വയനാട്: മീനങ്ങാടിയില്‍ കര്‍ണാടക ആര്‍ടിസി യാത്രക്കാരനില്‍ നിന്ന് കുഴല്‍പ്പണം പിടിച്ചു. ഒന്നരക്കോടി രൂപയോളം കുഴല്‍പ്പണമാണ് എക്സൈസ് പിടികൂടിയത്. ഇന്ന് പുലർച്ചെ മൂന്നുമണിക്ക് മൈസൂരു- കോഴിക്കോട് ദേശീയപാതയില്‍ വെച്ച്‌ നടത്തിയ വാഹന പരിശോധനയിലാണ് പണം പിടികൂടിയത്. സംഭവത്തില്‍ മലപ്പുറം തിരൂരങ്ങാടി വള്ളിക്കുന്ന് സ്വദേശി അബ്ദുള്‍ റസാഖ് ആണ് അറസ്റ്റിലായത്.ബെംഗളൂരുവില്‍ നിന്ന് കോഴിക്കോട്ടേക്ക് പോവുകയായിരുന്ന കര്‍ണാടക ആര്‍ടിസിയുടെ വോള്‍വോ സ്ലീപ്പര്‍ ബസില്‍ മീനങ്ങാടിയില്‍ വെച്ച്‌ നടത്തിയ പരിശോധനയിലാണ് ഇതിലെ യാത്രക്കാരനായ അബ്ദുല്‍ റസാഖിനെ കുഴല്‍പ്പണവുമായി പിടികൂടിയത്. പരിശോധനയില്‍ നിയമവിരുദ്ധമായി രേഖകള്‍ ഇല്ലാതെ കടത്തുകയായിരുന്ന 1.36 കോടി രൂപ കണ്ടെടുത്തത്.പണം കൊണ്ടുവരുന്നതുമായി ബന്ധപ്പെട്ട യാതൊരു രേഖകളും ഇയാളുടെ കൈവശമുണ്ടായിരുന്നില്ല. വയനാട് ഡെപ്യൂട്ടി എക്സൈസ് കമ്മീഷണറുടെ മേല്‍നോട്ടത്തില്‍ സുല്‍ത്താൻബത്തേരി എക്സൈസ് സർക്കിള്‍ ഇൻസ്പെക്ടർ സുനില്‍ എം കെയുടെയും എക്സൈസ് റേഞ്ച് ഇൻസ്പെക്ടർ ബാബുരാജിന്‍റെയും നേതൃത്വത്തിലുള്ള സംഘം ഇന്ന് പുലർച്ചെ മൂന്നുമണിയോടുകൂടിയാണ് മൈസൂരു -കോഴിക്കോട് ദേശീയപാതയില്‍ മീനങ്ങാടിക്ക് സമീപം വെച്ചാണ് വാഹന പരിശോധന നടത്തിയത്.എക്സൈസ് വകുപ്പ് സംസ്ഥാനതലത്തില്‍ നടത്തിയ വാഹന പരിശോധനയുടെ ഭാഗമായി നടത്തിയ പരിശോധനയിലാണ് ഇത്രയും പണം പിടികൂടിയത്. അസി. എക്സൈസ് ഇൻസ്പെക്ടർ ഹരിദാസ്. എം.ബി, പ്രിവന്റീവ് ഓഫീസർ പ്രകാശൻ കെ.വി, സിവില്‍ എക്സൈസ് ഓഫീസർമാരായ നിഷാദ് വി. ബി, അമല്‍ തോമസ് എം. ടി, ബിനു എം. എം, അജ്മല്‍ കെ, വനിത സിവില്‍ എക്സൈസ് ഓഫീസർ സിനി പി. എം, പ്രിവന്റീവ് ഓഫീസർ ഡ്രൈവർ ബാലചന്ദ്രൻ കെ.കെ എന്നിവർ സംഘത്തിലുണ്ടായിരുന്നു. പിടികൂടിയ തുക തുടർ നടപടികള്‍ക്കായി ആദായനികുതി വകുപ്പിന് കൈമാറുമെന്ന് വയനാട് ഡെപ്യൂട്ടി എക്സൈസ് കമ്മീഷണർ എ ജെ ഷാജി അറിയിച്ചു.
