മലപ്പുറം: ദേശീയപാത 66 (NH-66) വികസനത്തിന്റെ ഭാഗമായി കൊളപ്പുറം നോർത്ത് ജംഗ്ഷനിൽ നടപ്പാക്കുന്ന നവീകരണ പദ്ധതി വ്യാപാരികൾക്കും പൊതുജനങ്ങൾക്കും ഗുരുതരമായ ബുദ്ധിമുട്ടുകൾ സൃഷ്ടിക്കുമെന്ന ആശങ്കയുമായി കേരള ഹോട്ടൽ ആൻഡ് റെസ്റ്റോറന്റ് അസോസിയേഷൻ (KHRA)യും കേരള വ്യാപാരി വ്യവസായി ഏകോപന സമിതിയും (KVVES) സംയുക്തമായി ജില്ലാ കളക്ടർ വി.ആർ. വിനോദ് IAS ന് നിവേദനം സമർപ്പിച്ചു. വ്യാപാര സ്ഥാപനങ്ങൾക്ക് ഭീഷണി: 100-ൽ അധികം വ്യാപാര സ്ഥാപനങ്ങളും 1000-ൽ അധികം തൊഴിലാളികളും ആശ്രയിക്കുന്ന ജംഗ്ഷനിൽ, നിലവിലെ പ്ലാൻ നടപ്പിലായാൽ സ്ഥാപനങ്ങളുടെ പ്രവർത്തനം താറുമാറാകും.മത സ്ഥാപനങ്ങളിലേക്കുള്ള തടസ്സം: പള്ളി, അമ്പലം ഉൾപ്പെടെയുള്ള മതസ്ഥാപനങ്ങളിലേക്കും ശ്മശാനങ്ങളിലേക്കുമുള്ള വാഹന ഗതാഗതത്തിന് പോലും തടസ്സം നേരിടേണ്ടി വരുമെന്ന് പ്രതിനിധി സംഘം കളക്ടറെ അറിയിച്ചു.സുരക്ഷാ പ്രശ്നങ്ങൾ: ഗതാഗത കുരുക്ക്, വർധിച്ച അപകടസാധ്യത, അത്യാവശ്യ (Emergency) യാത്രകളിലെ തടസ്സം എന്നിവയും പ്രതിനിധികൾ ചൂണ്ടിക്കാട്ടി.ജംഗ്ഷൻ നവീകരണത്തിനൊപ്പം നിർബന്ധമായും ഒരു റൗണ്ട്ബൗട്ട് ഉൾപ്പെടുത്തണമെന്ന് പ്രതിനിധികൾ ആവശ്യപ്പെട്ടു. പ്രദേശവാസികൾ നേരത്തെ തന്നെ പ്രതിഷേധം പ്രകടിപ്പിച്ച സാഹചര്യത്തിൽ പ്രശ്നപരിഹാരത്തിനായി ഉടൻ നടപടിയെടുക്കണമെന്നും നിവേദനത്തിൽ ആവശ്യപ്പെട്ടു. നിവേദനം സമർപ്പിച്ച സംഘത്തിൽ KHRA മലപ്പുറം ജില്ലാ പ്രസിഡൻ്റ് സി.എച്ച്. സമദ്, KHRA കൊളപ്പുറം യൂണിറ്റ് പ്രസിഡൻ്റ് അലവി ഹാജി, സെക്രട്ടറി അഷ്‌റഫ് എന്നിവരും KVVES കൊളപ്പുറം യൂണിറ്റ് പ്രസിഡൻ്റ് മൂസ ഹാജി, സെക്രട്ടറി നദീർ, ട്രഷറർ സൈദു മുഹമ്മദ്, വൈസ് പ്രസിഡൻ്റ് ഹനീഫ യു.കെ, അനിൽകുമാർ വൈശാഖ് എന്നിവരും സമരസമിതി ഭാരവാഹി അയൂബ് ഖാൻ ചാലിലും പങ്കെടുത്തു.നിവേദനം സ്വീകരിച്ച ജില്ലാ കളക്ടർ, വിഷയം പരിശോധിച്ച് ആവശ്യമായ നടപടികൾ സ്വീകരിക്കുമെന്ന് പ്രതിനിധികളെ അറിയിച്ചു. നിയുക്ത എസ്.പി, ഡി.എം.ഒ, ഫുഡ് സേഫ്റ്റി ഓഫീസർ എന്നിവരും നിവേദനം സമർപ്പിക്കുന്ന വേളയിൽ സന്നിഹിതരായിരുന്നു.
