖലയില്‍ മൂന്ന് വര്‍ഷത്തെ വ്യവസായ പരിചയവും ഒരു വര്‍ഷം ട്രെയിനിങ് പരിചയമുള്ളവര്‍ക്ക് വെയര്‍ഹൗസ് എക്സിക്യൂട്ടീവ് തസ്തികയിലേക്കും ഇലക്ട്രോണിക്‌സ്/എയറോനോട്ടിക്കല്‍ എന്‍ജിനീയറിംഗ് ഡിപ്ലോമ/ബിരുദവും ഡ്രോണ്‍ സര്‍വീസ് ടെക്‌നിഷ്യന്‍ ആയി രണ്ട് വര്‍ഷത്തെ വ്യവസായ പരിചയവും ഒരു വര്‍ഷം ട്രെയിനിങ് പരിചയമുള്ളവര്‍ക്ക് ഡ്രോണ്‍ സര്‍വീസ് ടെക്‌നിഷ്യന്‍ തസ്തികയിലേക്കും അപേക്ഷിക്കാം. താല്പര്യമുള്ളവര്‍ csppandikkad@asapkerala.gov.in എന്ന ഇമെയില്‍ വിലാസത്തിലേയ്ക്ക് ബയോഡാറ്റ അയക്കണം. ഫോണ്‍ 9495999704.
കെ ജി ഒ എഫ് വനിത സമ്മേളനം നടത്തി
മലപ്പുറം : കേരള ഗസറ്റഡ് ഓഫീസേഴ്‌സ് ഫെഡറേഷന്റെ വനിത കമ്മിറ്റിയുടെ നേതൃത്വത്തില്‍ വനിത സമ്മേളനം നടത്തി. സമ്മേളനത്തിന്റെ ഭാഗമായി വനിതകള്‍ക്കായി സെല്‍ഫ് ഡിഫന്‍സ് അവര്‍നൈസ് ക്ലാസ് നടത്തി. പരിപാടി കെ ജി ഒ എഫ് സംസ്ഥാന ജനറല്‍ സെക്രട്ടറി ഹാരിസ് ഉദ്ഘാടനം ചെയ്തു. ചടങ്ങില്‍ പ്രസിഡന്റ് ബീന അധ്യക്ഷത വഹിച്ചു. മാസ്റ്റര്‍ ട്രെയിനര്‍ കെ. വത്സല, വി ജെ സോണിയ മെബിള്‍, സിനിമോള്‍ എന്നിവര്‍ ക്ലാസിന് നേതൃത്വം നല്‍കി. 30 ഓളം വനിത അംഗങ്ങള്‍ ക്ലാസില്‍ പങ്കെടുത്തു.പുതിയ ഭാരവാഹികളായി ഷഹനില -പ്രസിഡന്റ്, അസ്മിനിത- സെക്രട്ടറി, നിഷിത , ഫിദ ലത്തീഫ്, ഇര്‍ഫാന, നീതു തങ്കം, സന്ധ്യ എന്നിവരെ ജില്ലാ കമ്മിറ്റി അംഗങ്ങളായും തെരഞ്ഞെടുത്തു
ശമ്പള പരിഷ്‌ക്കരണ നടപടികള്‍ ആരംഭിക്കണം – കേരള ഗവ. ഓഫീസേഴ്‌സ് ഫെഡറേഷന്‍ ജില്ലാ സമ്മേളനം
മലപ്പുറം : സര്‍ക്കാര്‍ ജീവനക്കാരുടെ ശമ്പള പരിഷ്‌ക്കരണ നടപടികള്‍ ആരംഭിക്കണമെന്ന് കേരള ഗസറ്റഡ് ഓഫീസേഴ്‌സ് ഫെഡറേഷന്‍ മലപ്പുറം ജില്ലാ സമ്മേളനം ആവശ്യപ്പെട്ടു. കോട്ടക്കല്‍ സൈന്‍ കോണ്‍ഫറന്‍സ് ഹാളില്‍ നടന്ന സമ്മേളനം സിപിഐ ജില്ലാ സെക്രട്ടറി പി കെ കൃഷ്ണദാസ് ഉദ്ഘാടനം ചെയ്തു.അഴിമതിരഹിത ജനപക്ഷ സിവില്‍ സര്‍വീസ് എന്ന ലക്ഷ്യത്തിലൂന്നിയും മാനവിക മൂല്യങ്ങള്‍ ഉയര്‍ത്തിപ്പിടിക്കുന്നതുമാകണം ഫെഡറേഷന്റെ പ്രവര്‍ത്തനങ്ങളെന്ന് അദ്ദേഹം പറഞ്ഞു. ജില്ലാ പ്രസിഡന്റ് ഡോ സക്കീര്‍ ഹുസൈന്‍ അധ്യക്ഷത വഹിച്ചു. കെ ജി ഒ എഫ് സംസ്ഥാന ജനറല്‍ സെക്രട്ടറി ഡോ. ഹാരിസ് സംഘടനാ റിപ്പോര്‍ട്ടും ജില്ലാ സെക്രട്ടറി വിഷ്ണു പ്രവര്‍ത്തന റിപ്പോര്‍ട്ടും ജില്ലാ ട്രഷറര്‍ ഡോ. സബീര്‍ ഹുസൈന്‍ വരവ് ചെലവ് കണക്കും അവതരിപ്പിച്ചു. കെ ജി ഒ എഫ് സംസ്ഥാന വൈസ് പ്രസിഡന്റ് ഡോ. നൗഫല്‍ , സംസ്ഥാന കമ്മിറ്റി അംഗങ്ങളായ ഡോ. അബ്ദുള്ള, ബീന, റീജ, ഷാനവാസ് എന്നിവര്‍ സംസാരിച്ചു.കേരള പോലീസിന്റെ സഹകരണത്തോടെ വനിതകള്‍ക്കായി സ്വയം പ്രതിരോധ പരിശീലന പരിപാടിയും സംഘടിപ്പിച്ചു.പുതിയ ഭാരവാഹികളായി നജ്മുദ്ദീന്‍ -പ്രസിഡന്റ്, ഡോ. ജിബിന്‍ ജോര്‍ജ്ജ് – സെക്രട്ടറി, ഡോ. വസീം മിര്‍സാബ് -ട്രഷറര്‍ എന്നിവരടങ്ങിയ കമ്മിറ്റിയേയും തെരഞ്ഞെടുത്തു.
എയ്ഡഡ് സ്‌കൂളുകളിലേ ഭിന്നശേഷി നിയമനം പ്രതിസന്ധിയില്‍.
മലപ്പുറം : ഭിന്നശേഷി നിയമനത്തിനായി എയ്ഡഡ് സ്‌ക്കൂള്‍ മാനേജര്‍മാര്‍ വിട്ടു നല്‍കിയ 1300 ല്‍ അധികം തസ്തികകളില്‍ ഭിന്ന ശേഷി ഉദ്യോഗാര്‍ത്ഥികളെ നിയമിക്കാനാകാതെ സര്‍ക്കാര്‍ പ്രതിസന്ധിയിലായി. സുപ്രീം കോടതി ഉത്തരവിന്റെ അടിസ്ഥാനത്തില്‍ കെടെക് യോഗ്യത നിര്‍ബന്ധമാക്കിയതാണ് പ്രതിസന്ധിക്ക് കാരണമായത്. ജില്ലാ തല സമിതികള്‍ 500 ഭിന്നശേഷിക്കാരേ ഇന്റര്‍വ്യൂ നടത്തി റാങ്ക് ലിസ്റ്റ് തയ്യാറാക്കിയത് പ്രസിദ്ധീകരിക്കാന്‍ സാധിച്ചിട്ടില്ല. ഉയര്‍ന്ന യോഗ്യതയുള്ള സെറ്റ്, നെറ്റ് ഉള്ളവര്‍ക്കും കെടെക് വേണം എന്ന സുപ്രീം കോടതി ഉത്തരവ് മൂലം ഇത്തരക്കാര്‍ക്ക് നിയമന ശുപാര്‍ശ നല്‍കാന്‍ ജില്ലാതല സമിതികള്‍ക്ക് ആകുന്നില്ല.ഇത് മൂലം അര്‍ഹതപ്പെട്ട ഭിന്ന ശേഷിക്കാരുടെ നിമനവും, 16000 ത്തോളം അധ്യാപകരുടെ സ്ഥിര നിയമനാംഗീകാരവും അനിശ്ചിതത്തില്‍ ആയിരിക്കുകയാണ്. സുപ്രീം കോടതി ആയതില്‍ ഇളവ് നല്‍കിയാല്‍ മാത്രമേ ഇതിന് പരിഹാരമാകുകയുള്ളൂ.ആയതിന് കാലതാമസമെടുക്കും.ഫലത്തില്‍ അധ്യാപകരുടെ നിയമനാംഗീകാരം അനിശ്ചിതത്തിലായി. ആയതിന് സര്‍ക്കാര്‍ അടിയന്തിരമായി ഇടപെട്ട് പരിഹാരം കാണണമെന്ന് കെ പി എസ് എം എ സംസ്ഥാന കമ്മിറ്റി സര്‍ക്കാറിനോട് ആവശ്യപ്പെട്ടു.
ടെന്‍ഡര്‍ ക്ഷണിച്ചു
കൊണ്ടോട്ടി താലൂക്ക് ആസ്ഥാന ആശുപത്രിയിലേക്ക് 24 മണിക്കൂര്‍ സെക്യൂരിറ്റി ജീവനക്കാരുടെ സേവനം ഒരു വര്‍ഷക്കാലയളവില്‍ ഏറ്റെടുത്തു നടത്തുന്നതിന് താത്പര്യമുള്ള അംഗീകൃത ഏജന്‍സികളില്‍ നിന്നും ടെന്‍ഡര്‍ ക്ഷണിച്ചു. ടെന്‍ഡര്‍ സ്വീകരിക്കുന്ന അവസാന തീയതി ഡിസംബര്‍ 15 ഉച്ചയ്ക്ക് 12. ഫോണ്‍: 0483-2710586.
തുല്യതാ പഠന ക്ലാസുകള്‍ 30 മുതല്‍.
സാക്ഷരതാമിഷന്‍ പൊതുവിദ്യാഭ്യാസവകുപ്പിന്റെ സഹകരണത്തോടെ നടത്തുന്ന പത്താംതരം തുല്യതാകോഴ്‌സ് 19-ാം ബാച്ചിന്റെയും ഹയര്‍സെക്കന്‍ഡറി തുല്യത 10-ാം ബാച്ചിന്റെയും സമ്പര്‍ക്ക പഠനക്ലാസുകള്‍ തെരഞ്ഞെടുത്ത സ്‌കൂളുകളില്‍ നവംബര്‍ 30 ന് ആരംഭിക്കും. പത്താംതരം തുല്യതയ്ക്ക് 1184 പേരും ഹയര്‍സെക്കന്‍ഡറി തുല്യതയ്ക്ക് 2038 പേരുമാണ് ജില്ലയില്‍ രജിസ്റ്റര്‍ ചെയ്തിട്ടുള്ളത്. രജിസ്റ്റര്‍ ചെയ്ത പഠിതാക്കള്‍ ബന്ധപ്പെട്ട പ്രേരക്മാരില്‍ നിന്നും രജിസ്ട്രേഷന്‍ കാര്‍ഡ് കൈപ്പറ്റി അവര്‍ക്ക് അലോട്ട് ചെയ്ത സമ്പര്‍ക്കപഠന കേന്ദ്രങ്ങളില്‍ ഹാജരാകണം. ഫോണ്‍: 9446630185.
