വലിയോറ: വഴിയിൽ വീണുകിട്ടിയ മുക്കാൽ പവനോളം തൂക്കമുള്ള സ്വർണ്ണാഭരണം ഉടമസ്ഥനെ കണ്ടെത്തി തിരികെ നൽകി വലിയോറ കുറുക ഗവൺമെന്റ് ഹൈസ്കൂളിലെ വിദ്യാർത്ഥിനികൾ. പത്താം ക്ലാസ് വിദ്യാർത്ഥിനികളായ ഫാത്തിമ റിഫാ ഒ, അനന്യ പി എം, ഫാത്തിമ ഹിബ പി എന്നിവരാണ് സത്യസന്ധതയുടെ മാതൃകയായത്. തിങ്കളാഴ്ച വൈകീട്ട് സ്കൂൾ വിട്ട് വീട്ടിലേക്ക് പോകുന്നതിനിടെയാണ് വിദ്യാർത്ഥിനികൾക്ക് റോഡിൽ നിന്ന് ആഭരണം കളഞ്ഞുകിട്ടിയത്. കൂടെയുണ്ടായിരുന്ന കുട്ടികളുടേതല്ലെന്ന് ഉറപ്പായതോടെ, ഒട്ടും താമസിയാതെ ഇവർ സ്കൂളിൽ തിരിച്ചെത്തി അധ്യാപകരെ ഏൽപ്പിക്കുകയായിരുന്നു. വിവരം അറിഞ്ഞ ഉടൻതന്നെ ഹെഡ്മാസ്റ്ററുടെ നിർദ്ദേശപ്രകാരം പിറ്റേദിവസം രാവിലെ സ്കൂളിൽ പ്രത്യേക അറിയിപ്പ് നൽകുകയും, ആഭരണം കളഞ്ഞുകിട്ടിയ വിവരം പുറത്ത് പോസ്റ്ററായി പതിക്കുകയും ചെയ്തു. ഇതിനെത്തുടർന്ന്, ആഭരണം നഷ്ടപ്പെട്ട മൂട്ട പറമ്പൻ അസീസ് സ്കൂളിലെത്തി വിവരങ്ങൾ തിരക്കി. വേങ്ങര ഹയർസെക്കൻഡറി സ്കൂളിൽ പഠിക്കുന്ന മകൾ ഫിൽസ ഫാത്തിമയുടേതാണ് നഷ്ടപ്പെട്ട ആഭരണമെന്ന് അദ്ദേഹം അറിയിച്ചു. തുടർന്ന്, ഫിൽസ ഫാത്തിമയുമായി സ്കൂളിലെത്തിയ അസീസ്, കൈചെയിൻ തങ്ങളുടേതാണെന്ന് ഉറപ്പിച്ചു. ഹെഡ്മാസ്റ്ററുടെ സാന്നിധ്യത്തിൽ, ആഭരണം വീണുകിട്ടിയ കുട്ടികൾ തന്നെ ഉടമയായ ഫിൽസ ഫാത്തിമയ്ക്ക് തിരികെ കൈമാറി. വിദ്യാർത്ഥിനികളുടെ ഈ സൽപ്രവർത്തനത്തെ സീനിയർ അസിസ്റ്റന്റ് പ്രിയേഷ് വിജയൻ, സ്റ്റാഫ് സെക്രട്ടറി ഷറഫുദ്ദീൻ അരീക്കാടൻ, ഫിൽസ ഫാത്തിമയുടെ പിതാവ് എംപി അസീസ് എന്നിവർ പ്രത്യേകം അഭിനന്ദിച്ചു. ഇത്തരം പ്രവർത്തനങ്ങൾ കുട്ടികളിൽ വളർന്നുവരണമെന്നും മറ്റുള്ളവർക്ക് മാതൃകയാവണമെന്നും അസീസ് പറഞ്ഞു. ഫിൽസാ ഫാത്തിമയും പിതാവും കുട്ടികൾക്ക് നന്ദി അറിയിക്കുകയും, രക്ഷിതാക്കൾ വിദ്യാർത്ഥിനികളെ അഭിനന്ദിക്കുകയും ചെയ്തു.