സംസ്ഥാനത്തെ ഐഎഎസ് ഉദ്യോഗസ്ഥരുടെ സ്ഥലംമാറ്റവും നിയമനവും സംബന്ധിച്ച് പൊതുഭരണ (എഐഎസ് എ) വകുപ്പ് ഉത്തരവിറക്കി. മലപ്പുറം ജില്ലാ കളക്ടറായിരുന്ന വിനോദ് വി.ആർ ഐഎഎസിനെ ലാൻഡ് റവന്യൂ ജോയിന്റ് കമ്മീഷണറായി നിയമിച്ചു. നിലവിൽ ആരോഗ്യ-കുടുംബക്ഷേമ വകുപ്പിൽ ജോയിന്റ് സെക്രട്ടറിയായി സേവനമനുഷ്ഠിച്ചിരുന്ന ഡോ. വിനയ് ഗോയൽ ഐഎഎസാണ് പുതിയ മലപ്പുറം ജില്ലാ കളക്ടർ. ഇതിനുപുറമെ, കേരള സംസ്ഥാന ഹജ്ജ് കമ്മിറ്റിയുടെ എക്സിക്യൂട്ടീവ് ഓഫീസർ എന്ന അധിക ചുമതല കൂടി അദ്ദേഹം വഹിക്കും. സ്മാർട്ട് സിറ്റി തിരുവനന്തപുരം ചീഫ് എക്സിക്യൂട്ടീവ് ഓഫീസറായ രാഹുൽ കൃഷ്ണ ശർമ്മ ഐഎഎസിനെ ആരോഗ്യ-കുടുംബക്ഷേമ വകുപ്പിൽ ജോയിന്റ് സെക്രട്ടറിയായി മാറ്റി നിയമിച്ചു. സ്മാർട്ട് സിറ്റി ചീഫ് എക്സിക്യൂട്ടീവ് ഓഫീസറുടെ അധിക ചുമതല അദ്ദേഹം തുടരുന്നതിനൊപ്പം നാഷണൽ ഹെൽത്ത് മിഷൻ സ്റ്റേറ്റ് മിഷൻ ഡയറക്ടർ, ഇ-ഹെൽത്ത് പ്രോജക്ട് ഡയറക്ടർ, കേരള ക്ലിനിക്കൽ എസ്റ്റാബ്ലിഷ്മെന്റ് ആക്ട് 2018 നടപ്പിലാക്കുന്നതിനുള്ള സ്പെഷ്യൽ ഓഫീസർ, കേരള മെഡിക്കൽ സർവീസസ് കോർപ്പറേഷൻ ലിമിറ്റഡിന്റെ മാനേജിംഗ് ഡയറക്ടർ എന്നീ സുപ്രധാനമായ അധിക ചുമതലകൾ കൂടി അദ്ദേഹം നിർവ്വഹിക്കേണ്ടതുണ്ട്. 2026 ഫെബ്രുവരി 21-ന് പുറപ്പെടുവിച്ച ഈ ഉത്തരവ് ഗവർണറുടെ നിർദ്ദേശാനുസരണം അഡീഷണൽ സെക്രട്ടറി രാജേഷ് ജി.ആർ ആണ് ഒപ്പുവെച്ചിരിക്കുന്നത്.