ലേലം
കുടിശ്ശിക തുകയായ 48,3000/രൂപ ഈടാക്കുന്നതിനായി പെരിന്തല്‍മണ്ണ താലൂക്കിലെ മങ്കട വില്ലേജിലെ സര്‍വ്വേ നമ്പര്‍ 62/1-37ല്‍ പെട്ട 1.82 ആര്‍ ഭൂമി ഡിസംബര്‍ 20 ന് രാവിലെ 11 ന് മങ്കട വില്ലേജ് ഓഫീസില്‍ ലേലം ചെയ്യും. ഫോണ്‍- 04933227230.
27-11-2025
പത്രപ്രവര്‍ത്തകര്‍ പ്രതിഷേധ പ്രകടനവും സംഗമവും നടത്തി
മലപ്പുറം: മാധ്യമ പ്രവര്‍ത്തരുടേത് ഉള്‍പ്പെടെ തൊഴിലാളികളുടെ അവകാശങ്ങള്‍ അടിച്ചമര്‍ത്തുന്ന ലേബര്‍ കോഡുകള്‍ പ്രാബല്യത്തിലാക്കിയ കേന്ദ്രസര്‍ക്കാര്‍ നിലപാടിനെതിരെ കേരളാ പത്രപ്രവര്‍ത്തക യൂണിയന്‍(കെ.യു.ഡബ്‌ള്യു.ജെ) മലപ്പുറം ജില്ലാ കമ്മിറ്റിയും, കേരളാ ന്യൂസ് പേപ്പര്‍ എംപ്ലോയീസ് ഫെഡറേഷനും(കെ.എന്‍.ഇ.എഫ്) സംയുക്തമായി പ്രതിഷേധപ്രകടനവും സംഗമവും സംഘടിപ്പിച്ചു. എസ്.ടി.യു. സംസ്ഥാന പ്രസിഡന്റ് അഡ്വ.എം.റഹ്മത്തുള്ള ചടങ്ങ് ഉദഘാടനം ചെയ്തു. സി.ഐ.ടി.യു. സംസ്ഥാന വൈസ് പ്രസിഡന്റ് വി.ശശികുമാര്‍ മുഖ്യ പ്രഭാഷണം നടത്തി. മലപ്പുറം പ്രസ്‌ക്ലബ്ബ് പ്രസിഡന്റ് എസ്.മഹേഷ്‌കുമാര്‍ അധ്യക്ഷത വഹിച്ചു. കെ.എന്‍.ഇ.എഫ് ജില്ലാ പ്രസിഡന്റ് കെ.ബി.പ്രദീപ്, പത്രപ്രവര്‍ത്തക യൂണിയന്‍ സംസ്ഥാന കമ്മിറ്റി അംഗം സമീര്‍കല്ലായി, മലപ്പുറം പ്രസ്‌ക്ലബ്ബ് വൈസ് പ്രസിഡന്റ് ഗീതു തമ്പി, കെ.എന്‍.ഇ.എഫ് സംസ്ഥാന കമ്മിറ്റി അംഗം എം.ഫസലുറഹ്മാന്‍ പ്രസംഗിച്ചു. മലപ്പുറം പ്രസ്‌ക്ലബ്ബ് സെക്രട്ടറി വി.പി.നിസാര്‍ സ്വാഗതവും കെ.എന്‍.ഇ.എഫ് ജില്ലാ സെക്രട്ടറി ടി.ഇസ്മായീല്‍ നന്ദിയും പറഞ്ഞു.
ആംബുലൻസിൽ പത്രിക പിൻവലിക്കാൻ സ്ഥാനാർത്ഥി പോയി എന്ന വാർത്ത വാസ്തവ വിരുദ്ധം
മലപ്പുറം: കോഡൂർ ഗ്രാമ പഞ്ചായത്തിലെ 19-ാം വാർഡ് സ്ഥാനാർത്ഥിയായ ഫസ് ന പത്രിക പിൻവലിക്കാൻ ആംബുലൻസിൽ പോയി എന്ന പത്രവാർത്ത അടിസ്ഥാനരഹിതമാണ്. പത്രിക പിൻവലിക്കാൻ സ്ഥാനാർത്ഥി തന്നെ പോയിട്ടില്ല. സ്ഥാനാർത്ഥിയുടെ നാമനിർദ്ദേശകനാണ്, പോയത്എന്നിരിക്കെ അടിസ്ഥാനപരവും തെറ്റായ വാർത്തയും നൽകി കോഡൂരി ലെ യുഡിഎഫിനെ പ്രതിരോധിത്തിലാക്കാൻ കെട്ടിച്ചമച്ച വാർത്തയാണിതെന്ന് കോഡൂർ പഞ്ചായത്ത് മുസ്ലിം ലീഗ് കമ്മറ്റി പറഞ്ഞു. പ്രസിഡന്റ് തറയിൽ യൂസഫ് അധ്യക്ഷത വഹിച്ചു. യോഗം മുസ്ലിം ലീഗ് മണ്ഡലം സെക്രട്ടറി ഒറീസ്സ മുഹമ്മദ് ഉത്ഘാടനം ചെയ്തു. ജനറൽ സെക്രട്ടറി എം.ടി ബഷീർ, എൻ കുഞ്ഞീതു, സിപി.ഷാജി, നാസർ കൊളക്കാട്ടിൽ, വി പി ഹനീഫ, ഉമ്മർ പറവത്ത്, നാസർ കുന്നത്ത് പ്രസംഗിച്ചു.
പത്രപ്രവര്‍ത്തക/പത്രപ്രവർത്തകേതര പെന്‍ഷന്‍: നവംബര്‍ 30 നകം ലൈഫ് സര്‍ട്ടിഫിക്കറ്റ് നല്‍കണം
ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പിന്റെ പത്രപ്രവര്‍ത്തക – പത്രപ്രവര്‍ത്തകേതര/ ആശ്രിത പെന്‍ഷന്‍ വാങ്ങുന്നവര്‍ നവംബര്‍ 30നകം ലൈഫ് സര്‍ട്ടിഫിക്കറ്റ് നല്‍കണം. ‘ജീവന്‍ പ്രമാൺ’ പോർട്ടൽ വഴിയുള്ള ഡിജിറ്റൽ ലൈഫ് സർട്ടിഫിക്കറ്റിൻ്റെ (നവംബര്‍ മാസത്തെ തിയ്യതിയിലുള്ളത്) സ്വയം സാക്ഷ്യപ്പെടുത്തിയ പകര്‍പ്പോ, നവംബര്‍ മാസത്തെ തീയതിയിലുള്ള ഗസറ്റഡ് ഓഫീസര്‍ സാക്ഷ്യപ്പെടുത്തിയ ലൈഫ് സര്‍ട്ടിഫിക്കറ്റോ ആണ് നല്‍കേണ്ടത്. ലൈഫ് സര്‍ട്ടിഫിക്കറ്റിന്റെ മാതൃക prd.kerala.gov.in /Media/Pension Schemes ല്‍ നിന്ന് ഡൗണ്‍ലോഡ് ചെയ്ത് ഉപയോഗിക്കാം. ഇതിലെ രണ്ടാം ഭാഗത്ത് പെന്‍ഷണറുടെ നിലവിലെ വിവരങ്ങള്‍ കൂടി ഉള്‍പ്പെടുത്തി സ്വയം സാക്ഷ്യപ്പെടുത്തി നല്‍കണം. ഏത് ജില്ലയില്‍ നിന്നാണോ നിലവില്‍ പെന്‍ഷന്‍ സംബന്ധമായ രേഖകള്‍ സമര്‍പ്പിക്കുന്നത് അതത് ജില്ലാ ഇന്‍ഫര്‍മേഷന്‍ ഓഫീസിലാണ് ലൈഫ് സര്‍ട്ടിഫിക്കറ്റ് നല്‍കേണ്ടത്. മറ്റൊരാള്‍ മുഖേന ലൈഫ് സര്‍ട്ടിഫിക്കറ്റ് എത്തിക്കുന്ന പെന്‍ഷണര്‍മാര്‍ സ്വന്തം ഫോട്ടോ പതിച്ച സര്‍ക്കാര്‍ അംഗീകൃത തിരിച്ചറിയല്‍ രേഖയുടെ സ്വയംസാക്ഷ്യപ്പെടുത്തിയ പകര്‍പ്പ് കൂടി നല്‍കണം. ഫോണ്‍: ജില്ലാ ഇന്‍ഫര്‍മേഷന്‍ ഓഫീസ്, സിവിൽ സ്റ്റേഷൻ, മലപ്പുറം- 0483 2734387.
തദ്ദേശ തെരഞ്ഞെടുപ്പ്: സ്ഥാനാര്‍ത്ഥികളുടെ യോഗം ചേരും
തദ്ദേശസ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പ് 2025-ന്റെ ഭാഗമായി പെരിന്തല്‍മണ്ണ ബ്ലോക്ക് പഞ്ചായത്തിലെ ഒന്ന് മുതല്‍ പത്തൊമ്പത് വരെയുള്ള ഡിവിഷനുകളിലേക്കായി മത്സരിക്കുന്ന സ്ഥാനാര്‍ഥികളുടെ യോഗം നവംബര്‍ 27ന് ഉച്ചയ്ക്ക് ശേഷം മൂന്നിന് പെരിന്തല്‍മണ്ണ ബ്ലോക്ക് പഞ്ചായത്ത് സെക്രട്ടറിയുടെ കാര്യാലയത്തില്‍ നടക്കും. യോഗത്തില്‍ സ്ഥാനാര്‍ഥികള്‍ നിര്‍ബന്ധമായും പങ്കെടുക്കണമെന്ന് പെരിന്തല്‍മണ്ണ ബ്ലോക്ക് പഞ്ചായത്ത് വരണാധികാരി അറിയിച്ചു.
പുനര്‍ ലേലം
കുടിശ്ശികയായ 6,48,708 രൂപ ഈടാക്കുന്നതിന് തിരൂരങ്ങാടി വില്ലേജിലെ റീ സര്‍വേ നമ്പര്‍ 272/4 പി.ടി ലെ 0.016 ഹെക്ടര്‍ പുരയിടവും കുഴിക്കൂറും ഡിസംബര്‍ 30 ന് രാവിലെ 11 ന് തിരൂരങ്ങാടി വില്ലേജ് ഓഫീസില്‍ പുനര്‍ ലേലം ചെയ്യും. ഫോണ്‍-0494 2461055.
