പാലാണി : ഇരിങ്ങല്ലൂര്‍ ഈസ്റ്റ് എ എം എല്‍ പി സ്‌കൂളിന്റെ 100-ാം വാര്‍ഷികാഘോഷ പരിപാടിയായ ശതാരവം 2025 മലപ്പുറം ജില്ലാ ഡെപ്യൂട്ടി കളക്ടര്‍ കെ അന്‍വര്‍ സാദത്ത് ഉദ്ഘാടനം ചെയ്തു. ചടങ്ങില്‍ പറപ്പൂര്‍ ഗ്രാമപഞ്ചായത്ത് പ്രസിഡന്റ് വി സലീമ ടീച്ചര്‍ അധ്യക്ഷത വഹിച്ചു. ഗ്രാമ പഞ്ചായത്തംഗങ്ങളായ എ.പി ഷാഹിദ, എ.പി. ഹമീദ് വേങ്ങര ബ്ലോക്ക് പ്രോഗ്രാം കോ- ഓഡിനേറ്റര്‍ നൗഷാദ് കെ എം, എം.ടി.എ പ്രസിഡന്റ് ബാനുഷ ഹക്കീം എന്നിവര്‍ ആശംസകള്‍ അര്‍പ്പിച്ചു സംസാരിച്ചു. ഹെഡ്മാസ്റ്റര്‍ അലക്‌സ് തോമസ് സ്വാഗതവും പി ടി എ പ്രസിഡന്റ് അഷ്‌റഫ് കപ്പൂര്‍ നന്ദിയും പറഞ്ഞു.
2025 ഡിസംബര്‍ 31 വരെ ഒരു വര്‍ഷക്കാലം നീണ്ട നില്‍ക്കുന്ന പരിപാടികളാണ് ശതാരവം 2025 എന്ന പേരില്‍ നടക്കുന്നത്. 100-ാം വര്‍ഷത്തില്‍ 100 അനുബന്ധ പരിപാടികളാണ് സ്വാഗത സംഘം തീരുമാനിച്ചിട്ടുള്ളത്. സുവനീര്‍ പ്രകാശനം, സ്‌നേഹ സംഗമങ്ങള്‍, കറിവേപ്പില ഗ്രാമം, വയോജന യാത്ര, സെമിനാറുകള്‍, പത്ത് ദിനാഘോഷങ്ങള്‍, പൂര്‍വ വിദ്യാര്‍ഥിസംഗമം, പൂര്‍വാധ്യാപക സംഗമം, അയല്‍പക്ക വായനക്കൂട്ടം, പുസ്തകാസ്വാദന സദസ്സ്, 100 കൈയ്യെഴുത്ത് പുസ്തകങ്ങളുടെ പ്രകാശനം, നാടകയാത്ര, കര്‍ഷകസംഗമം, ഏകദിന ഫുട്‌ബോള്‍ ടൂര്‍ണ്ണമെന്റ് തുടങ്ങിയവയാണ് ശതാരവത്തിന്റെ ഭാഗമായി നടക്കുന്ന പ്രധാന പരിപാടികള്‍. 1925 ല്‍ കുഴിക്കാട്ടില്‍ മൊയ്തീന്‍ മുല്ല ഏകാധ്യാപക വിദ്യാലയമായി ആരംഭിച്ചതാണ് ഈ സ്‌കൂള്‍.
