പരപ്പനങ്ങാടി: നഗരസഭ സംഘടിപ്പിച്ച 2025–26 വർഷത്തെ കേരളോത്സവത്തിൽ പരപ്പനാട് വാക്കേഴ്സ് ക്ലബ്ബിന് ഓവറോൾ ചാമ്പ്യൻഷിപ്പ്. 113 പോയിന്റുകൾ നേടിയാണ് ക്ലബ്ബ് ഈ അഭിമാനകരമായ നേട്ടം സ്വന്തമാക്കിയത്. അത്ലറ്റിക്സ്, വടംവലി, കബഡി, ചെസ്സ്, കൂടാതെ വിവിധ കലാമത്സരങ്ങൾ എന്നിവയിൽ മികച്ച പ്രകടനം കാഴ്ചവെച്ചാണ് പരപ്പനാട് വാക്കേഴ്സ് ക്ലബ്ബ് ഒന്നാമതെത്തിയത്. വിജയികൾക്കുള്ള സമ്മാനദാനം നഗരസഭാ ചെയർപേഴ്സൺ സുബൈദ ടീച്ചർ നിർവ്വഹിച്ചു. വൈസ് ചെയർമാൻ ഷമീം കിഴക്കിനിയകത്ത്, നഗരസഭാ കൗൺസിലർമാരായ ഫയറൂസ തസ്നീം പി., റസാഖ് എം., മുനീർ ബാബു പി. തുടങ്ങിയവർ ചടങ്ങിൽ സംബന്ധിച്ചു. 2020-ലെ കോവിഡ് കാലഘട്ടത്തിൽ പരപ്പനങ്ങാടി ചുടലപ്പറമ്പ് മൈതാനം ആസ്ഥാനമാക്കിയാണ് പരപ്പനാട് വാക്കേഴ്സ് ക്ലബ്ബ് പ്രവർത്തനം ആരംഭിച്ചത്. കലാ-കായിക മേഖലകളിൽ പുതുതലമുറയ്ക്ക് മികച്ച പരിശീലനം നൽകി സംസ്ഥാന-ദേശീയ ചാമ്പ്യൻഷിപ്പുകൾക്ക് അവരെ പ്രാപ്തരാക്കുക എന്നതാണ് ക്ലബ്ബിന്റെ പ്രധാന ലക്ഷ്യം. പ്രവർത്തനം തുടങ്ങിയ കാലം മുതൽ നിരവധി കായികതാരങ്ങളെ സംസ്ഥാന-കേന്ദ്ര സേനകളിൽ എത്തിക്കാൻ ഈ കൂട്ടായ്മയ്ക്ക് സാധിച്ചിട്ടുണ്ട്. വരാനിരിക്കുന്ന ജൂനിയർ, സീനിയർ അത്ലറ്റിക് മീറ്റുകളിൽ കൂടുതൽ മികച്ച നേട്ടങ്ങൾ കൈവരിക്കുക എന്ന ലക്ഷ്യത്തോടെ അടുത്ത മാസം മുതൽ പരിശീലനം പുനരാരംഭിക്കുമെന്ന് ക്ലബ്ബ് പ്രസിഡന്റ് ഉണ്ണികൃഷ്ണൻ കേലച്ചൻകണ്ടിയും കൺവീനർ കെ.ടി. വിനോദും അറിയിച്ചു. കേരളോത്സവത്തിലെ ഈ ഓവറോൾ ചാമ്പ്യൻഷിപ്പ് നേട്ടം പരപ്പനാട് വാക്കേഴ്സ് ക്ലബ്ബിന്റെ കായിക-സാംസ്കാരിക രംഗത്തെ മികവിനും ചിട്ടയായ പ്രവർത്തനങ്ങൾക്കും ലഭിച്ച അംഗീകാരമായാണ് വിലയിരുത്തപ്പെടുന്നത്.