മരം ലേലം
ഏറനാട് താലൂക്കിലെ മലപ്പുറം വില്ലേജില്‍ ഉള്‍പ്പെട്ട 430/1 എ 3എ1 സര്‍വ്വേ നമ്പറില്‍ ഉള്‍പ്പെട്ട 0.0343 ഹെക്ടര്‍ ഭൂമിയിലെ മരങ്ങളുടെ ലേലം ഡിസംബര്‍ 15 ന് രാവിലെ 11 ന് മലപ്പുറം വില്ലേജ് ഓഫീസ് പരിസരത്ത് നടക്കും. ഫോണ്‍- 0483 2766121
26-11-2025
തൊഴിലാളി വിരുദ്ധ ലേബര്‍ കോഡിനെതിരെ പ്രതിഷേധ പ്രകടനവും സംഗമവും
മാധ്യമ പ്രവര്‍ത്തരുടേത് ഉള്‍പ്പെടെ തൊഴിലാളികളുടെ അവകാശങ്ങള്‍ അടിച്ചമര്‍ത്തുന്ന ലേബര്‍ കോഡുകള്‍ പ്രാബല്യത്തിലാക്കിയ കേന്ദ്രസര്‍ക്കാര്‍ നിലപാടിനെതിരെ കേരളാ പത്രപ്രവര്‍ത്തക യൂണിയന്‍(കെ.യു.ഡബഌു.ജെ) മലപ്പുറം ജില്ലാ കമ്മിറ്റിയും, കേരളാ ന്യൂസ് പേപ്പര്‍ എംപ്ലോയീസ് ഫെഡറേഷനും(കെ.എന്‍.ഇ.എഫ്) സംയുക്തമായി നാളെ(26)രാവിലെ 11.30ന് മലപ്പുറം പ്രസ്‌ക്ലബ്ബിന് മുന്നില്‍നിന്നും പ്രതിഷേധപ്രകടനവും സംഗമവും സംഘടിപ്പിക്കുകയാണ്. ചടങ്ങില്‍ എസ്.ടി.യു. സംസ്ഥാന പ്രസിഡന്റ് അഡ്വ.എം.റഹ്മത്തുള്ളയും, സി.ഐ.ടി.യു. സംസ്ഥാന വൈസ് പ്രസിഡന്റ് വി.ശശികുമാറും പങ്കെടുക്കും. എല്ലാ അംഗങ്ങളും കൃത്യസമയത്ത് മലപ്പുറം പ്രസ്‌ക്ലബ്ബില്‍ എത്തിച്ചേരണമെന്ന് അഭ്യര്‍ത്ഥിക്കുന്നു.
ബി.എൽ.ഒ.യെ നീക്കി.
പൊതുജനങ്ങളോട് അപമര്യാദയായി പെരുമാറിയതായി ശ്രദ്ധയിൽ പെട്ടതിനാൽ തവനൂർ മണ്ഡലം 38-ാം നമ്പർ ആനപ്പടി വെസ്റ്റ് എൽ.പി.സ്കൂൾ ബൂത്തിലെ ബി.എൽ. ഒ.യെ ചുമതലയിൽ നിന്ന് നീക്കിയതായി ജില്ലാ കളക്ടർ വി.ആർ. വിനോദ് അറിയിച്ചു. വിഷയത്തിൽ ഉദ്യോഗസ്ഥനോടു വിശദീകരണം തേടും. ചെറിയ പരപ്പൂർ എ.എം.എൽ.പി.സ്കൂൾ അധ്യാപിക പ്രസീനയ്ക്ക് പകരം ബി. എൽ.ഒ ചുമതല നൽകി.
എ.എം.ആര്‍ ബോധവല്‍ക്കരണ വാരാചരണം: കുടുംബശ്രീ അനിമേറ്റേഴ്സിന് ക്ലാസ് നല്‍കി.
ആരോഗ്യ വകുപ്പിന്റെയും കുടുംബശ്രീ മിഷന്റെയും സംയുക്ത ആഭിമുഖ്യത്തില്‍ എ.എം.ആര്‍ ബോധവല്‍ക്കരണ വാരാചരണത്തിന്റെ സമാപനം പൂക്കോട്ടുംപാടം സി.ഡി.എസ് ഹാളില്‍ സംഘടിപ്പിച്ചു. പരിപാടിയുടെ ഭാഗമായി കുടുംബശ്രീ അനിമേറ്റേഴ്സിന് ‘ആന്റിബയോട്ടിക്കുകളുടെ ശരിയായ വിനിയോഗം’ എന്ന വിഷയത്തില്‍ ആര്‍ദ്രം നോഡല്‍ ഓഫീസര്‍ ഡോ. പ്രവീണ ബോധവല്‍ക്കരണ ക്ലാസ് എടുത്തു. ‘ഇപ്പോള്‍ പ്രവര്‍ത്തിക്കുക: വര്‍ത്തമാനം സംരക്ഷിച്ചാല്‍, ഭാവി സുരക്ഷിതമാകും’ (Act Now: Protect Our Present, Secure Our Future) എന്നതാണ് ഈ വര്‍ഷത്തെ സന്ദേശം. ആന്റിബയോട്ടിക് മരുന്നുകളുടെ തെറ്റായ ഉപയോഗത്തിനെതിരെ ഇപ്പോള്‍ തന്നെ നടപടി സ്വീകരിച്ചാല്‍ ഭാവി ആരോഗ്യകരമാക്കാം എന്ന ആശയമാണ് ഇതിലൂടെ നല്‍കുന്നത്. ആന്റിബയോട്ടിക് മരുന്നുകളുടെ തെറ്റായ ഉപയോഗം മൂലം ഉണ്ടാകുന്ന ആന്റിബയോട്ടിക് പ്രതിരോധം ആര്‍ജിച്ച അണുബാധകളെക്കുറിച്ച് സമൂഹത്തില്‍ അവബോധം സൃഷ്ടിക്കുകയാണ് വാരാചരണ ലക്ഷ്യം. ചടങ്ങില്‍ കുടുംബശ്രീ ട്രൈബല്‍ പ്രൊജക്റ്റ് കോര്‍ഡിനേറ്റര്‍ മുഹമ്മദ് സാനു, പി.ആര്‍.ഒ ഹരിത എന്നിവര്‍ സംസാരിച്ചു. ‘ആന്റിബയോട്ടിക്ക് സാക്ഷര കേരളം’ എന്ന സന്ദേശം പൊതുജനങ്ങളിലേക്ക് എത്തിക്കുക എന്ന ലക്ഷ്യത്തിന്റെ ഭാഗമായാണ് ക്ലാസുകള്‍ നല്‍കിയത്. നവംബര്‍ 18 മുതല്‍ 24 വരെ ജില്ലയിലുടനീളം ആരോഗ്യവകുപ്പിന്റെ നേതൃത്വത്തില്‍ വിവിധ ബോധവത്ക്കരണ പ്രവര്‍ത്തനങ്ങളും നടന്നു.
ലേലം
കുടിശ്ശികയായ 82000 രൂപ ഈടാക്കുന്നതിന് വേണ്ടി തിരൂരങ്ങാടി താലൂക്കിലെ എ ആര്‍ നഗര്‍ വില്ലേജിലെ ബ്ലോക്ക് 002 ലെ റീസര്‍വ്വേ നമ്പര്‍ 33/3 ലെ 0.0085 ഹെക്ടര്‍ ഭൂമി ഡിസംബര്‍ 29ന് രാവിലെ 11ന് എ ആര്‍ നഗര്‍ വില്ലേജ് ഓഫീസില്‍ വെച്ച് ലേലം ചെയ്യും.
യുഡിഎഫ് ഓഫീസ് ഉദ്ഘാടനം
കോട്ടക്കല്‍ : കോട്ടക്കല്‍ നഗരസഭ പാറയില്‍ സ്ട്രീറ്റ് വാര്‍ഡില്‍ മത്സരിക്കുന്ന യുഡിഎഫ് സ്ഥാനാര്‍ത്ഥി വേലായുധന്റെ വിജയത്തിനായി യുഡിഎഫ് ഓഫീസ് തുറന്ന് പ്രവര്‍ത്തനം തുടങ്ങി. കണ്‍വെന്‍ഷനും ഓഫീസ് ഉദ്ഘാടനവും മുനിസിപ്പല്‍ ലീഗ് പ്രസിഡന്റ് കെ കെ നാസര്‍ നിര്‍വ്വഹിച്ചു. യുഡിഎഫ് ചെയര്‍മാന്‍ വി പി രാജന്‍ അധ്യക്ഷത വഹിച്ചു. യുഡിഎഫ് ജനറല്‍ കണ്‍വീനര്‍ കെ എം റഷീദ്, മുനിസിപ്പല്‍ മുസ്ലീം ലീഗ് ജനറല്‍ സെക്രട്ടറി ഷംസുദ്ദീന്‍ ചെരട, മുസ്ലീം ലീഗ് സെക്രട്ടറി കുഞ്ഞാലന്‍ മുതുവാടന്‍, സുലൈമന്‍ പാറമ്മല്‍, വടക്കന്‍ അയൂബ്, അഷ്‌റഫ് മേലേതില്‍, സഹീര്‍ കക്കിടി, മുജീബ് കൈപുറം എന്നിവര്‍ സംസാരിച്ചു.
25-11-2025
എള്ള് കൃഷിയിൽ നൂറുമേനി വിളയിച്ച് കൃഷി വകുപ്പ് ജീവനക്കാരൻ രാജേഷ്.
പൂക്കോട്ടുംപാടം: അന്യംനിന്നുപോകുന്ന എള്ള് കൃഷിയിൽ നൂറുമേനി വിളയിച്ച് കൃഷി വകുപ്പ് ജീവനക്കാരൻ. അമരമ്പലം മാമ്പോയിൽ സ്വദേശി പാണംപൊയിൽ രാജേഷ് കുമാറാണ് എള്ള് കൃഷിയിൽ നൂറുമേനി വിളയിച്ചത്. മുണ്ടേരി വിത്ത് കൃഷി കേന്ദ്രത്തിൽ ജീവനക്കാരനായ രാജേഷ് ഫാമിൽ നിന്നും ലഭിച്ച വിത്താണ് വിളയിച്ചെടുത്തത്. 80 സെന്റ് സ്ഥലത്താണ് കൃഷി. റബർ കൃഷിയിൽ ഇടവിളയായിയാണ് കര എള്ള് കൃഷി ചെയ്യുന്നത്. ആവശ്യമായ തൊഴി ലാളികളെ ലഭ്യമാകാത്തതിനാലാണ് വിളവെടുപ്പ് നീളുന്നത്. എള്ള് വിളവെടുപ്പിന് ശേഷം ആവശ്യം ഉള്ളവർക്ക് നൽകാനാണ് രാജേഷ് കുമാർ ഉദ്ദേശിക്കുന്നത്.
സീനിയോരിറ്റി ലിസ്റ്റ് പ്രസിദ്ധീകരിച്ചു.
ജില്ലാ സൈനിക ക്ഷേമ ഓഫീസില്‍ രജിസ്റ്റര്‍ ചെയ്തിട്ടുള്ള വിമുക്ത ഭടന്മാരുടെ താത്കാലിക സീനിയോരിറ്റി ലിസ്റ്റ് പ്രസിദ്ധീകരിച്ചു. ലിസ്റ്റിനെ കുറിച്ചുള്ള ആക്ഷേപങ്ങളും പരാതികളും ഡിസംബര്‍ 20 വരെ സ്വീകരിക്കും. ഫോണ്‍-0483 2734932.
ബാലവേല-കൗമാരത്തൊഴില്‍: ശരണബാല്യം ജോയിന്റ് ഡ്രൈവ് സംഘടിപ്പിച്ചു.
