തിരൂരങ്ങാടി: വിപുലമായ അധികാരപരിധിയുള്ള തിരൂരങ്ങാടി പോലീസ് സ്റ്റേഷനിൽ ആവശ്യത്തിന് ഉദ്യോഗസ്ഥരില്ലാത്തത് പ്രവർത്തനങ്ങളെ സാരമായി ബാധിക്കുന്നു. ഒരു പ്രിൻസിപ്പൽ എസ്.ഐയും അഞ്ച് ഗ്രേഡ് എസ്.ഐമാരും ഇല്ലാത്തതാണ് സ്റ്റേഷനെ നിലവിൽ കടുത്ത പ്രതിസന്ധിയിലാക്കിയിരിക്കുന്നത്. ഇവിടെയുണ്ടായിരുന്ന പ്രിൻസിപ്പൽ എസ്.ഐ താനൂരിലേക്ക് സ്ഥലംമാറിപ്പോവുകയും, അഞ്ച് ഗ്രേഡ് എസ്.ഐമാർ സർവീസിൽ നിന്ന് വിരമിക്കുകയും ചെയ്തതോടെയാണ് ഉദ്യോഗസ്ഥ ക്ഷാമം രൂക്ഷമായത്. ഇത്യും വലിയൊരു പരിധിയിലുള്ള സ്റ്റേഷനിലെ ക്രമസമാധാനപാലനത്തിനായി നിലവിൽ ഒരു എസ്.എച്ച്.ഒയും (ഇൻസ്പെക്ടർ) ഒരു എസ്.ഐയും മാത്രമാണുള്ളത്.
പ്രതിസന്ധിക്ക് കാരണമാകുന്ന പ്രധാന ഘടകങ്ങൾ:
വിപുലമായ അധികാരപരിധി: തിരൂരങ്ങാടി നഗരസഭ, മൂന്നിയൂർ, എ.ആർ. നഗർ ഗ്രാമപഞ്ചായത്തുകൾ, നന്നമ്പ്ര പഞ്ചായത്തിന്റെ പകുതി ഭാഗം എന്നിവ ഉൾപ്പെടുന്നതാണ് തിരൂരങ്ങാടി പോലീസ് സ്റ്റേഷൻ പരിധി.
വർദ്ധിക്കുന്ന ജോലിഭാരം: സ്റ്റേഷൻ പരിധിയിലൂടെ ദേശീയപാത കടന്നുപോകുന്നതിനാൽ ഈ മേഖലയിൽ വാഹനാപകടങ്ങൾ നിത്യസംഭവമാണ്. നിയമനടപടികളിലെ കാലതാമസം: തിരൂരങ്ങാടി ഗവ. താലൂക്ക് ആശുപത്രി ഈ സ്റ്റേഷൻ പരിധിയിലാണ് സ്ഥിതി ചെയ്യുന്നത്. അപകടമരണങ്ങൾ ഉൾപ്പെടെയുള്ള സംഭവങ്ങളിൽ ഇൻക്വസ്റ്റ്, പോസ്റ്റ്മോർട്ടം നടപടികൾക്ക് എസ്.ഐ റാങ്കിലുള്ള ഉദ്യോഗസ്ഥർ നേരിട്ടെത്തേണ്ടതുണ്ട്. ഉദ്യോഗസ്ഥരുടെ കുറവ് ഇത്തരം അടിയന്തര നിയമനടപടികൾ വൈകുന്നതിനും ജനങ്ങൾ വലയുന്നതിനും കാരണമാകുന്നു. ആവശ്യത്തിന് ഉദ്യോഗസ്ഥരില്ലാത്തത് നിലവിലുള്ള പോലീസുകാരിൽ കടുത്ത മാനസിക സമ്മർദ്ദം സൃഷ്ടിക്കുന്നുണ്ടെന്നും പരാതിയുണ്ട്. സ്റ്റേഷന്റെ പ്രവർത്തനം സുഗമമാക്കുന്നതിന് ആവശ്യമായ ഉദ്യോഗസ്ഥരെ അടിയന്തരമായി നിയമിക്കണമെന്ന് ആവശ്യപ്പെട്ട് ദേശീയ മനുഷ്യാവകാശ സംഘടനയായ നാഷണൽ ഫോറം ഫോർ പീപ്പിൾസ് റൈറ്റ്സ് (എൻ.എഫ്.പി.ആർ) ഭാരവാഹികൾ രംഗത്തെത്തി. എൻ.എഫ്.പി.ആർ തിരൂരങ്ങാടി താലൂക്ക് ജനറൽ സെക്രട്ടറി അഷ്റഫ് കളത്തിങ്ങൽ പാറ, ആഭ്യന്തര വകുപ്പ് മന്ത്രി രമേശ് ചെന്നിത്തലയ്ക്ക് തിരുവനന്തപുരത്ത് നേരിട്ടെത്തി നിവേദനം നൽകി.