വേങ്ങര: സംഗീതലോകത്തെ അതുല്യ പ്രതിഭ എം. എസ്. ബാബുരാജിന്റെ ഓർമ്മകൾക്ക് മുന്നിൽ വേങ്ങരയുടെ ഹൃദയം സംഗീതാർദ്രമായി. വേങ്ങര സാംസ്കാരിക വേദിയുടെ പ്രതിവാര വെള്ളിയാഴ്ച സംഗമത്തിൽ സംഘടിപ്പിച്ച ‘ബാബുരാജ് അനുസ്മരണം’ എന്ന പരിപാടി സംഗീതപ്രേമികളുടെ നിറഞ്ഞ സാന്നിധ്യം കൊണ്ട് അവിസ്മരണീയമായി. സബാഹ് സ്ക്വയറിൽ ഒരുക്കിയ വേദിയിൽ വെള്ളിയാഴ്ച വൈകുന്നേരം 7 മണിക്ക് ആരംഭിച്ച സംഗീത സായാഹ്നം, ബാബുരാജിന്റെ അനശ്വര ഗാനങ്ങളുടെ ഓർമ്മപ്പെടുത്തലായി മാറി. ഹൃദയത്തിൽ തൊട്ട വാക്കുകളാൽ മൻസൂർ മൂപ്പൻ താനാളൂർ, അബ്ദുൽ മജീദ് ഇ.കെ, ബഷീർ പൂഴിത്തറ എന്നിവർ അനുസ്മരണ പ്രഭാഷണം നടത്തി. ബാബുരാജിന്റെ സംഗീത ജീവിതത്തിലെയും വ്യക്തി ജീവിതത്തിലെയും ഹൃദയ സ്പർശിയായ നിമിഷങ്ങൾ അവർ സദസ്സുമായി പങ്കുവെച്ചപ്പോൾ അത് ഗൃഹാതുരമായ ഒരോർമ്മയായി.
സംഗീത സായാഹ്നത്തിന് മാറ്റുകൂട്ടിക്കൊണ്ട് പ്രതിഭകളെ ആദരിക്കുന്ന ധന്യമായ ചടങ്ങും അരങ്ങേറി. മലയാള സിനിമാ ഗാനശാഖയ്ക്ക് ഗവേഷണങ്ങളിലൂടെ വിലപ്പെട്ട സംഭാവനകൾ നൽകിയ വേങ്ങരയുടെ അഭിമാനങ്ങളായ അബ്ദുൽ മജീദ് ഇ.കെ, ബഷീർ പൂഴിത്തറ എന്നിവരെ സാംസ്കാരിക വേദി പൊന്നാടയണിയിച്ച് ആദരിച്ചു. സംഗീതലോകത്തിന് നൽകിയ സമഗ്ര സംഭാവനകൾ പരിഗണിച്ച് തബല വിദ്വാൻ ഡോ. അബ്ദുറഹ്മാൻ കൊളക്കാട്ടിൽ, ഹാർമോണിസ്റ്റ് സലീം ഭായ് തിരൂർ, വയലിനിസ്റ്റ് ജോസ് മാസ്റ്റർ, ഗായകരായ വേലായുധൻ കുറുവിൽകുണ്ട്, ഡോ. റാഷിദ് എന്നിവരും വേങ്ങരയുടെ സ്നേഹാദരം ഏറ്റുവാങ്ങി. തുടർന്ന് നടന്ന ഗാനമേളയിൽ, സലീം ഭായ് തിരൂർ (ഹാർമോണിയം), ഡോ. അബ്ദുറഹ്മാൻ കൊളക്കാട്ടിൽ (തബല),)എന്നിവരുടെ വാദ്യവിസ്മയത്തിൽ മോഹൻ ജി, പ്രദീപ്, ഡോ. റാഷിദ്, കെ.ടി ഷാജു തിരൂരങ്ങാടി, അഭിലാഷ്, ശ്രീകുമാർ വേങ്ങര, ഷബീർ ഷാ, വേലായുധൻ കച്ചേരിപ്പടി, വേലായുധൻ കുറുവിൽകുണ്ട് തുടങ്ങിയ ഗായകർ ബാബുരാജ് ഗാനങ്ങൾക്ക് പുനർജന്മം നൽകി. ബാബുരാജിന്റെ എക്കാലത്തെയും മികച്ച ഗാനങ്ങൾ കോറസ്സായി ആലപിച്ചതായിരുന്നു.