ശരണബാല്യം പദ്ധതിയുടെ ജോയിന്റ് ഡ്രൈവിന്റെ ഭാഗമായി പാണ്ടിക്കാട് ബസ് സറ്റാന്‍ഡ് പരിസരത്ത് ബാലവേല, ബാലഭിക്ഷാടനം എന്നിവയില്ലെന്നു ഉറപ്പുവരുത്താന്‍ പരിശോധന നടത്തി. ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിലെ റെസ്‌ക്യൂ ഓഫീസര്‍ പി.എം. ആതിരയുടെ നേതൃത്വത്തിലാണ് പരിശോധന നടത്തിയത്. വ്യാപാരസ്ഥാപനങ്ങള്‍ ഹോട്ടലുകള്‍ എന്നിവിടങ്ങളില്‍ ബാലവേല, കൗമാരത്തൊഴില്‍ എന്നീ സാഹചര്യത്തില്‍ കുട്ടികള്‍ ഇല്ലെന്ന് പരിശോധനയില്‍ കണ്ടെത്തി. കുട്ടികള്‍ അല്ലായെന്നു ഉറപ്പുവരുത്തിയതിനു ശേഷം മാത്രമേ ജോലിക്ക് എടുക്കുവാന്‍ പാടുള്ളൂവെന്നും ഇവരുടെ രേഖകള്‍ കൃത്യമായി പരിശോധിക്കണമെന്നും നിര്‍ദ്ദേശം നല്‍കി. ബാല -കൗമാരത്തൊഴില്‍ നിരോധനവും നിയന്ത്രണവും നിയമം 1986 പ്രകാരം കുട്ടികളെ ജോലിക്ക് എടുക്കുന്നതും കൗമാരപ്രായക്കാരെ അപകടകരമായ സാഹചര്യങ്ങളില്‍ ജോലിക്ക് എടുക്കുന്നതും ശിക്ഷാര്‍ഹമാണ്. കൂടാതെ ഇത്തരം സാഹചര്യങ്ങളില്‍ കുട്ടികളെ കാണുകയാണെങ്കില്‍ വിവരമറിയിക്കണം. ബാലവേല സംബന്ധിച്ച വിവരം അറിയിക്കുന്നതിന് പോസ്റ്ററുകള്‍ വ്യാപാരസ്ഥാപനങ്ങളിലും ഹോട്ടലുകളിലും പതിപ്പിച്ചിട്ടുണ്ട്. ഫോണ്‍- 0483-2978888.
താലൂക്ക് വികസന സമിതി യോഗം മാറ്റി വെച്ചു.
തദ്ദേശസ്വയംഭരണ തെരഞ്ഞെടുപ്പ് പെരുമാറ്റച്ചട്ടം നിലവില്‍ വന്നതിനാല്‍ ഡിസംബര്‍ മാസത്തില്‍ നടത്താനിരുന്ന ഏറനാട് താലൂക്ക് വികസന സമിതി യോഗം മാറ്റിവെച്ചു.
ജനദ്രോഹ സര്‍ക്കാറിനെതിരെ വിധിയെഴുതുക -പെന്‍ഷനേഴ്‌സ് സംഘ്.
മലപ്പുറം : നാളിതുവരെ സര്‍ക്കാര്‍ ജീവനക്കാരെയും പെന്‍ഷന്‍കാരെയും ദ്രോഹിക്കുകയും ഇപ്പോഴും 17 ശതമാനം ഡി എ യും പ്രഖ്യാപിച്ച ഡി എ യുടെ കുടിശ്ശികയും ശമ്പള പെന്‍ഷന്‍ പരിഷ്‌ക്കരണവും നടത്താത്ത ഒരെയൊരു സംസ്ഥാനം കേരളം മാത്രമാണ്. ആയതുകൊണ്ട് തന്നെ പെന്‍ഷന്‍കാരും ജീവനക്കാരും അവരുടെ കുടുംബാംഗങ്ങളും ഈ സര്‍ക്കാറിനെതിരെ തദ്ദേശ സ്വയംഭരണ തെരഞ്ഞെടുപ്പില്‍ പ്രതികരിക്കണമെന്ന് പെന്‍ഷനേഴ്‌സ് സംഘ് സംസ്ഥാന സെക്രട്ടറി എ.പി. രാധാകൃഷ്ണന്‍ ആവശ്യപ്പെട്ടു. മലപ്പുറം ബ്ലോക്ക് പെന്‍ഷനേഴ്‌സ് സംഘ് കുടുംബ സംഗമം മുണ്ടുപറമ്പ് ചെന്നത്ത് ശ്രീദക്ഷിണാമൂര്‍ത്തി ക്ഷേത്രം ഹാളില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ശബരിമല ക്ഷേത്രം സ്വര്‍ണ്ണക്കൊള്ള നടത്തി ഭക്തരെയും കേരളത്തേയും ലോകത്തിന് മുന്നില്‍ അപഹാസ്യരാക്കിയ പിണറായി വിജയന്‍ സര്‍ക്കാര്‍ സമസ്ത മേഖലയിലും ഒരു വന്‍ പരാജയമാണെന്നും അദ്ദേഹം പറഞ്ഞു. കുമാരി അര്‍പ്പിതയുടെ സോപാന സംഗീതത്തോടെയും പ്രാര്‍ത്ഥനയോടെയും കുടുംബ സംഗമം ആരംഭിച്ചു. പ്രസ്തുത യോഗത്തില്‍ മലപ്പുറം ബ്ലോക്ക് പ്രസിഡന്റ് ഗീത കെ എ അധ്യക്ഷത വഹിച്ചു. സെക്രട്ടറി സുരേഷ് വി സി സ്വാഗതം പറഞ്ഞു. സുബ്രഹ്മണ്യന്‍ ചുങ്കപ്പള്ളി, വേണു വിളയില്‍, സി. പുരുഷോത്തമന്‍, കെ. നാരായണന്‍ നമ്പൂതിരി, പുഷ്പലത പി, ഉഷപ്രഭ കെ എച്ച്, ബാലസുബ്രഹ്മണ്യന്‍ പി കെ തുടങ്ങിയവര്‍ സംസാരിച്ചു. മുതിര്‍ന്ന അംഗങ്ങളായ അശോകബാലന്‍ എം, സേതുലക്ഷ്മി പി ആര്‍, വാസുദേവന്‍ എം എന്നിവരെ ആദരിച്ചു.
ഉച്ചക്ക് ശേഷം നടന്ന കുടുംബ പ്രബോധന്‍ പരിപാടിയില്‍ ജില്ലാ സംയോജകന്‍ വേണു വിളയില്‍ അധ്യക്ഷത വഹിച്ചു. പ്രാന്തഗണാംഗം അയ്യപ്പന്‍ യൂണിവേഴ്‌സിറ്റി സന്ദേശം നല്‍കി. സംസ്ഥാന ഗണാംഗം വേലായുധന്‍ താനൂര്‍ മുഖ്യ പ്രഭാഷണം നടത്തി. ശാന്തിഗീതത്തോടെ പരിപാടികള്‍ വൈകീട്ടോടെ സമാപിച്ചു.
23-11-2025
തദ്ദേശ തെരഞ്ഞെടുപ്പ്: ജില്ലാ പഞ്ചായത്തിലേക്കുള്ള 182 സ്ഥാനാർത്ഥികളുടെ 285 നാമനിര്‍ദേശ പത്രികകളും സ്വീകരിച്ചു
തദ്ദേശ തെരഞ്ഞെടുപ്പില്‍ മലപ്പുറം ജില്ലാ പഞ്ചായത്തിലെ 33 ഡിവിഷനുകളിലേക്കും മത്സരിക്കുന്ന സ്ഥാനാർത്ഥികളുടെ നാമനിര്‍ദേശ പത്രികകളുടെ സൂക്ഷ്മ പരിശോധന പൂര്‍ത്തിയായി. 182 സ്ഥാനാർത്ഥികളുടേതായി ലഭിച്ച 285 നാമനിര്‍ദേശ പത്രികകളും വരണാധികാരിയായ ജില്ലാ കളക്ടര്‍ വി.ആര്‍. വിനോദ് സൂക്ഷ്മ പരിശോധനയിൽ സ്വീകരിച്ചു. ജില്ലാ പഞ്ചായത്ത് ഉപവരണാധികാരി കൂടിയായ എ.ഡി.എം. എന്‍.എം.മെഹറലി, തെരഞ്ഞെടുപ്പ് വിഭാഗത്തിലെ വിവിധ ഉദ്യോഗസ്ഥര്‍ തുടങ്ങിയവര്‍ സൂക്ഷ്മപരിശോധനയില്‍ സംബന്ധിച്ചു. പത്രിക പിന്‍വലിക്കാനുള്ള അവസാന തീയതി നവംബര്‍ 24 ആണ്.
ജില്ലാ പഞ്ചായത്തിലെ വിവിധ ഡിവിഷനുകളിലേക്ക് പത്രിക നൽകിയ സ്ഥാനാര്‍ഥികളുടെ എണ്ണം ചുവടെ:
വഴിക്കടവ് (ജനറല്‍)- 5, മൂത്തേടം(സ്ത്രീ)- 4, വണ്ടൂര്‍(സ്ത്രീ)- 5, കരുവാരക്കുണ്ട് (ജനറല്‍)- 5, മേലാറ്റൂര്‍ (ജനറല്‍)- 4, ഏലംകുളം (സ്ത്രീ)-6, അങ്ങാടിപ്പുറം (പട്ടികജാതി)- 5, ആനക്കയം (സ്ത്രീ)- 5, മക്കരപറമ്പ് (സ്ത്രീ)- 5, കുളത്തൂര്‍ (സ്ത്രീ)- 5, കാടാമ്പുഴ (സ്ത്രീ)- 5, കുറ്റിപ്പുറം (സ്ത്രീ)- 5, തവനൂര്‍ (സ്ത്രീ)- 5, ചങ്ങരംകുളം (ജനറല്‍)- 9, മാറഞ്ചേരി (സ്ത്രീ)- 4, തിരുന്നാവായ (സ്ത്രീ)- 5, മംഗലം (സ്ത്രീ)- 5, പുത്തനത്താണി (ജനറല്‍)- 6, പൊന്‍മുണ്ടം (ജനറല്‍)- 8, താനാളൂര്‍ (പട്ടികജാതി സ്ത്രീ)- 4, നന്നമ്പ്ര (ജനറല്‍)- 7, ഒതുക്കുങ്ങല്‍ (ജനറല്‍)- 7, പൂക്കോട്ടൂര്‍ (സ്ത്രീ)- 5, ചേറൂര്‍ (സ്ത്രീ)- 5, വേങ്ങര (ജനറല്‍)- 7, വെളിമുക്ക് (ജനറല്‍)- 5, തേഞ്ഞിപ്പലം (ജനറല്‍)- 10, പുളിയ്ക്കല്‍ (പട്ടികജാതി സ്ത്രീ)- 4, വാഴക്കാട് (ജനറല്‍)- 5, അരീക്കോട് (ജനറല്‍)- 5, തൃക്കലങ്ങോട് (ജനറല്‍)- 7, എടവണ്ണ (ജനറല്‍)- 6, ചുങ്കത്തറ (സ്ത്രീ)- 4.
