വേങ്ങര: സംഗീതത്തെ സ്നേഹിക്കുന്നവരുടെ ഹൃദയതാളങ്ങൾ സാക്ഷിയാക്കി വേങ്ങര സബാഹ് സ്ക്വയറിൽ നടന്ന ഗസൽ സന്ധ്യ അവിസ്മരണീയമായ അനുഭവമായി. മലയാള ഗസലിന്റെ സുൽത്താൻ ഉമ്പായിയുടെ സംഗീത പാരമ്പര്യവുമായി എത്തിയ പ്രശസ്ത ഗായകൻ സി. കെ. സാദിഖ്, തന്റെ ആലാപനത്തിലൂടെ സദസ്സിനെ ഓർമ്മകളുടെ താഴ്വരയിലേക്ക് കൈപിടിച്ച് നടത്തി. മലയാളത്തിന്റെ പ്രിയ കവി യൂസുഫലി കേച്ചേരിയുടെ മകൻ സൂരജ് അലി കേച്ചേരി മുഖ്യാതിഥിയായി എത്തിയത് പരിപാടിക്ക് സാംസ്കാരികമായ തിളക്കം പകർന്നു. സംഗീതവും സാഹിത്യവും ഒരു വേദിയിൽ സംഗമിച്ചപ്പോൾ അത് തലമുറകളുടെ ഓർമ്മപ്പെടുത്തലായി മാറി. തിരക്കേറിയ ലോകത്ത് ഇത്തരം സംഗീത സദസ്സുകളുടെ പ്രാധാന്യം വിളിച്ചോതുന്നതായിരുന്നു പരിപാടിയിൽ പങ്കെടുത്തവരുടെ സാന്നിധ്യം. പരിപാടിയുടെ ഭാഗമായി അതിഥികളെ ആദരിച്ചു. ചെയർമാൻ സബാഹ് കുണ്ടുപുഴക്കൽ, സി. കെ. സാദിഖിനും സൂരജ് അലി കേച്ചേരിക്കും മൊമെന്റോകൾ സമ്മാനിച്ചു. പൂഴിത്തറ ബാവക്ക, ജിൻഷാദ് ബാബു എന്നിവർ ചേർന്ന് ഇരുവരെയും പൊന്നാടയണിയിച്ചു. വേങ്ങരയുടെ രാവിന് സംഗീതത്തിന്റെ കുളിർമ പകർന്നു നൽകിയാണ് ഗസൽ സന്ധ്യ സമാപിച്ചത്.