സമസ്ത നൂറാം വാർഷികം; എസ്.കെ.ജെ.എം സന്ദേശയാത്രക്ക് നാളെ തുടക്കം
മലപ്പുറം: സമസ്ത നൂറാം വാർഷിക അന്താരാഷ്ട്ര സമ്മേളന പ്രചാരണാർഥം സമസ്ത കേരളാ ജംഇയ്യത്തുൽ മുഅല്ലിമീൻ ഈസ്റ്റ് ജില്ലാ കമ്മിറ്റിയുടെ സന്ദേശയാത്രക്ക് നാളെ തുടക്കമാവും. 24 മുതൽ 27 വരെ ഈസ്റ്റ് ജില്ലാ പ്രസിഡന്റ് ഒ.എം.എസ് തങ്ങൾ നിസാമി മേലാറ്റൂർ നയിക്കുന്ന ജാഥക്ക് ഈസ്റ്റ് ജില്ലയിലെ 23 കേന്ദ്രങ്ങളിൽ സ്വീകരണം നൽകും. നാളെ രാവിലെ 8.30ന് കണ്ണിയത്ത് ഉസ്താദ് മഖാം സിയാറത്തോടെ യാത്രക്ക് തുടക്കമാവും. ജാഥയുടെ ഉദ്ഘാടനം വാഴക്കാട് വെച്ച് കോഴിക്കോട് ഖാസി സയ്യിദ് മുഹമ്മദ് കോയ തങ്ങൾ ജമലുല്ലൈലി നിർവഹിക്കും. തുടർന്ന് എടവണ്ണപ്പാറ, കൊട്ടപ്പുറം, കൊണ്ടോട്ടി, കിഴിശ്ശേരി, വള്ളുവമ്പ്രം എന്നിവിടങ്ങളിൽ പര്യടനം നടത്തും. 25ന് രാവിലെ എട്ടിന് തൃപ്പനച്ചി മഖാമിൽ നിന്ന് തുടങ്ങി അരിക്കോട്, മഞ്ചേരി, പാണ്ടിക്കാട്, ആനക്കയം, മലപ്പുറം എന്നിവിടങ്ങളിലും 26ന് രാവിലെ എട്ടരയ്ക്ക് ചാപ്പനങ്ങാടി ബാപ്പു മുസ്‌ലിയാർ മഖാമിൽ നിന്ന് തുടങ്ങി ചട്ടിപ്പറമ്പ്, മക്കരപ്പറമ്പ്, കൊളത്തൂർ, പെരിന്തൽമണ്ണ, കരിങ്കല്ലത്താണി, മേലാറ്റൂർ എന്നിവിടങ്ങളിലും 27ന് രാവിലെ എട്ടിന് കെ.ടി മാനു മുസ്‌ലിയാർ മഖാം സിയാറത്തോടെ തുടങ്ങി കരുവാരക്കുണ്ട്, കാളികാവ്, വണ്ടൂർ, നിലമ്പൂർ ചന്തക്കുന്ന്, എടക്കര എന്നിവിടങ്ങളിൽ പര്യടനം നടത്തി വൈകീട്ട് പൂക്കോട്ടുംപാടത്ത് സമാപിക്കും. സമാപന സമ്മേളനം എസ്.വൈ.എസ് സംസ്ഥാന വർക്കിംങ് സെക്രട്ടറി അബ്ദുൽ ഹമീദ് ഫൈസി അമ്പലക്കടവ് ഉദ്ഘാടനം ചെയ്യും. കെ.ടി ഹുസൈൻകുട്ടി മുസ് ലിയാർ, ശമീർ ഫൈസി ഒടമല ഉപനായകരും കെ.കെ.എം അമാനുല്ല ദാരിമി ഡയറക്ടറും അൻവർ റശീദ് ബാഖവി കോഡിനേറ്ററുമായ ജാഥയിൽ വിവിധ കേന്ദ്രങ്ങളിലായി സത്താർ പന്തല്ലൂർ, അലവി ദാരിമി കുഴിമണ്ണ, യൂനുസ് ഫൈസി വെട്ടുപ്പാറ, ജസീൽ കമാലി അരക്കുപറമ്പ, മുജ്തബ ഫൈസി ആനക്കര, നാസർ മാസ്റ്റർ കരുളായി, മുഹമ്മദ് ഫൈസി പാതാർ, ഫരീദ് റഹ്‌മാനി കാളികാവ്, മൻസൂർ വാഫി ചൂളാട്ടിപാറ, ലുഖ്മാനുൽ ഹക്കീം റഹീമി, മഅ്മൂൻ ഹുദവി വണ്ടൂർ എന്നിവർ സംസാരിക്കും.
അന്താരാഷ്ട്ര ശിശുദിനം: റെയിന്‍ബോ വാക്ക് സംഘടിപ്പിച്ചു.
വനിതാ ശിശു വികസന വകുപ്പ് ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്റെ ആഭിമുഖ്യത്തില്‍ അന്താരാഷ്ട്ര ശിശുദിനത്തിന്റെ ഭാഗമായി ബാലസംരക്ഷണ സംവിധാനങ്ങളുടെ റെയിന്‍ബോ വാക്ക് സംഘടിപ്പിച്ചു. ജില്ലാകളക്ടറുടെ വസതി മുതല്‍ മലപ്പുറം കുന്നുമ്മല്‍ കെ. എസ്. ആര്‍.ടി.സി. ഡിപ്പോ വരെയാണ് റെയിന്‍ബോ വാക് സംഘടിപ്പിച്ചത്. ജില്ലാ ലീഗല്‍ സര്‍വീസസ് അതോറിറ്റി സെക്രട്ടറി ഷാബിര്‍ ഇബ്രാഹിം റെയിന്‍ബോ വാക്കിന്റെ ഫ്ളാഗ് ഓഫ് ചെയ്തു.നവംബര്‍ 14 മുതല്‍ അന്താരാഷ്ട്ര ബാലവകാശ ദിനമായ നവംബര്‍ 20 വരെ നീണ്ടു നില്‍ക്കുന്ന പരിപാടികളുടെ ഭാഗമായാണ് ”റെയിന്‍ബോ വാക്” സംഘടിപ്പിച്ചത്. ജില്ലയിലെ വിവിധ വകുപ്പകള്‍ വഴി കുട്ടികള്‍ക്ക് നല്‍കി വരുന്ന സേവനങ്ങളെ സംബന്ധിച്ച വിവരങ്ങള്‍ അടങ്ങിയ പ്ലക്കാര്‍ഡുകള്‍ റെയിന്‍ബോ വാക്കില്‍ പ്രദര്‍ശിപ്പിച്ചു. കോട്ടൂര്‍ എ കെ എം എച്ച് എസ് എസ് ലെ കുട്ടികളുടെ സ്‌കേറ്റിംഗ് പ്രകടനം, മഞ്ചേരി നോബിള്‍ വിമന്‍സ് കോളേജിലെ വിദ്യാര്‍ത്ഥിനികളുടെ തീം ഡാന്‍സ്, തൃപ്രങ്ങോട് വല്ലഭട്ട കളരി ഗ്രൂപ്പിന്റെ കളരി പ്രകടനം, മേലാറ്റൂര്‍ ആര്‍ എം എച്ച് എസ് എസിലെ വിദ്യാര്‍ത്ഥിനികളുടെ ബാന്‍ഡ് എന്നിവ മലപ്പുറം കെ എസ് ആര്‍ ടി സി ഡിപ്പോയില്‍ സംഘടിപ്പിച്ച പരിപാടിയില്‍ നടന്നു. ചൈല്‍ഡ് വെല്‍ഫെയര്‍ കമ്മിറ്റി ചെയര്‍ പേഴ്സണ്‍ എ മമ്മു സമാപന സമ്മേളനം ഉദ്ഘാടനം ചെയ്തു. പരിപാടിയില്‍ ജില്ലയിലെ ചൈല്‍ഡ് വെല്‍ഫെയര്‍ കമ്മിറ്റി അംഗങ്ങള്‍, ജുവനൈല്‍ ജസ്റ്റിസ് ബോര്‍ഡ് അംഗങ്ങള്‍, വനിതാ ശിശു വികസന വകുപ്പിലെ ഉദ്യോഗസ്ഥര്‍, വിവിധ വകുപ്പുകളില്‍ നിന്നുമുള്ള പ്രതിനിധികള്‍, മലപ്പുറം സെന്റ്.ജെമ്മാസ് ഗേള്‍സ് ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിനികള്‍ എന്നിവര്‍ പങ്കെടുത്തു.
ഗതാഗത നിയന്ത്രണം.
മഞ്ചേരി ബൈപ്പാസ് റോഡില്‍ മൂന്നാം ഘട്ട നിര്‍മാണ പ്രവൃത്തികള്‍ നടക്കുന്നതിനാല്‍ ഈ റോഡിലൂടെയുള്ള വാഹനഗതാഗതം നവംബര്‍ 24 മുതല്‍ പ്രവൃത്തി അവസാനിക്കുന്നതു വരെ നിയന്ത്രിച്ചു. പാണ്ടിക്കാട് ഭാഗത്തേക്ക് പോകുന്ന എല്ലാ വാഹനങ്ങളും മഞ്ചേരി കച്ചേരിപ്പടിയില്‍ നിന്നും മഞ്ചേരി ടൗണ്‍ വഴി പാണ്ടിക്കാട് ഭാഗത്തേക്കും തിരച്ചും അതേ റൂട്ടില്‍ പോകണം.
കാർട്ടൂണിസ്റ്റ് ഉസ്മാൻ ഇരുമ്പുഴിയെ മലപ്പുറം ടോപ് സ്ക്കിൽ ചിത്ര കല പഠന കേന്ദ്രം ആദരിച്ചു
മലപ്പുറം: ടോപ് സ്ക്കിൽ ചിത്ര കല പഠന കേന്ദ്രം കാർട്ടൂണിസ്റ്റ് ഉസ്മാൻ ഇരുമ്പുഴിയെ ആദരിച്ചു. ചടങ്ങിൽ കലാ കേന്ദ്രം രക്ഷാധികാരിയും ദേശീയ അവാർഡ് ജേതാവുമായ ബാബുരാജ് കോട്ടക്കുന്ന് അദ്ധ്യക്ഷത വഹിച്ചു. ഡയറക്ടർ മജീഷ്യൻ മലയിൽ ഹംസ സ്വാഗതവും ചിത്ര കല അദ്ധ്യാപിക ആർട്ടിസ്റ്റ് ഷബീബ മലപ്പുറം നന്ദിയും പറഞ്ഞു. ചടങ്ങിൽ സ്റ്റേറ്റ് ലെവൽ മത്സരത്തിൽ മികവാർന്ന വിജയം നേടിയ ആരാധ്യയെ അനുമോദിച്ചു കൂടാതെ ദേശീയോദ്ഗ്രഥന ചിത്രരചനാ മത്സര വിജയികൾക്കുള്ള സമ്മാന വിതരണവും നടന്നു.
22-11-2025
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി ഓംബുഡ്‌സ്മാന്റെ ഇമെയില്‍ വിലാസത്തില്‍ മാറ്റം
മലപ്പുറം ജില്ലയിലെ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, പ്രധാനമന്ത്രി ആവാസ് യോജന (ഗ്രാമീണ്‍) എന്നീ കേന്ദ്രാവിഷ്‌കൃത പദ്ധതികളുടെ ഓംബുഡ്‌സ്മാന്റെ കാര്യാലയത്തിലെ നിലവിലെ ഇ-മെയില്‍ ഐഡിയില്‍ മാറ്റം വന്നതിനാല്‍ പദ്ധതികളുമായി ബന്ധപ്പെട്ട പരാതികള്‍ പുതിയ ഇ-മെയില്‍ വിലാസമായ ombudspersonmpm@gmail.com ല്‍ നല്‍കണം.
തേക്ക് തടികള്‍ ചില്ലറ വില്‍പ്പനയ്ക്ക്.
നെടുങ്കയം ഗവ. തടി ഡിപ്പോയില്‍ തേക്ക് തടികളുടെ ചില്ലറ വില്‍പ്പന നവംബര്‍ 24 മുതല്‍ 2026 ജനുവരി 21 ഉണ്ടായിരിക്കും. മൂന്നും നാലും ക്ലാസുകളില്‍പ്പെട്ട തേക്ക് തടികളാണ് വില്‍പ്പനയ്ക്കുള്ളത്. സ്വന്തം ആവശ്യത്തിനായി 5 ക്യു.മീറ്റര്‍ (175.735 ക്യു.മീറ്റര്‍) വരെ തടി ലഭിക്കും. കൂടുതല്‍ വിവരങ്ങള്‍ നെടുങ്കയം ഗവ. തടി ഡിപ്പോ ഓഫിസില്‍ ലഭിക്കും. ഫോണ്‍- 8547602117,9496261093.
ആസ്വാദനക്കുറിപ്പ് മത്സരം: ശ്രേയ ഹരീഷിന് ഒന്നാം സ്ഥാനം
എക്സൈസ് വിമുക്തി മിഷന്‍ ജില്ലാതലത്തില്‍ സ്‌കൂള്‍ വിദ്യാര്‍ത്ഥികള്‍ക്കായി സംഘടിപ്പിച്ച ആസ്വാദനക്കുറിപ്പ് മത്സരത്തില്‍ കൊളത്തൂര്‍ നാഷണല്‍ ഹയര്‍ സെക്കന്‍ഡറി സ്‌കൂളിലെ ശ്രേയ ഹരീഷ് ഒന്നാം സ്ഥാനം സ്വന്തമാക്കി. ഹൈസ്‌കൂള്‍ വിദ്യാര്‍ത്ഥികള്‍ക്കായി സംഘടിപ്പിച്ച മത്സരത്തില്‍ സാറാ ജോസഫിന്റെ ‘അലാഹയുടെ പെണ്‍മക്കള്‍’ എന്ന നോവലിനാണ് കുട്ടികള്‍ ആസ്വാദനക്കുറിപ്പ് തയ്യാറാക്കിയത്. 36 സ്‌കൂളുകള്‍ പങ്കെടുത്ത മത്സരത്തില്‍ കൊളപ്പുറം ജി.എച്ച്.എസ്സിലെ കെ.എന്‍. ലൈബ ബീവി രണ്ടാം സ്ഥാനവും കുഴിമണ്ണ ഇസത്തുല്‍ ഇസ്ലാം എച്ച്.എസ്.എസ് സന്ഹ ഫാത്തിമ മൂന്നാം സ്ഥാനവും കരസ്ഥമാക്കി. വിജയികള്‍ക്ക് ക്യാഷ് അവാര്‍ഡും സര്‍ട്ടിഫിക്കറ്റും കൈമാറും.
ലീഗല്‍ മെട്രോളജി ഡീലര്‍/റിപ്പയര്‍/മാനുഫാക്ചറര്‍ ലൈസന്‍സുകള്‍ പുതുക്കാന്‍ അവസരം
2026 വര്‍ഷത്തേക്ക് ലീഗല്‍ മെട്രോളജി ഡീലര്‍/റിപ്പയര്‍/മാനുഫാക്ചറര്‍ ലൈസന്‍സുകള്‍ പുതുക്കുന്നതിന് നവംബര്‍ 30 വരെ എല്‍.എം.ഒ.എം.എസ് പോര്‍ട്ടല്‍ മുഖേന ഫീസ് അടച്ച് അപേക്ഷിക്കണം. ഫോണ്‍-0483 2766157.
‘My Azli Fresh’ നൂതനമായ ‘Explore Bangalore പദ്ധതിക്ക് തുടക്കം
ബാംഗ്ലൂരിലെ യുവപ്രൊഫഷണലുകള്‍ക്കും സംരംഭകര്‍ക്കും ഉന്നത വിദ്യാഭ്യാസത്തിനായി എത്തുന്നവര്‍ക്കും നഗരത്തില്‍ ചെലവഴിക്കുന്ന സമയം ഫലപ്രദമാക്കാന്‍ ലക്ഷ്യമിട്ട്, പ്രമുഖ സ്ഥാപനമായ ‘My Azli Fresh’ നൂതനമായ ‘Explore Bangalore പദ്ധതിക്ക് തുടക്കം കുറിച്ചതായി ഭാരവാഹികള്‍ മലപ്പുറത്ത് വാര്‍ത്താസമ്മേളനത്തില്‍ അറിയിച്ചു. നഗരത്തില്‍ തൊഴില്‍ ചെയ്യുന്നതോടൊപ്പം ബാംഗ്ലൂരിന്റെ സാധ്യതകളും പ്രധാന സ്ഥലങ്ങളും അടുത്തറിയാന്‍ അവസരം നല്‍കുന്നതാണ് പദ്ധതി. സാമ്പത്തിക ബുദ്ധിമുട്ടില്ലാതെ ലക്ഷ്യപ്രാപ്തിയിലെത്താന്‍ വ്യക്തികളെ സഹായിക്കും. ഈ പദ്ധതിക്ക് പ്രചോദനമായത് ‘ My Azli Fresh’ന്റെ സ്ഥാപകന്‍ ജമാനുദ്ദീന്റെ സ്വന്തം അനുഭവങ്ങളാണ്. ബിസിനസ്സ് ആരംഭിക്കാനായി ബാംഗ്ലൂരില്‍ എത്തിയ അദ്ദേഹത്തിന്, കഠിനമായ ബുദ്ധിമുട്ടുകളുംജോലിയുടെ തിരക്കുകളും കാരണം രണ്ട് വര്‍ഷത്തോളം നഗരം ഒന്നു ചുറ്റിക്കാണാനോ തന്റെ മറ്റു ലക്ഷ്യങ്ങള്‍ പൂര്‍ത്തീകരിക്കാനോ സാധിക്കാതെ വന്നു. ഈ അനുഭവം, ബാംഗ്ലൂരിലെത്തുന്ന നിരവധി ആളുകള്‍ നേരിടുന്ന ഒരു പൊതുവായ വെല്ലുവിളിയാണെന്ന് തിരിച്ചറിഞ്ഞതോടെയാണ് പുതിയ പദ്ധതിക്ക് രൂപം നല്‍കിയതെന്ന് ജമാനുദ്ധീന്‍, ഷഫാഖ് എന്നിവര്‍ വാര്‍ത്താസമ്മേളനത്തില്‍ അറിയിച്ചു. ബാംഗ്ലൂരില്‍ പുതിയ ആശയങ്ങള്‍ നടപ്പിലാക്കാന്‍ വരുന്നവര്‍ക്ക്, അവരുടെ ലക്ഷ്യം കൈവരിക്കുന്നത് വരെയുള്ള സമയത്തേക്കുള്ള ജീവിതച്ചെലവ് കണ്ടെത്താന്‍ പിന്തുണ നല്‍കും. ആഴ്ചയില്‍ നിശ്ചിത ദിവസങ്ങളില്‍ ജോലി ചെയ്യാനും, ശേഷിക്കുന്ന ദിവസങ്ങള്‍ ബാംഗ്ലൂര്‍ നഗരം പര്യവേക്ഷണം ചെയ്യാനും അവസരം നല്‍കുുമെന്നും ഇവര്‍ അറിയിച്ചു.ആവശ്യമുളളവര്‍ 740490202, 7467 89446 എന്ന ഫോണ്‍ നമ്പറിലോ email: info@myazlifresh.com ഈ മെയിലോ ബന്ധപ്പെടണമെന്നും ഭാരവാഹികള്‍ അറിയിച്ചു
ശിശുപരിപാലന കേന്ദ്രത്തിലേക്ക് വാട്ടര്‍പ്യൂരിഫെയര്‍ നല്‍കി
മലപ്പുറം: കേരള സംസ്ഥാന വനിതാ ശിശു വികസന വകുപ്പിന്റെ കീഴിലുള്ള മലപ്പുറം ശിശുപരിപാലന കേന്ദ്രത്തിലെ പിഞ്ചു കുഞ്ഞുങ്ങള്‍ക്കായി മലപ്പുറം അപ് ഹില്‍ ലയണ്‍സ് ക്ലബ് വാട്ടര്‍ പ്യുരിഫെയര്‍ നല്‍കി. മലപ്പുറം അപ്ഹില്‍ ലയണ്‍സ് ക്ലബ് പ്രസിഡന്റ് അഡ്വ. എസ് പ്രസാദില്‍ നിന്ന് സംസ്ഥാന ബാലാവകാശ കമ്മീഷന്‍ അംഗം അഡ്വ. ഷാജേഷ് ഭാസ്‌ക്കര്‍ ഏറ്റുവാങ്ങി. ചടങ്ങില്‍ ലയണ്‍സ് ക്ലബ് റിജ്യണല്‍ ചെയര്‍പേഴ്‌സണ്‍ അഡ്വ. സുരേഷ് എ കെ, ക്ലബ് സെക്രട്ടറി രഞ്ജിത്ത് എസ്, ട്രഷറര്‍ ശിവശങ്കരന്‍, ചാര്‍ട്ടര്‍ പ്രസിഡന്റ് സുബ്രഹ്മണ്യന്‍ ചുങ്കപ്പള്ളി, പ്രസാദ് കുനൂര്‍, വിനോദ്, ജതീന്ദ്രന്‍ മണ്ണില്‍തൊടി, ഹരിദാസ് , പ്രദീപ് പാമ്പലത്ത് തുടങ്ങിയവര്‍ പങ്കെടുത്തു.
21-11-2025
തദ്ദേശ തെരഞ്ഞെടുപ്പ് നാമനിര്‍ദേശ പത്രിക സമര്‍പ്പിക്കാനുള്ള സമയപരിധി ഇന്ന് (നവംബര്‍ 21) അവസാനിക്കും.
തദ്ദേശ സ്ഥാപനങ്ങളിലേക്ക് മത്സരിക്കുന്നതിനുള്ള നാമനിര്‍ദ്ദേശ പത്രിക സമര്‍പ്പിക്കാനുള്ള സമയപരിധി (നവം.21) ഉച്ചകഴിഞ്ഞ് 3 മണിക്ക് അവസാനിക്കും. പത്രിക സമര്‍പ്പിക്കുന്നയാള്‍ക്ക് സ്വന്തമായോ/ തന്റെ നിര്‍ദ്ദേശകന്‍ വഴിയോ പൊതുനോട്ടീസില്‍ നിര്‍ദ്ദേശിച്ചിട്ടുള്ള സ്ഥലത്ത് ഫോറം 2 – ല്‍ നാമനിര്‍ദ്ദേശ പത്രിക സമര്‍പ്പിക്കാം. സ്ഥാനാര്‍ഥി ആ തദ്ദേശ സ്ഥാപനത്തിലെ ഏതെങ്കിലും വാര്‍ഡിലെ വോട്ടറായിരിക്കണം. പത്രിക സമര്‍പ്പിക്കുന്ന തീയതിയില്‍ 21 വയസ്സ് പൂര്‍ത്തിയായിരിക്കണം. സ്ഥാനാര്‍ഥി ബധിര – മൂകനായിരിക്കരുത്. സ്ഥാനാര്‍ഥിയെ നാമനിര്‍ദ്ദേശം ചെയ്യുന്നയാള്‍ അതേ വാര്‍ഡിലെ വോട്ടറായിരിക്കണം. ഒരു സ്ഥാനാര്‍ഥിക്ക് 3 സെറ്റ് പത്രിക സമര്‍പ്പിക്കാം. സംവരണ സീറ്റുകളില്‍ മത്സരിക്കുന്നവര്‍ ആ വിഭാഗത്തില്‍പ്പെട്ടവരായിരിക്കണം. പട്ടികജാതി, പട്ടികവര്‍ഗ സംവരണ വാര്‍ഡുകളില്‍ മത്സരിക്കുന്നവര്‍ അധികാരപ്പെട്ട ഉദ്യോഗസ്ഥനില്‍ നിന്നുള്ള ജാതി സര്‍ട്ടിഫിക്കറ്റ് ഹാജരാക്കണം. പത്രികയോടൊപ്പം അതത് സ്ഥാനങ്ങളിലേക്ക് നിശ്ചിത തുകയും കെട്ടിവയ്ക്കണം. ഗ്രാമപഞ്ചായത്തില്‍ 2000 രൂപയും, ബ്ളോക്ക് പഞ്ചായത്ത്, മുനിസിപ്പാലിറ്റി എന്നിവിടങ്ങളില്‍ 4000 രൂപയും, കോര്‍പറേഷന്‍, ജില്ലാ പഞ്ചായത്ത് എന്നിവിടങ്ങളില്‍ 5000 രൂപയും ആണ് കെട്ടിവെയ്ക്കേണ്ടത്. പട്ടികജാതി, പട്ടികവര്‍ഗ വിഭാഗങ്ങള്‍ക്ക് തുകയുടെ പകുതി മതി. സ്ഥാനാര്‍ഥികള്‍ നാമനിര്‍ദേശ പത്രികയോടൊപ്പം കെട്ടിവയ്ക്കേണ്ട തുക അതത് തദ്ദേശസ്വയംഭരണ സ്ഥാപനങ്ങളില്‍ അടച്ച് രസീത് പത്രികയോടൊപ്പം വരണാധികാരിയ്ക്ക് സമര്‍പ്പിക്കണം. പണം നേരിട്ട് വരണാധികാരിയുടെ പക്കല്‍ ഏല്‍പിക്കുകയോ ട്രഷറിയില്‍ അടവാക്കുകയോ ചെയ്യാം. സ്ഥാനാര്‍ഥിയുടെ വിദ്യാഭ്യാസ യോഗ്യത, പത്രിക സമര്‍പ്പിക്കുന്ന സമയത്ത് സ്ഥാനാര്‍ഥി ഉള്‍പ്പെട്ടിട്ടുള്ള ക്രിമിനല്‍ കേസുകള്‍, സ്ഥാനാര്‍ഥിയുടെയും കുടുംബാംഗങ്ങളുടെയും ആസ്തിയും ബാധ്യതയും, സര്‍ക്കാരിനോ ഏതെങ്കിലും തദ്ദേശസ്ഥാപനത്തിനോ നല്‍കാനുള്ള കുടിശ്ശിക, അയോഗ്യതയുണ്ടായിട്ടുണ്ടെങ്കില്‍ അക്കാര്യം തുടങ്ങിയ വിവരങ്ങള്‍ പത്രികയോടൊപ്പം ഫോറം 2എയില്‍ സമര്‍പ്പിക്കണം. ഒരാള്‍ക്ക് ഒരു തദ്ദേശസ്ഥാപനത്തിലെ ഒരു വാര്‍ഡില്‍ മാത്രമേ മത്സരിക്കാന്‍ പാടുള്ളൂ. എന്നാല്‍ ത്രിതല പഞ്ചായത്തുകളില്‍ വ്യത്യസ്ത തലങ്ങളില്‍ മത്സരിക്കാം. നാമനിര്‍ദ്ദേശ പത്രികയും 2എ ഫോറവും പൂര്‍ണമായി പൂരിപ്പിക്കണം. സ്ഥാനാര്‍ഥികള്‍ വരണാധികാരി മുമ്പാകെയോ അധികാരപ്പെട്ട ഉദ്യോഗസ്ഥര്‍ മുമ്പാകെയോ നിയമപ്രകാരം സത്യപ്രതിജ്ഞയോ ദൃഢപ്രതിജ്ഞയോ ചെയ്ത് നിശ്ചിത ഫോറത്തില്‍ ഒപ്പുവച്ച് പത്രികയോടൊപ്പം സമര്‍പിക്കണം.
എസ്.ഐ.ആര്‍ ഡിജിറ്റലൈസേഷന്‍: ബൂത്ത് ലെവല്‍ ഓഫീസറെ ആദരിച്ചു.
തീവ്ര വോട്ടര്‍ പട്ടിക പരിഷ്‌കരണത്തിന്റെ ഭാഗമായി എന്യൂമറേഷന്‍ ഫോമുകള്‍ സമ്പൂര്‍ണമായി ഡിജിറ്റലൈസ് ചെയ്ത ആദ്യ ബൂത്ത് ലെവല്‍ ഓഫീസര്‍ വഴിക്കടവ് മാമങ്കരയിലെ എ.വി അവറാച്ചനെ ജില്ലാ കളക്ടര്‍ വി.ആര്‍ വിനോദ് ആദരിച്ചു. ബൂത്ത് നമ്പര്‍ 27 മാമങ്കര ഗവ. എല്‍.പി സ്‌കൂളിലെ ബൂത്ത് ലെവല്‍ ഓഫീസറാണ് ഇദ്ദേഹം. ഇലക്ഷന്‍ ഡെപ്യൂട്ടി കളക്ടര്‍ സി.ആര്‍. ജയന്തി, ഇ.ആര്‍.ഒ പി. സുരേഷ്, തഹസില്‍ദാര്‍ എം.പി സിന്ധു എന്നിവരും പങ്കെടുത്തു.
‘ഓണ്‍ലൈന്‍ ചൈല്‍ഡ് സെക്ഷ്വല്‍ എക്‌സ്‌പ്ലോയിറ്റേഷന്‍’ സെമിനാര്‍ അവതരണ മത്സരം സംഘടിപ്പിച്ചു
വനിതാ ശിശു വികസന വകുപ്പിന്റെ സൈക്കോ സോഷ്യല്‍ കൗണ്‍സിലിങ് പദ്ധതിയും കോട്ടയ്ക്കല്‍ ഗവ. രാജാസ് ഹയര്‍ സെക്കന്ററി സ്‌കൂള്‍ ടീന്‍സ് ക്ലബും സംയുക്തമായി ‘ഓണ്‍ലൈന്‍ ചൈല്‍ഡ് സെക്ഷ്വല്‍ എക്‌സ്‌പ്ലോയിറ്റേഷന്‍- റിസ്‌ക് ആന്‍ഡ് പ്രിവന്‍ഷന്‍’ എന്ന വിഷയത്തില്‍ സെമിനാര്‍ അവതരണ മത്സരം സ്രംഘടിപ്പിച്ചു. മത്സരത്തില്‍ ഒന്നാം വര്‍ഷ സയന്‍സ് വിദ്യാര്‍ഥിനികളായ ആഫിയ, ഫാത്തിമ നിദ എന്നിവരുടെ ടീം ഒന്നാം സ്ഥാനവും രണ്ടാം വര്‍ഷ സയന്‍സ് വിദ്യാര്‍ഥിനികളായ ആയിഷത്ത് ഷറഫിയ, കെ.പി. ഫാത്തിമ സന്ഹ എന്നിവരുടെ ടീം രണ്ടാം സ്ഥാനവും നേടി.
ഹരിത വിദ്യാലയം ഓഡിറ്റോറിയത്തില്‍ നടന്ന പരിപാടി പി.ടി.എ പ്രസിഡന്റ് കെ. വിജയകുമാരന്‍ ഉദ്ഘാടനം ചെയ്തു. ഹെഡ് മിസ്ട്രസ് പി.ജെ. ബബിത അധ്യക്ഷത വഹിച്ചു. വേങ്ങര പോലീസ് സ്റ്റേഷന്‍ സബ് ഇന്സ്പെക്ടര് കെ. സുരേഷ് മുഖ്യപ്രഭാഷണം നടത്തി. പരിപാടിയില്‍ ടീന്‍സ് ക്ലബ് കോ-ഓര്‍ഡിനേറ്റര്‍ പി. ഷമീമ, പ്രിന്‍സിപ്പല്‍ പി. അബ്ദുല്‍ മജീദ്, ഡെപ്യൂട്ടി ഹെഡ്മിസ്ട്രസ് കെ. ബീന, ഐ.സി.ഡി.എസ് സൂപ്പര്‍വൈസര്‍ ടി.വി. മുംതാസ്, സൈക്കോ സോഷ്യല്‍ കൗണ്‍സിലര്‍ സോജിയ കെ ഇമ്മാനുവല്‍, സ്റ്റാഫ് സെക്രട്ടറി ടി.വി. സജില്‍ കുമാര്‍, സൈക്കോ സോഷ്യല്‍ കൗണ്‍സിലര്‍ ഇ. ശാരിക എന്നിവര്‍ പങ്കെടുത്തു. വിജയികള്‍ക്ക് പ്രിന്‍സിപ്പല്‍ അബ്ദുള്‍ മജീദ് സമ്മാന വിതരണം നടത്തി.
അഖിലേന്ത്യ ട്രേഡ് ടെസ്റ്റ്: അപേക്ഷ ക്ഷണിച്ചു
അരീക്കോട് ഗവ.ഐ.ടി.ഐയില്‍ അഖിലേന്ത്യ ട്രേഡ് ടെസ്റ്റ് ഡിസംബര്‍ 2025 (സപ്ലിമെന്ററി/ലെഫ്റ്റ് ഓവര്‍) പരീക്ഷയ്ക്ക് അപേക്ഷ ക്ഷണിച്ചു. 2021 ല്‍ പ്രവേശനം നേടിയ രണ്ടാം വര്‍ഷ ട്രെയിനികള്‍ക്കും 2022 മുതല്‍ 2024 വരെ പ്രവേശനം നേടിയ ഒന്നാം വര്‍ഷ/രണ്ടാം വര്‍ഷ റഗുലര്‍/പ്രൈവറ്റ് ട്രെയിനികള്‍ക്കും അപേക്ഷിക്കാം. ഡിസംബര്‍ അഞ്ചിന് വൈകിട്ട് അഞ്ചിനകം അരീക്കോട് ഗവ. ഐ.ടി.ഐ. പ്രിന്‍സിപ്പലിന് അപേക്ഷ നല്‍കണം. ഫോണ്‍ 0493 2850238.
മെഡിസെപ് ആനുകൂല്യം നിഷേധിച്ചു: പെരിമ്പലം സ്വദേശിയ്ക്ക് നഷ്ടപരിഹാരമായി ഓറിയന്റല്‍ ഇന്‍ഷൂറന്‍സ് 191,452 രൂപ നല്‍കണം- ജില്ലാ ഉപഭോക്തൃ കമ്മിഷന്‍
കടുത്ത പനി കാരണം പെരിന്തല്‍മണ്ണയിലെ സ്വകാര്യ ആശുപത്രിയില്‍ അഡ്മിറ്റായ പെരിമ്പലം സ്വദേശി മെഡിസെപ് ആനുകൂല്യത്തിനായി ഓറിയന്റല്‍ ഇന്‍ഷൂറന്‍സ് കമ്പനിയെ സമീപിച്ചപ്പോള്‍ ആനുകൂല്യം നല്‍കാനാവില്ലെന്ന് അറിയിച്ചതിനെതിരെ ഉപഭോക്തൃ കമ്മീഷനില്‍ നല്‍കിയ പരാതിയില്‍ പരാതിക്കാരന് നഷ്ടപരിഹാരമായി ഓറിയന്റല്‍ ഇന്‍ഷൂറന്‍സ് 191,452 രൂപ നല്‍കാന്‍ വിധിച്ച് ജില്ലാ ഉപഭോക്തൃ കമ്മിഷന്‍. കിടത്തി ചികില്‍സ ആവശ്യമില്ലാത്തതിനാല്‍ മെഡിസെപ് ആനുകൂല്യം നല്‍കാനാവില്ലെന്ന് പറയാന്‍ ഇന്‍ഷൂറന്‍സ് കമ്പനിക്ക് അധികാരമില്ലെന്ന് കമ്മീഷന്‍ വിധിച്ചു.
വിധി. 12 ദിവസം ആശുപത്രിയില്‍ കിടത്തി ചികില്‍സ നടത്തിയതിന് 18,000/ രൂപ അനുവദിക്കാം എന്നാണ് ഇന്‍ഷുറന്‍സ് കമ്പനി ആദ്യം അറിയിച്ചത്. പിന്നീട് ചികിത്സാ രേഖകള്‍ പരിശോധിച്ച ശേഷം ഇത് കിടത്തി ചികിത്സ ആവശ്യമുള്ള രോഗമായിരുന്നില്ലെന്നും അതിനാല്‍ ആനുകൂല്യം നല്‍കാനാവില്ലെന്നും അറിയിക്കുകയായിരുന്നു. തുടര്‍ന്നാണ് ഉപഭോക്തൃ കമ്മീഷനില്‍ പരാതി നല്‍കിയത്. തെളിവുകള്‍ പരിശോധിച്ച കമ്മീഷന്‍ ഇന്‍ഷുറന്‍സ് കമ്പനിയുടെ നടപടി സേവനത്തിലെ വീഴ്ചയാണെന്ന് കണ്ടെത്തി. മെഡിസെപ് ആനുകൂല്യം നിഷേധിച്ചാല്‍ ജില്ലാതല സമിതിക്കും, സംസ്ഥാന സമിതിക്കും, ഓംബുഡ്‌സ്മാനും പരാതി നല്‍കുകയാണ് വേണ്ടതെന്നും പരാതി പരിഗണിക്കാന്‍ ഉപഭോക്തൃകമ്മിഷന് അധികാരമില്ലെന്നുമുള്ള ഇന്‍ഷുറന്‍സ് കമ്പനിയുടെ വാദം ഉഭോക്തൃകമ്മിഷന്‍ തള്ളിക്കളഞ്ഞു. രോഗിയെ ആശുപത്രിയില്‍ കിടത്തി ചികിത്സിക്കണോ എന്നും മരുന്ന് ഇന്‍ഞ്ചക്ഷനായി നല്‍കണോ എന്നും ഇന്‍ഷുറന്‍സ് കമ്പനിക്ക് തീരുമാനിക്കാന്‍ അധികാരമില്ല. ഈ കാരണത്താല്‍ ആനുകൂല്യം നിഷേധിക്കുന്നത് സേവനത്തിലെ വീഴ്ചയാണെന്നും കമ്മിഷന്‍ നിരീക്ഷിച്ചു. പരാതിക്കാരന്റെ ചികില്‍സാ ചിലവ് 1,36,452/ രൂപയും നഷ്ടപരിഹാരമായി 50,000/ രൂപയും കോടതി ചെലവായി 5,000/രൂപയും ഒരു മാസത്തിനകം പരാതിക്കാരന് നല്‍കാന്‍ കെ. മോഹന്‍ദാസ് പ്രസിഡന്റും, പ്രീതി ശിവരാമന്‍, സി.വി. മുഹമ്മദ് ഇസ്മായില്‍ എന്നിവര്‍ അംഗങ്ങളുമായ കമ്മിഷന്‍ ഉത്തരവിട്ടു. കാലതാമസം വന്നാല്‍ ഒമ്പത് ശതമാനം പലിശയും നല്‍കണം.
മരം ലേലം
നിലമ്പൂര്‍ ഡി.വൈ.എസ്.പി ഓഫീസ് കോമ്പൗണ്ടില്‍ അപകട ഭീഷണിയായി നില്‍ക്കുന്ന തേക്ക് മരം മുറിച്ചുമാറ്റി ലേലം ചെയ്യും. നവംബര്‍ 29 ന് രാവിലെ 11ന് നിലമ്പൂര്‍ ഡി.വൈ.എസ്.പി ഓഫീസ് കോമ്പൗണ്ട് പരിസരത്ത് ലേലം നടക്കും. ഫോണ്‍-0483 2734983.
നവജാത ശിശു സുരക്ഷാ വാരാചരണം: ജില്ലാതല ഉദ്ഘാടനം സംഘടിപ്പിച്ചു
ജില്ലാ ആസൂത്രണ സമിതി കോണ്‍ഫറന്‍സ് ഹാളില്‍ നടന്ന നവജാതശിശു വാരാചരണത്തിന്റെ ജില്ലാതല ഉദ്ഘാടനം ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ. എ. ഷിബുലാല്‍ നിര്‍വഹിച്ചു. നവജാതശിശു മരണനിരക്ക് കുറയ്ക്കുക, ജനനം മുതല്‍ ആദ്യ 28 ദിവസം വരെയുള്ള ശിശുവിന്റെ നിര്‍ണായക ഘട്ടത്തില്‍ ശരിയായ പരിചരണം ഉറപ്പാക്കുക, മാതൃ-ശിശു ആരോഗ്യബോധം ഉയര്‍ത്തുക എന്നിവയാണ് വാരാചരണത്തിന്റെ പ്രധാന ലക്ഷ്യങ്ങള്‍. ‘നവജാതശിശു സുരക്ഷ എല്ലാ കുഞ്ഞുങ്ങള്‍ക്കും എല്ലാ സ്പര്‍ശനത്തിലും എല്ലാ സമയത്തും’ എന്നതാണ് ഈ വര്‍ഷത്തെ സന്ദേശം. ജനനാനന്തര ശിശുപരിചരണത്തെക്കുറിച്ച് സമൂഹാവബോധം സൃഷ്ടിക്കുന്നതിന്റെ ഭാഗമായി ഈ വര്‍ഷം ആരോഗ്യ വകുപ്പും ആരോഗ്യകേരളവും സംയുക്തമായി ആശുപത്രികള്‍ കേന്ദ്രീകരിച്ച് വിപുലമായ ബോധവത്ക്കരണ പരിപാടികള്‍ സംഘടിപ്പിക്കും. ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ. വി. ഫിറോസ് ഖാന്‍ അധ്യക്ഷനായ ചടങ്ങില്‍ മഞ്ചേരി ഗവ. മെഡിക്കല്‍ കോളേജ് ശിശുരോഗ വിഭാഗം പ്രൊഫസര്‍ ഡോ. എസ്. ഗിരീഷ്, തിരൂരങ്ങാടി ജില്ലാ പ്രാരംഭ ആരോഗ്യ ഇടപെടല്‍ കേന്ദ്രം മെഡിക്കല്‍ ഓഫീസര്‍ എന്‍. ഹക്കിം എന്നിവര്‍ നവജാതശിശു പരിചരണത്തെയും സുരക്ഷയെയും കുറിച്ച് വിശദീകരിച്ചു. ജില്ലാ എജ്യൂക്കേഷന്‍ മീഡിയ ഓഫീസര്‍ കെ.പി. സാദിഖ് അലി, ഡെപ്യൂട്ടി ജില്ലാ എജ്യൂക്കേഷന്‍ മീഡിയ ഓഫീസര്‍ വിന്‍സെന്റ് സിറില്‍, ആര്‍.ബി.എസ്.കെ. ജില്ലാ കോര്‍ഡിനേറ്റര്‍ പി.കെ. രമ്യ, ഐ.ഇ.സി. കണ്‍സള്‍ട്ടന്റ് ഇ.ആര്‍. ദിവ്യ, ഡി.ഐ.ഇ.സി. മാനേജര്‍ ദേവീദാസ് എന്നിവര്‍ സംസാരിച്ചു.
വാട്ടര്‍ അതോറിറ്റി ജീവനക്കാര്‍ ധര്‍ണ്ണ നടത്തി.
മലപ്പുറം : പതിനൊന്നാം ശമ്പള പരിഷ്‌കരണ കമ്മീഷന്‍ ശുപാര്‍ശപ്രകാരമുള്ള ആനുകൂല്യങ്ങള്‍ വാട്ടര്‍ അതോറിറ്റി ജീവനക്കാര്‍ക്ക് നിഷേധിക്കുന്നതിനെതിരെ ജീവനക്കാര്‍ ധര്‍ണ്ണ നടത്തി. ശമ്പള പരിഷ്‌കരണ അപാകതകള്‍ പരിഹരിച്ചുകൊണ്ട് ഇറക്കിയ ഉത്തരവിലും ബഹുഭൂരിപക്ഷം ജീവനക്കാര്‍ക്ക് ലഭിക്കേണ്ട ശമ്പള വര്‍ദ്ധന ആനുകൂല്യം നല്‍കിയിട്ടില്ല. ശമ്പള പരിഷ്‌കരണ ഉത്തരവില്‍ വന്നിട്ടുള്ള അപാകതകള്‍ അടിയന്തരമായി പരിഹരിക്കണമെന്ന് ജീവനക്കാര്‍ ആവശ്യപ്പെട്ടു. കേരള വാട്ടര്‍ അതോറിറ്റി സ്റ്റാഫ് അസോസിയേഷന്‍ കേന്ദ്ര കമ്മിറ്റി അംഗം ഷൈജു പുലാമന്തോള്‍ ഉദ്ഘാടനം ചെയ്തു. സംസ്ഥാന കമ്മിറ്റി അംഗം ദിപു കെ അധ്യക്ഷത വഹിച്ചു. ജില്ലാ സെക്രട്ടറി റിയേഴ്‌സ് കെ സ്വാഗതവും വനിത ഫോറം കണ്‍വീനര്‍ ഷീന പി നന്ദിയും പറഞ്ഞു.
—————————————————————-
നിങ്ങൾ വാർത്തകൾ അറിയാന്‍ WHATSAPP ഗ്രൂപ്പിൽ ജോയിൻ ചെയ്യുക
നിങ്ങൾക്കും വാർത്തകളും അറിയിപ്പുകളും അറിയിക്കാം…
E MAIL : mtnlivenews@gmail.com